Вы тут

Кацярынін «Карагод»


Дзякуючы Кацярыне Аляксееўне Панчэні і жыхарам вёскі Пагост Жыткавіцкага раёна, на прыпяцкім Палессі захаваўся і працягваецца веснавы абрад «Юр'е» — адзін з самых старажытных у земляробчым календары ўсходнеславянскіх тэрыторый. Менавіта па традыцыі святкаваць «Юр'е» ведаюць у нашай краіне і саму вёску, і яе захавальнікаў — гурт «Міжрэчча» з ягоным нязменным кіраўніком. Восем гадоў таму ў вёсцы паставілі знак у гонар абраду, які ўнесены ў спіс нематэрыяльных культурна-гістарычных каштоўнасцяў.


Кожны год шостага мая мае калегі — фотакарэспандэнты і тэлеаператары з'язджаюцца ў вёску да хаты Кацярыны Аляксееўны, каб здымаць і паказваць надзвычай прыгожае і вясёлае дзейства — «карагод». Падчас свята ў хаце 77-гадовай паляшучкі не было вольнага месца — многія хацелі пабачыць і сфатаграфаваць пачатак абраду — упрыгожванне каравая рознакаляровымі папяровымі і жывымі кветкамі. Пірог-каравай напярэдадні выпекла сама гаспадыня, і называецца ён таксама — «карагод». Пад абрадавую песню: «Карагод, карагод, мы цябе наражаем! Цябе наражаем, Бога праслаўляем!..», жанчыны «прыбіраюць» галоўны атрыбут свята і выбіраюць «ваяводу», які і панясе каравай праз усю вёску. Не першы раз на пасаду ваяводы зноў абралі паважанага ў акрузе чалавека — старшыню Азяранскага сельсавета Міхаіла Аліфіраўца.

І вось «карагод» нясуць у поле, дзе рунее жыта, каб «абрачыся» (даць зарок) перад галоўным апекуном земляробаў, урадлівасці і плоднасці глебы — Юр'ем. Па павер'ях, у гэты дзень святы Юр'я бярэ ў Бога ключы і адмыкае зямлю. «Святы Юрай — божы ключнік», — кажуць на Тураўшчыне і дадаюць: «Адмыкай зямлю, выпускай расу на цёплую зямлю, на буйное жыта!» Удзельнікі праходзяць пад ручніком, сыплюць зерне і бяруцца за рукі — водзяць карагод.

Заключная частка свята — абыход вёскі. Гаспадары выходзяць на вуліцу і чакаюць Кацярынін «карагод». Вясёлае войска на чале з ваяводам абавязкова паспявае пакарагодзіць і гаспадарам — бо гэта шчаслівы знак.

Анатоль Кляшчук, фота аўтара

Выбар рэдакцыі

Культура

Кіно, якога не чакалі — 3. Завяршаем падборку драйвовых беларускіх фільмаў

Кіно, якога не чакалі — 3. Завяршаем падборку драйвовых беларускіх фільмаў

Сфера культуры ярчэй за іншыя паказвае, што калі не працуюць традыцыйныя схемы, прыходзіцца шукаць чорны ўваход. Пошукі часам нараджаюць эксперыменты і выкруты, якія абыходзяць абмежаванні, патэрны і завядзёнку і становяцца найлепшымі знакамі свайго часу. 

Грамадства

Як новыя дасягненні вучоных паляпшаюць якасць жыцця і здароўя чалавека?

Як новыя дасягненні вучоных паляпшаюць якасць жыцця і здароўя чалавека?

Па прагнозах спецыялістаў, не менш як 20 працэнтаў ад аб'ёму тавараў у XXІ стагоддзі будзе за біятэхналогіямі.

Грамадства

Збіраем гардэроб школьніка разам са стылістам

Збіраем гардэроб школьніка разам са стылістам

Пошукі і набыццё «школьнай формы», як па старой звычцы кажуць мамы і таты, — тая яшчэ галаваломка! 

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.