Праз тыдзень у сталіцы запрацуюць атракцыёны

Наведвальнікаў мінскіх паркаў чакае шмат новага і цікавага. 50 атракцыёнаў у парках імя Максіма Горкага, імя Чалюскінцаў, імя 900-годдзя Мінска... Да сярэдзіны лета ў Фрунзенскім раёне ў парку імя Уга Чавеса адкрыецца вялікі аб'ект для адпачынку гараджан, дзе таксама будуць працаваць атракцыёны. Цяпер усе дзейныя ўстаноўкі праходзяць неабходную праверку на бяспеку і спраўнасць — пра гэта журналістам распавёў намеснік генеральнага дырэктара — галоўны інжынер «Мінскзелянбуду» Руслан Касевіч. Ён таксама паведаміў «бонусную» навіну: кошты на квіткі застануцца на ўзроўні мінулага года!

У крокавай даступнасці

Калі размова ідзе аб новай лакацыі адпачынку мінчан са спальных ускраін, то гэтае месца варта ўбачыць і захаваць для гісторыі раёна як мінімум. Жыхары каменных джунгляў у Каменнай Горцы зачакаліся топавага сацыяльна-культурнага аб’екта. І вось на пустцы вуліцы Казіміраўская з’явіліся яркія дзіцячыя горкі, гульнявыя домікі, арэлі, сценкі, лесвіцы і пясочніца — аснова дзяцінства. Усе забаўляльна-гульнявыя аб’екты ў спякотныя красавіцкія дні былі занятыя мітуслівай і вясёлай дзятвой пад традыцыйным наглядам мам. Тэму будоўлі нагадвалі самазвалы хлапчукоў, гружаныя пяском, і выкапаныя лапаткамі-ложачкамі катлаваны.

Сур’ёзная будаўнічая тэхніка працавала ў сапраўдным, вялікіх памераў катлаване (17,18 га), які знаходзіцца бліжэй да МКАД і Ждановічаў. Тут, у асноўнай частцы парку імя Уга Чавеса, гэтым летам і будзе прадоўжана тэрыторыя бесклапотнага дзяцінства — з’явяцца выдатныя месцы адпачынку для дарослых: дзве горкі для цюбінгаў, веладарожка, сцежка здароўя, пляцоўкі для заняткаў скейтбордам, варкаўтам і паркурам. 

З нецярпеннем аматары экстрыму чакаюць уводу гэтых зон, таму што асноўная гарадская пляцоўка на вуліцы Сталетава і стараватая, і замалая: часта самакатчыкі і скейтбардысты чакаюць чаргі для сваіх крутых спускаў.

Тут таксама запрацуюць стандартныя атракцыёны: «Вальс», «Лабірынт», «Аўтадром». Ужо цяпер красуецца дзіцячае гульнявое мястэчка «Казачнае каралеўства», з’явяцца арэны для правядзення мерапрыемстваў і «ціхага адпачынку» — настольных гульняў, а таксама пікнікоў. Паркавая даліна запоўніцца дымком і пахам шашлыку з барбекю. З часам высадзяць 736 дрэў і больш як тры тысячы дэкаратыўных кустоў, якія будуць мікшыраваць шумы ад атракцыёнаў і забіраць на сябе пахі «ціхага адпачынку».

Пасля працы — адпачынак!

Пад гукі ваеннага аркестра мужчыны ў чорных фраках, а дамы ў белых сукенках з букетамі кветак выконвалі ўрачыстую кантату. Ілюмінацыя, транспаранты, феерверк.

Так магло выглядаць сучаснае першамайскае свята ў Цэнтральным дзіцячым парку імя Максіма Горкага. Аказваецца, з такой помпай 1 мая 1805 года Захарый Карнееў, першы грамадзянскі губернатар Мінска, наватар, адкрыў гарадскі сад пейзажнага тыпу — той самы, які мы ведаем як «Парк Горкага». Над уваходам быў надпіс: «Пасля працы — адпачынак!» Выходзіць, што 1 мая 2024 года любімаму месцу мінчан і гасцей сталіцы споўніцца 219 гадоў!

Гарадскія паркі, у адрозненні ад людзей, з гадамі і праз стагоддзі становяцца прыгажэй і сучасней. Вядома, не без дапамогі чалавека.

Гэтымі вясновымі цёплымі днямі ў парку Горкага поўным ходам ідуць падрыхтоўчыя работы да адкрыцця сезона. Тэхнічныя работнікі праводзяць раскансервацыю і падрыхтоўку да эксплуатацыі 26 атракцыёнаў. «Зялёныя» (так жартам завуць мясцовых рабочых «Мінскзелянбуду») прыводзяць у парадак тэрыторыю, дрэвы (захаваліся дэкаратыўныя групы стагадовых ліп і клёнаў, хвоі веймутава, унікальныя асобнікі кедраў), фарбуюць лаўкі і іншыя архітэктурныя, садова-паркавыя аб’екты розных формаў. Працы — як да сярэдзіны агляднага кола!

Кола тое ў Мінску вышынёй 54 метры, размешчана яно на невялікім пагорку. З 32 закрытых і чатырох адкрытых кабін відаць набярэжную Свіслачы, манумент Перамогі і цэнтральную частку сталіцы. Поўнае абарачэнне кола робіць за дзевяць хвілін. У 2023 годзе брэндаваму атракцыёну споўнілася 20 гадоў. Да юбілейнай даты зрабілі падарунак — замянілі шкло на кабінах.

