Нядбалец сеў макам

Штотыдзень у эфіры тэлеканала «Беларусь 3» віктарына «Размаўляем па-беларуску». Для таго каб стаць яе ўдзельнікамі, неабходна зайсці на сайт tvrgomel.by або 3belarus.by і праз банер «Размаўляем па-беларуску» запоўніць заяўку на каманду з трох чалавек. Ну а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды».

Ці ведалі вы, што:

звя́га (адно са знач.) — надакучлівы брэх сабакі. Воўк сабакі не баіцца, але звягі не любіць;
дру́жка — таварышка нявесты, шаферка;
забарса́ць — працягнуць аборы ў вушкі лапця;
трактава́ць (адно са знач.) — частаваць, абдорваць;
нядба́лец (разм.) — лянівы чалавек;
пля́га — няшчасце, бяда;
даць прыкурыць — 1) моцна насварыцца на каго-небудзь, прабраць; 2) паказаць сябе ў нечым; беларускія сінонімы: даць перцу, намыліць шыю; рускі: задать жару);
сесці макам — 1) пацярпець няўдачу, аказацца ў няёмкім, смешным становішчы; 2) прыйсці да заняпаду (беларусы яшчэ скажуць: сесці ў галош, сесці на бабы, пашыцца ў дурні; рускія: сесть в лужу).