Гэта быў ужо не першы для мяне семінар маладых пісьменнікаў у Каралішчавічах. За час, што прайшоў з папярэдняга, у мяне з’явіліся першыя публікацыі ў рэспубліканскім друку, і я стаў падумваць пра выданне ўласнай кнігі.
Ды і каралішчавіцкія сосны і ўтульны пісьменніцкі дом былі як вяртанне ў родную і чаканую атмасферу.
Сярод удзельнікаў семінара ўвагу прыцягвала дружная кампанія філфакаўцаў БДУ, дзе прыкметна выдзяляліся пышнавалосы з пшанічнымі вусамі Алесь Пісьмянкоў і невысокі, худзенькі, у вялізных акулярах Мікола Мятліцкі. У гэтага хлапца быў густы басавіты голас, ён упэўнена і актыўна ўдзельнічаў ва ўсіх абмеркаваннях, і адчувалася, што ён лічыць сябе не нясмелым пачаткоўцам, а паўнацэнным удзельнікам літаратурнага працэсу.
Што і пацвердзілася, калі пасля абмеркавання маіх вершаў ён падышоў і пачаў размову з фразы:
— Як паэт я цябе разумею...
Гэтага «як паэт» я не мог тады сабе дазволіць, хоць па ўзросце быў старэйшы, ды і доўгі час пасля не рашаўся называць сябе такім высокім словам.
Ужо тады было відаць, што Мікола лічыць літаратуру сваім жыццём і лёсам і свой выбар ён зрабіў канчаткова.
Другая наша сустрэча адбылася ў Наваполацку.
Я працаваў тады рэдактарам радыёвяшчання на вытворчым аб’яднанні «Палімір», а Мікола прыехаў у камандзіроўку ад газеты «Літаратура і мастацтва», куды яго ўзялі адразу пасля ўніверсітэта.
Сталічны госць рыхтаваў матэрыял для свайго выдання, а я, як гасцінны гаспадар, запрасіў яго да нас дадому на святочны абед. У гэты час у госці прыехала мая цешча з Палесся, і мне хацелася пазнаёміць яе з земляком.
«О, гэтае хлапчаня ўжо вялікі начальнік?» — здзівілася мая Зося Паўлаўна.
А Мікола паводзіў сябе як заўсёды нязмушана і ўпэўнена, хваліў прыгатаваныя Мар’яй Іванаўнай бульбяныя клёцкі, распытваў маю палескую цешчу пра вясковае жыццё.
Пасля мы доўга не бачыліся. У Міколы выходзілі кнігі, яго хвалілі крытыкі, а я быў далёкі ад сталічных літаратурных колаў, шмат часу аддаваў працы ўласнага карэспандэнта радыё.
Пасля пераезду ў Мінск лёс нечакана прывёў мяне пасля нядоўгай працы ў «Вожыку» ў самы вір літаратурнага жыцця — мяне абралі намеснікам старшыні Саюза пісьменнікаў, я пасябраваў з Алесем Пісьмянковым, з’явілася новае кола калег і сяброў.
З Міколам Мятліцкім мы не сказаць, каб адразу зблізіліся. Ён ужо меў сваю вагу, больш сябраваў са старэйшымі мэтрамі, яго называў сваім паплечнікам сам Іван Пятровіч Шамякін.
Часцей сталі сустракацца ў кабінеце Алеся Пісьмянкова, калі Мікола заходзіў пагаварыць «да Сашы». Яны разам успаміналі сумесныя паездкі на рыбалку, разважалі і пра літаратуру. Стаўленне Мятліцкага да многіх падзей было важкім і грунтоўным. Ён ужо тады адчуваў сваю адказнасць, свой абавязак літаратара, быў не па гадах салідным, нібыта старэйшы за нас нашмат. Хаця часам у ім прачынаўся малады Мікола з уласцівым толькі яму гумарам.
