Хронікі "Еўра-2016"

Украіна першай сышла з дыстанцыі

Зборная нашых суседзяў стала першай краінай, якая страціла шанцы на выхад у плэй-оф. Даволі моцную і тэхнічную каманду «адчапілі» безвыніковай нічыёй немцы і палякі. А крыху раней украінцы нічога не змаглі зрабіць з брытанскай упартасцю каманды Паўночнай Ірландыі. Іншых кандыдатаў на вылет было шмат, але менавіта Украіна першай пакідае Еўра-2016, прычым ужо пасля другога круга, не забіўшы сапернікам ніводнага гола. Ну, а зборная Паўночнай Ірландыі святкавала сваю першую ў гісторыі чэмпіянатаў Еўропы перамогу.

Сэрца не вытрымала

У час вышэйзгаданага матча адбыўся трагічны выпадак — пасля першага гола футбалістаў Паўночнай Ірландыі прама на стадыёне Ліёна памёр 64-гадовы балельшчык гэтай каманды. Яму стала дрэнна, а ўрачы канстатавалі смерць ад сардэчнага прыступу. У чарговы раз на буйных спаборніцтвах адбыўся такі выпадак, прычым трагічнай можа стаць не дрэнная гульня ці вынік сваёй зборнай, а станоўчая падзея.

Грэнадзёры Еўра-2016

Звычайна самыя высокія спартсмены ў гульнявых відах спорту — гэта баскетбалісты і валейбалісты. Але і сярод футбалістаў хапае фактурных гульцоў, прычым не галкіпераў. Сайт champіonat.com вылучыў дзясятку веліканаў у полі сёлетняга Еўра, якую мы вам і прапануем.

Па 194 сантыметры росту маюць абаронцы англічанін Крыс Смолінг і немец Джонатан Та, паўабаронца бельгіец Маруан Фелаіні, нападаючы італьянец Грацыяна Пеле і польскі абаронца Барташ Саламон. Адыёзны швед Златан Ібрагімавіч (на фота), які ўжо цяпер лічыць сябе легендай футбола, мае ў актыве 195 сантыметраў разам з коскай. На 196 «вымахалі» нападаючыя Марк Янка з каманды Аўстрыі, Арцём Дзюба са зборнай Расіі і ўкраінец Філіп Будкоўскі. Ну і лідарам па вертыкальных «габарытах» на Еўра-2016 стаў украінскі абаронца Яўген Хачарыдзі — яго рост складае 198 сантыметраў.

Здымаў стрэс?

Нападаючы зборнай Румыніі Дэніс Алібек вызначыўся тым, што... курыў у раздзявальні перад сваёй заменай у матчы з французамі! Памочнікі не знайшлі форварда на лаўцы запасных, калі трэнер загадаў ім рыхтаваць яго на замену, а заспелі яго ў раздзявальні за курэннем. Нягледзячы на гэта, футбаліста выпусцілі на поле. Цікава, гэта Алібек так стрэс здымаў, ці з'яўляецца даўнім парушальнікам спартыўнага рэжыму?