Другі год будзе дзейнічаць у дзіцячым парку інтэрактыўная пляцоўка «Лукамор’е». Тут хлопчыкі і дзяўчаты праходзяць квэсты з удзелам Дрэва, якое гаворыць, Бабы Ягі, Рыцара. Змей Гарыныч кідае з вачэй агонь і маланкі. Хатка на курыных ножках паварочваецца, рэагуючы на адказы дзяцей. Немалаважна, што 20–25 хвілін бацькі могуць адпачываць, пакуль з іх нашчадкамі займаюцца аніматары.

Гэтую цікавую, казачна-пазнавальную лакацыю паказала Лідзія Вежнавец — сапраўдны прафесіянал сваёй справы, яна выконвае абавязкі дырэктара Цэнтральнага дзіцячага парку імя Горкага. Пра зоны адпачынку любімага горада Лідзія Георгіеўна можа гаварыць гадзінамі, але злоўжываць яе дэфіцытным часам у такую «гарачую» пару было б справай нясціплай.

Камароўскі лес

Парк культуры і адпачынку імя Чалюскінцаў з’яўляецца стварэннем сацыялістычнай эпохі, ён быў пабудаваны з 1928 да 1932 года. Імя прысвоена парку ў 1934 годзе ў гонар удзельнікаў экспедыцыі на параходзе «Чалюскін».

Раней на месцы гэтага парку размяшчаўся лясны масіў, вядомы як Камароўскі лес. Прахалоду, пах вільгаці, трошкі містыкі захоўвае ён у сабе і цяпер. Тут адчуваецца дух Камароўскіх балот. Але калі запрацуюць усе атракцыёны і адкрыецца танцавальная пляцоўка, дзе збіраюцца народжаныя ў СССР, шуму і крэатыву будзе шмат. Чалюскінскі — любімае месца для праменаду людзей старэйшага ўзросту і, вядома ж, бацькоў з дзецьмі. Яшчэ ён служыць транзітнай зонай для многіх супрацоўнікаў завода імя Вавілава і студэнтак з педкаледжа.

Цяпер тут таксама ідзе падрыхтоўка да адкрыцця сезона. Па паху фарбы чуваць, што прыярытэтнымі работамі, пакуль няма дажджоў, сталі малярныя. Уладальнікі пунктаў грамадскага харчавання (яны здаюцца пагабарытней, чым у парку Горкага з-за цемнаватага лесу) на ўсю моц імкнуцца адпавядаць сітуацыі: мыюць, чысцяць, удасканальваюць прылаўкі, каб наладзіць гандаль і быць у прыбытку. У іх, як і ў прадстаўнікоў усёй забаўляльна-пар­ка­вай ін­дуст­рыі, лет­ні дзень год кор­міць.

Та­ма­ра ХАМІЦЭВІЧ

Фо­та аў­та­ра

У тэму

І нават марское паляванне

Чым сёлета будуць здзіўляць наведвальнікаў магілёўскія каруселі

Хутка ў Магілёве пачнецца паркавы сезон. Гэта адбудзецца адразу ж пасля таго, як Дзяжпрамнагляд здзейсніць іх тэхнічны агляд на трываласць і дасць адпаведнае заключэнне.

На асноўнай пляцоўцы каля Палаца культуры вобласці будуць працаваць 22 атракцыёны з улікам надзіманых. Летась іх было 19. Пераедзе з гандлёвага цэнтра «Е-сіці» 5-D + VR кінатэатр, які будзе працаваць тут да заканчэння сезона. Замест былога атракцыёна «Лавіца», які выпрацаваў свой рэсурс, па просьбах магіляўчан закуплены аналагічны новы. На наступным тыдні ён ужо прыбудзе з Расіі і будзе зманціраваны. Яшчэ адзін — «Марское паляванне», так званы марскі цір, — ужо практычна сабраны.

— Мы арыентуемся на попыт нашых наведвальнікаў і бяром на заметку ўсе іх прапановы, — кажа дырэктар ААТ «Магілёўатракцыёны» Юрый Мышэйка. — Новыя атракцыёны расійскага вытворцы надзейныя і адпавядаюць нашым тэхнічным патрабаванням. Вядзём перамовы і па набыцці кола агляду, але гэта не хуткі працэс. Ёсць цікавая задумка ўстанавіць на галоўнай пляцоўцы так званую асвяжальную арку, якая будзе пырскаць вадой. Летам у спякоту гэтага вельмі не хапае. Сёлета мы таксама набылі гандлёвы павільён, дзе, акрамя папкорна і салодкай ваты, будзе яшчэ прапаноўвацца ганконгская вафля з рознымі напаўняльнікамі.

Некалькі пляцовак з атракцыёнамі ад гэтага ж прадпрыемства будуць працаваць у мікрараёне «Восьмы цагляны» каля гандлёвага цэнтра «Гіпа», у гарадскім парку адпачынку «Падміколле» і ў раёне вуліц Цярохіна і Златавустоўскага каля папулярнага ФАКа «Н2О».
Што датычыцца цэн, то яны, па словах дырэктара, істотна не зменяцца. Летась кошт быў у межах 2,5-5,5 рубля, прычым самы высокі — на «Суперробата» з дыстанцыйным кіраваннем. Юрый Мышэйка ўдакладняе, што ўсе атракцыёны ўтрымліваюцца і набываюцца выключна за кошт уласных даходаў прадпрыемства, і заклікае беражліва ставіцца да карусельнага абсталявання.

Нэлі ЗІГУЛЯ