Анатоль Бензярук прэзентаваў новую кнігу напапярэдадні Міжнароднага дня памяці ахвяр генацыду

У Брэсцкай абласной бібліятэцы імя Максіма Горкага адбылася прэзентацыя дакументальнай аповесці-эсэ Анатоля Бензярука «Галавасек». Твор прысвечаны вогненнай вёсцы Драмлёва і яе 183 жыхарам, спаленым 11 верасня 1942 года. 

Імпрэза ў Брэсце ладзілася напярэдадні Міжнароднага дня памяці ахвяр генацыду. Менавіта памяці і шанаванню нявінных мірных людзей, знішчаных нелюдзямі, прысвечана дакументальная аповесць-эсэ «Галавасек», напісаная членам Саюза пісьменнікаў Беларусі жабінкаўцам Анатолем Бензяруком, якая пабачыла свет у Выдавецкім доме «Звязда». 

На сустрэчу з аўтарам кнігі, што стала няпростым спатканнем з суровай праўдай ваенных часоў, завіталі сябры творчай абласной суполкі Саюза пісьменнікаў Беларусі пад кіраўніцтвам Таццяны Дземідровіч, а таксама прадстаўнікі абласной заканадаўчай і выканаўчай уладаў, студэнты філалагічнага і гістарычнага факультэтаў Брэсцкага дзяржаўнага ўніверсітэта імя А. С. Пушкіна, шматлікія чытачы, каго кранае да глыбіні душы тэма генацыду беларускага народа. 

Прэзентацыю, арганізаваную найперш намаганнямі дырэктара абласной бібліятекі Алены Стрыжэвіч і яе намесніка Ларысы Верамчук, вяла Тамара Глазкова. 

На мерапрыемстве выступілі намеснік старшыні Брэсцкага абласнога Савета дэпутатаў Валянціна Пух і загадчык аддзела па каардынацыі дзейнасці ўстаноў культуры ўпраўлення культуры аблвыканкама Лілія Свідуновіч, іншыя неабыякавыя асобы, якія ўжо паспелі пазнаёміцца са зместам новай кнігі Анатоля Расціслававіча. Асабліва праніклівыя словы ў адрас вялікай працы, выкананай аўтарам, выказала Лідзія Касачук — кіраўнік літаратурнага клуба «Літара», які дзейнічае ў горадзе над Бугам пры мясцовым Доме культуры.

Студэнт-гісторык Мікіта Сталяроў запэўніў: аголены нерв мінулай трагедыі баліць і сёння, бо ў кожнай беларускай сям’і ніколі не забудуцца пра перажытае людзьмі ваеннага пакалення.

Увогуле, лёс Драмлёва і іншых вёсак, знішчаных карнікамі на палескай зямлі, настолькі кранальны, што ва ўсіх, хто браў мікрафон, адчувалася моцнае хваляванне і пасля першых слоў з’яўляліся на вачах слёзы, не стрымлівалі сябе нават мужчыны...

«Галавасек» — 13-я кніга Анатоля Бензярука. Аўтар распавёў, як няпроста, нават пакутліва на працягу цэлага дзесяцігоддзя стваралася кніга пра страшныя падзеі ў вогненнай вёсцы. Дзеля пошуку нялёгкай праўды давялося шмат папрацаваць у архівах, найперш Брэста і Мінска, занатаваць успаміны людзей, што бачылі на ўласныя вочы тую бяду. 

У межах мерапрыемства абдылася і прэзентацыя штотыднёвіка «Літаратура і мастацтва». Выданне прадставіў яго галоўны рэдактар, намеснік старшыні Саюза пісьменнікаў Беларусі Аляксей Чарота.

Антон ПРАТАСЮК 

Фота даслана Брэсцкай абласной бібліятэкай імя Максіма Горкага