РСЗА «Паланэз-М» з’яўляецца ўдасканаленай версіяй таго комплексу, які ўжо стаіць на ўзбраенні беларускай арміі. Асноўныя тактыка-тэхнічныя характарыстыкі РСЗА «Паланэз-М» палепшаны ў параўнанні з папярэднікам і дазваляюць адначасова нанесці з высокай дакладнасцю ўдар па васьмі цэлях на далёкасці да 300 кіламетраў. Гэта могуць быць камандныя пункты, арсеналы з боепрыпасамі, назапашванне тэхнікі і засяроджванне жывой сілы.
РСЗА «Паланэз-М» адпавядае найлепшым сусветным узорам сістэм рэактыўнай артылерыі. Многія тэхнічныя рашэнні, рэалізаваныя беларускімі распрацоўшчыкамі, не маюць аналагаў у свеце. Прыняцце новых узораў узбраення з’яўляецца адным з элементаў стратэгічнага стрымлівання.
Як адзначыў начальнік Генеральнага штаба Узброеных Сіл — першы намеснік міністра абароны генерал-маёр Віктар Гулевіч, з паступленнем найноўшага комплексу «Паланэз-М» абараназдольнасць дзяржавы толькі павялічыцца. «Кіраўніцтвам нашай дзяржавы надаецца вялікая ўвага развіццю ракетных войскаў і артылерыі, — падкрэсліў ён. — Гэты працэс праходзіць з улікам стараннага вывучэння баявога досведу ваюючых войскаў».
Начальнік Генштаба нагадаў, што сем гадоў таму на ўзбраенне рэактыўнай артылерыйскай брыгады паступіла прынцыпова новая для Узброеных Сіл Беларусі рэактыўная сістэма залпавага агню В-200 «Паланэз», распрацаваная на прадпрыемствах абароннага сектара нашай краіны. «За мінулы перыяд гэты тып РСЗА быў паспяхова асвоены асабовым складам асобнага рэактыўнага артылерыйскага дывізіёна, — паведаміў Віктар Гулевіч. — У гэты дзень адбываецца чарговая знамянальная падзея ў жыцці воінскага калектыву брыгады — уручэнне новай рэактыўнай сістэмы залпавага агню В-300 „Паланэз-М“. Валодаючы палепшанымі баявымі магчымасцямі, комплекс дазваляе наносіць высокадакладны ракетны ўдар на далёкасці да 300 кіламетраў і па некаторых параметрах не мае аналага ў свеце».
Першы намеснік мністра абароны выказаў удзячнасць калектывам прадпрыемстваў Дзяржаўнага ваенна-прамысловага камітэта за значны ўклад у развіццё і мадэрнізацыю ўзораў узбраення ракетных войскаў і артылерыі, актыўнага ўдзелу ва ўмацаванні абараназдольнасці Рэспублікі Беларусь, павіншаваў асабовы склад брыгады з атрыманнем новага комплексу. «Упэўнены, што вайскоўцы дывізіёна працягнуць годна падтрымліваць слаўныя баявыя традыцыі воінаў-ракетчыкаў і памнажаць славу старэйшых пакаленняў», — рэзюмаваў Віктар Гулевіч.
Алег НЯКАЛА
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