У пісьменніцкім асяроддзі не ўсе адназначна прынялі прызначэнне яго галоўным рэдактарам часопіса «Полымя». Але Мікола ўзяўся за справу з пачуццём пераемнасці слаўных імёнаў папярэднікаў на гэтай пасадзе. І хоць узнікала нямала праблем у складаныя часы і з падпіскай, і з напаўненнем рэдакцыйнага партфеля, Мятліцкі не апускаў планку літаратурнага ўзроўню выдання. У той час з ім працавалі Віктар Праўдзін, Алесь Наварыч, Уладзімір Марук, Уладзімір Саламаха, Анатоль Зэкаў, Вадзім Спрынчан, Алесь Марціновіч — вядомыя творцы і вопытныя рэдактары.
Мне як члену рэдкалегіі не раз даводзілася прысутнічаць на абмеркаванні планаў і аналізе надрукаванага на старонках часопіса, і я бачыў шчырую зацікаўленасць галоўнага рэдактара ў тым, каб часопіс працягваў слаўныя традыцыі «палымянцаў».
Што да традыцый, Мікола ўсур’ёз адчуваў сябе прадаўжальнікам вялікіх папярэднікаў і не раз гаварыў пра гэта.
— Ведаеш, Навум, на нашы плечы кладзецца ўвесь цяжар адказнасці за нашу літаратуру, за тое, што пакінулі нам Мележ, Шамякін, Броўка.
Ён не раз прамаўляў мне гэта пры сустрэчах, і ў яго словах не было найгранасці ці лішняга пафасу. Ён так лічыў, і тое, што многім магло падацца надта высакапарным, для яго было натуральна, як назваць сябе «дзяжурным па планеце».
Яшчэ адна цікавая акалічнасць. Калі ён палічыў, што ў нечым мяне абышлі, не памятаю нават, тычылася гэта прэмій ці ўзнагарод, то на поўным сур’ёзе ў прысутнасці калег дэклараваў:
— Я гатовы адмовіцца ад сваёй узнагароды, мне хопіць, на карысць Навума.
Дзякуй Богу, не спатрэбілася, ды і я на такое не пагадзіўся б, але гэта ў многім характарызавала Міколу.
Затое ён быў рады, што мне прысвоілі званне «Заслужаны дзеяч культуры».
— Ёсць пра што пагаварыць абодвум заслужаным, — сказаў ён мне, калі я чарговы раз запрашаў на сваю праграму «Суразмоўцы».
Дарэчы, ён адзін з нямногіх маіх суразмоўцаў, які быў у гэтай праграме другі раз.
Мікола сышоў з жыцця нечакана, ды і ці бывае чаканым сыход блізкага чалавека.
Расказваюць, што ён жартаваў у апошнія дні ў бальніцы.
Заўсёды сур’ёзны, адказны, але многія ведаюць яго як вясёлага, з добрым гумарам чалавека.
Ён выканаў сваё прызначэнне на зямлі, застаўся для нас паэтам, беларусам, «дзяжурным па планеце».
Навум ГАЛЬПЯРОВІЧ
Фота Кастуся ДРОБАВА
***
Утаймуйцеся, сілы чорныя,
Разбуральныя, патаемныя,
Агрэсіўныя, чужатворныя,
Чужародныя і нядрэмныя!
Сілы — крылы спакусы хіжае,
Нішчыць край і люд свой гатовыя...
Беларусь мая, веру, выжыве,
Як не раз было ў дні суровыя.
Утаймуйцеся, сілы чорныя,
Чужародныя, чужатворныя!
1.12.2020
***
Пад сонечнай каронай залатой
Ужо стагоддзі сталі на пастой,
І на адной з сагрэтых ёй планет
Жыцця успыхнуў зыркі першацвет,
І праз таемна збеглыя гады
І ты, і я з’явіліся сюды.
У каралеўстве зорнага святла
Зямля і нам наш час быцця дала,
І крочым мы сваёй зямной вярстой
Пад сонечнай каронай залатой.
9.08.2021
***
Рослыя вязы ў абхоп
Усталі на вуліцы той,
Дзе радасць бруіла ўзахлёб,
Дзе пыл аж курэў пад пятой,
Дзе пах за платамі кроп...
Вязы...
І Час-далакоп...
10.07.2021
Лімавец
Ён гадамі глядзеў на прыступкі «Ін’яза»,
Упіваўся дзявочай красой, як нямногія.
Ўсё грымяць і грымяць прыгажуняў абцасы,
Ўсё ідуць і ідуць прад вачмі, даўганогія!
