Вы тут

Аліна Чыжык: Музыка павінна выхоўваць


Наша гераіня ўпэўнена: дзякуючы музыцы людзі напаўняюцца святлом. І хоць сцэнічны вобраз Аліны Чыжык не саступае сусветна вядомым поп-дзівам, галівудскай зоркай дзяўчына сябе не адчувае. Наша госця — цудоўная спявачка з самабытным голасам, фіналістка праекта «Акадэмія талентаў» на АНТ, лаўрэат конкурсу маладых выканаўцаў у Маладзечне, артыстка года Гродзеншчыны — 2022. Стала знакамітай на ўсю Беларусь дзякуючы песні «Бацькава булка». Сустрэліся з Алінай, каб больш даведацца пра яе творчасць і жыццё.


«Ганаруся, што з вёскі»

З біяграфіі спявачкі можна зрабіць выснову, што творчы лёс ёй быў прадвызначаны. Музычная сям’я. Цётка, бацькава родная сястра, вядомы беларускі кампазітар Аліна Безенсон. Тата граў на сінтэзатары, маці спявала ў фальклорным хоры. Радзіма дзяўчыны — Гродзеншчына. А менавіта вёска Мількаўшчына, там жыла пісьменніца Эліза Ажэшка. Але дзяўчына расказвае, што раней хавала, адкуль родам.

— Калі падлеткам паехала ў санаторый, баялася прызнацца, адкуль я. Заўсёды казала, што з Гродна. А цяпер ганаруся, што з вёскі. Лічу, людзі, якія нарадзіліся ў вёсцы, умеюць добра працаваць і дасягаць сваіх мэт, — упэўнена суразмоўніца. 

Яна ганарыцца, што ўраджэнка гэтага рэгіёна. А зямля ёй адказвае ўдзячнасцю. Аліна стала артысткай года Гродзеншчыны ў 2022-м, яшчэ яе занеслі ў энцыклапедыю жанчын Гродзенскага раёна.

— Сваім выхаванцам кажу, што ў іх ёсць усё для таго, каб ісці да сваёй мэты. Мяне бацькі вазілі ў музычную школу ў суседні Скідзель. А гэта за 17 кіламетраў. Чакалі чатыры гадзіны, — дзеліцца спявачка. Яна гаворыць, што чаплялася за любую магчымасць, каб развівацца.

Алініна цётка параіла неадкладна аддаць дзяўчынку ў музычную школу. Яна была пераросткам, таму давялося за год асвоіць тры класы праграмы. Пасля будучая артыстка паступіла ў Гродзенскі дзяржаўны каледж мастацтваў на эстраднае аддзяленне.

— Я мела мэтавае накіраванне, — расказвае спявачка. — Аднак вельмі перажывала, бо прыехаў яшчэ адзін мэтавік з Мастоўскага раёна. Выбралі мяне. Чатыры гады вучобы падарылі мне розныя праекты, тэлевізійныя здымкі…

«Цяпер мяне ўсе пазнаюць»

Аліна — аўтар-выканаўца. На верш Вольгі Багдановіч яна напісала музыку да вядомай песні, візіткі айчынных хлебаробаў «Бацькава булка».

— Нарадзілася песня хутка — за тры дні. Ставак на яе не рабіла, — дзеліцца творца. — Пісала для аднайменнага фестывалю ў Свіслачы. Але якім цудам твор пайшоў у народ — застаецца загадкай. І мяне ўсе пазнаюць па гэтай кампазіцыі. Паўсюль кажу, што з’яўляюся голасам гэтага фестывалю. Ён і песня ўжо сталі брэндам.

Аліна Чыжык ездзіла з песняй на тэлешоу «Прывітанне, Андрэй!» да Малахава. Прадстаўляла нашу краіну.

