Выйшла кніга мастацка-дакументальных навел «Судьбой повенчаны с границей»

У цэнтры адпачынку і вольнага часу органаў пагранічнай службы Рэспублікі Беларусь адбылося адметнае свята кнігі. І гэтаму была яркая нагода. У выдавецтве «Адукацыя і выхаванне» выйшла кніга мастацка-дакументальных навел «Судьбой повенчаны с границей». Яе аўтар — пісьменнік, ветэран органаў пагранічнай службы, палкоўнік у адстаўцы Леанід Крыванос. Выданне прысвечана сённяшнім абаронцам беларускай граніцы, тым хто праявіў высокі прафесіяналізм і мужнасць, выконваючы задачы па забеспячэнні пагранічнай бяспекі дзяржавы.

Старшыня Дзяржаўнага пагранічнага камітэта генерал-маёр Канстанцін Моластаў уручыў падарункавыя экзэмпляры выдання героям кнігі, якія прыехалі ў сталіцу з самых аддаленых куткоў Беларусі. Сярод іх — і тыя, хто ўжо ў адстаўцы, і тыя, хто працягвае выконваць службовыя абавязкі. Кіраўнік пагранкамітэта звярнуў увагу прысутных на тое, што «служба па ахове дзяржаўнай граніцы ніколі не была лёгкай і спакойнай, заўсёды давала пагранічнікам магчымасць праявіць мужнасць і гераізм, даказаць самаадданую любоў да Радзімы». Канстанцін Генадзьевіч таксама адзначыў, што змест кнігі «Судьбой повенчаны с границей» — гэта зацверджаны ў беларускай літаратуры прыклад служэння Айчыне, яе народу. Кіраўнік ведамства ўручыў аўтару кнігі Падзяку Старшыні Дзяржаўнага пагранічнага камітэта Рэспублікі Беларусь за плённую сумесную дзейнасць з органамі пагранічнай службы, аказанне дапамогі ў выкананні задач, ускладзеных на органы пагранічнай службы, па правядзенні дзяржаўнай пагранічнай палітыкі.

У сваю чаргу Леанід Крыванос адзначыў, што сярод тых, хто сёння дастойна носіць зялёную фуражку, шмат жанчын — своеасаблівая даніна часу. Але гэта ніколькі не ўплывае на надзейнасць пагранічнай службы. Аўтар пажадаў героям навел і ўсім прысутным поспехаў у ратнай працы, міру і дабрабыту. А таксама паабяцаў, што будуць напісаны новыя творы на тэму граніцы.

Пасля ўрачыстай часткі адбыўся канцэрт ансамбля пагранічнай службы, дзе гучалі музычныя творы на словы Л. Крываноса.

Рагнед МАЛАХОЎСКІ