Пазірае з акна, што між кроністых дрэў,
На няспынны іх цуг ад вясны да вясны.
Ён не бачыць таго: сам даўно пастарэў,
Ды нязменна (гады!) юнь-пяшчота — яны.
6.03.2021
***
За далёкія пагоркі
Адступіўся вечар сіні,
Дружна выбліснулі зоркі
Ў неба чорнага пустыні.
Павялі свае гаворкі
У заселеным сусвеце.
Не яны, для іх мы — зоркі,
Кожны — зырка сэрцам свеціць!
17.07.2021
***
230 мільёнаў гадоў кракадзілу,
60 мільёнаў гадоў кіту,
50 мільёнаў гадоў слану...
3 мільёны гадоў — усяго! — чалавеку.
І ён, малалетка эвалюцыйны,
Ужо столькі ўправіўся на зямлі
Жахот натварыць...
19.07.2021
***
На дзялянцы памяці маёй,
Дзе сякера часу пахадзіла,
Як няшмат дрэў стойкіх ацалела —
Дзён прасветлых, спеўных, шумналістых.
Колькі іх, пакладзеных, лягло
Пад драпежным чорным ураганам,
Што над краем ноччу прашугаў...
Грознае імя ў яго — Чарнобыль!
Скуты чорнай мёртвасцю прагал
Утварыўся на душы збалелай.
Шмат гадоў імкнуўся — і не змог
Памяць прасвяціць высокім сонцам.
23.08.2021
***
Стала няўстойлівай
псіхіка чалавечая,
Усё болей і болей тых,
хто на мяжы вар’яцтва.
За спінай грыміць
стагоддзяў галоснае веча,
Просіць нас
людзьмі заставацца
У век разбэшчана-разняволены,
Дзе звыкла мільгае
азадак аголены.
17.07.2021
***
Зноўку ваеншчына мускуламі грае.
Гуртуецца зноўку варожая зграя.
Зноўку шалее Еўропа старая...
Зноў дзесь у бункеры ляжыць план сакрэтны.
Зноўку паўкроку да Трэцяй сусветнай...
26.07.2021
Ведайце
Вы, чые душы дробязней цэнта,
Хто водзіць заўсёдна са смерцю гульню,
Ведайце: краіны сваёй прэзідэнта
Ад кулі грудзьмі я засланю.
Мільёнаў маіх суайчыннікаў грудзі
Стануць побач надзейнай бранёй.
І вы, нелюдзі, а не людзі,
Самі патонеце ў чорным брудзе,
Спароджаным вашай крывавай разнёй.
17.04.2021
Маладым суайчыннікам
Вы на руінах колішняй вайны
Як кветкі ўсталі ў сонцы і раскошы.
І галасы залівіста чутны,
І кожны — белабрысы і харошы.
Вам хочацца хутчэй нырнуць у свет,
Прыняць яго штодзённыя спакусы.
Ды ён, паверце, ўсё ж не раснацвет,
О, юныя шчасліўцы беларусы!
І тыя, што прыстойныя на від,
Хто сёння — і саліднасць, і пакора,
Учора тут чынілі генацыд,
Хадзілі ўсцяж з нагайкамі заўчора.
Якой іх лютасць хіжаю была,
Якой была іх азвярэлай вера,
Няхай вам скажуць мёртвая Ала
І ад крыві дзяцей Чырвоны Бераг.
Якім быў іхняй жорсткасці вянец,
Сюды ішлі яны з якою ласкай,
Няхай вам скажа скрушны Трасцянец
З крыві прарослай сёння кожнай краскай.
Званамі скажа сцёртая Хатынь,
Што скаланае чуйна неба высі...
Астынь, душа бадзяжная, астынь,
Прыстань хоць на хвіліну, азірніся!
Не стань прадажнай! — ты патрэбна тым,
Хто ўмее вабіць так зазыўна ў сеткі,
Каб над Айчынай зноў узвіўся дым
І зноў крывёю набрынялі кветкі.
Вы, дзеці шматпакутнае зямлі,
Каго яна ад згубы ўратавала,
Каго шчасліва ў цемя цалавала,
Каб жыць па-чалавечы тут маглі.
6.08.2021
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».