— Тэма праграмы была «Сяброўства народаў». Госці — з розных краін. Кожны са сваімі песнямі і падарункамі. Прыём быў на найвышэйшым узроўні. Расіяне вельмі любяць нашага Прэзідэнта. Беларусь у іх асацыіруецца з добрымі, хлебасольнымі людзьмі. У студыі было цёпла і душэўна. Як пасля казалі рэдактары, гэта была найлепшая праграма за сезон, — з усмешкай успамінае спявачка.

Пасля выхаду перадачы ў эфір Аліну запрасілі выступіць на канцэрце да Дня народнага адзінства ў Расіі. На наступны дзень у TіkTok артыстка ўбачыла вялізную колькасць праглядаў. Фаловеры пакінулі толькі пазітыўныя каментарыі. Суразмоўніца лічыць, што нельга расслабляцца.

— Мае падапечныя ў вакальнай школе-студыі кажуць, што хочуць быць падобнымі да мяне, таму не маю права іх падвесці. Трэ-
ба трымаць марку, — гаворыць яна.

Песні Аліны Чыжык многія маглі чуць па радыё, але не здагадваюцца, хто іх выканаўца. Гэта і «Mі Amor», «Чай сунічны», «Лавілі лета», «З-за яго», «Беларускі Новы год», «Туды, дзе мама чакае», «Лістапад развітальны», «Прастуда». Ёсць восем рэлізаў. Кліпы глядзіце на YouTube. Часта з’яўляецца на каналах Ru.tv, АНТ, БТ, Europa Plus TV Belarus, TNT-Іnternatіonal (Беларусь). Хутка спявачка прадставіць песню, якую прысвяціла Гродне, плануе зняць на яе кліп. Артыстка лічыць: музыка — тое, што павінна выхоўваць. На музыцы людзі растуць, напаўняюцца святлом.

— Стараюся, каб была прыгожая мелодыя, — тлумачыць Аліна. — У трэндзе быць — добра, аднак у той жа час для мяне важна, каб тое, што спяваю, падабалася слухачам.

Дзяўчына заўважыла, што ў маленькіх вёсачках і гарадках артыстаў сустракаюць вельмі шчыра. Ёй запомнілася выступленне ў Мураванскім псіханеўралагічным доме-інтэрнаце для старых і інвалідаў, што на Гродзеншчыне.

— Памятаю, як крычалі «на біс», — згадвае творца. — Гледачы доўга не адпускалі. Мае прыхільнікі нарвалі з клумбы аксамітак. Проста, каб аддзячыць. Такія моманты вельмі шчымлівыя. Для ўразлівых людзей гэта асаблівае свята.

«На маім шляху сустракаюцца добрыя людзі»

Каб усё паспяваць, Аліна трымае дысцыпліну, а галоўнае — верыць у Божую дапамогу. Гэта дае ёй энергію. Як кожны з нас, дзяўчына дазваляе сабе паленавацца, аднак па характары яна чалавек-генератар.

— А батарэйку ж трэба зараджаць (смяецца)! На маім шляху сустракаюцца добрыя людзі, і ўсё само сабой атрымліваецца, — дзеліцца артыстка. — Трэба жыць у гармоніі з сабой, з добрымі думкамі, тады Бог будзе весці цябе ў правільным кірунку.

Спявачка жыве творчасцю. Яна паспявае выкладаць у школе-студыі «Логас» і ад дзяцей напаўняцца чысцінёй і святлом. Галоўны сакрэт нашай гераіні — унутры адчуваць сябе шчаслівай, бо так, па яе меркаванні, можна даўжэй заставацца маладым.

Надзея ЗУЕВА

Фота з уласнага архіва спявачкі

Выбар рэдакцыі

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў. 

Грамадства

Ірына Даўгала: Сям’я для беларусаў застаецца найвышэйшай каштоўнасцю

Ірына Даўгала: Сям’я для беларусаў застаецца найвышэйшай каштоўнасцю

«Сям’я закладвае ў чалавеку мараль, здольнасць спраўляцца з выпрабаваннямі, патэнцыял для развіцця, яна навучае любові, самаахвярнасці, культуры».