Вы тут

Слаўгарад святкуе дзень нараджэння


Увесь цэнтр гэтага горада Магілёўскай вобласці пераўтварыўся ў вялікую святочную пляцоўку. Тут працуюць падворкі ад сельсаветаў, праходзяць выставы, круцяцца атракцыёны, выступаюць творчыя калектывы.


— Мы дэманструем, якая багатая ў нас гісторыя і якія цікавыя і заслужаныя людзі нарадзіліся на гэтай зямлі, — звяртае ўвагу на стэнды з кнігамі і фотаздымкамі бібліятэкар Слаўгарадскай цэнтральнай бібліятэкі Вольга Храмянкова.— Сярод іх нашы ўраджэнцы — археолаг і мовазнаўца Іван Грыгаровіч, кампазітар, аўтар гімна Расійскай імперыі «Гром Перамогі раздавайся» Восіп Казлоўскі, архітэктар і мастак Аляксандр Гоманаў. Слаўгарадчына ганарыцца сваімі працаўнікамі, шасцера з якіх сталі Героямі Сацыялістычнай працы.

Падворкі ад сельсаветаў радуюць вока шырокай разнастайнасцю ручнікоў, саматканых дыванкоў і іншых прадметаў народнай творчасці. Якая ж багатая на Слаўгарадчыне культурная спадчына. Гаспадары апрануліся ў народныя касцюмы і сустракалі гасцей вясёлымі прыпеўкамі і смачнымі стравамі. 

Слаўгарадскія сыравары як заўсёды былі на вышыні. Дэманстравалі шырокі выбар дамашніх сыроў на любы густ. На прылаўку спажывецкага кааператыва «Гіжэнскі аграрый» якіх толькі сыроў не было — і салодкія, і салёныя, і вострыя, і прэсныя, і цвёрдыя, і мяккія, і тварожыя. А найменняў столькі, што можна з ліку збіцца. Усе сыры без выключэння смачныя. Агульнымі намаганнямі сыравары прадалі сёння каля 50 кілаграмаў! Галіна Таранава спецыялізуецца на казіным сыры. На гэты раз зрабіла яшчэ і вэнджаны з папрыкай. Уладзіслаў Паланюк — майстар па вытворчасці абхазскіх сыроў, прапаноўваў шэсць найменняў. А сыравар Наталля прыгатавала да свята свой фірменны казахскі сыр –курт на слаўгарадскі лад — у адрозненне ад арыгінальнага ён не такі салёны.

У Алены Вараб'ёвай з Рудні вытворчасць сыроў — сямейны бізнес. Сама жанчына сыравар з дзесяцігадовым стажам. Чацвёра яе дзяцей ужо дарослыя, але дочкі прыехалі, каб дапамагчы рэалізаваць смакату. Прызналася, што свята атрымалася цудоўнае. І попыт на сыры быў высокі. 

Весела было на спартыўнай пляцоўцы, дзе запрашалі згуляць у шахматы, настольны футбол і наогул ацаніць турыстычны патэнцыял раёна. Вячаслаў Гутараў з Васькавіч, з якім пазнаёміліся за шахматнай дошкай, прызнаўся, што свята яму спадабалася. «Было б цудоўна, каб так весела было ў горадзе кожны дзень,» — выказаў ён пажаданне. 

Прыхільнікаў футбола сёння сабраў на гарадскім стадыёне матч паміж ФК  "Слаўгарад" і ФК «Клімавічы», які адбыўся ў рамках Чэмпіяната Рэспублікі Беларусь сярод мужчынскіх каманд другой лігі.

Ну, а песень і танцаў на свяце столькі, што ногі самі просяцца ў пляс. Падтрымаць сваіх калег і партнёраў прыехалі госці з Бранска, Магілёўскай і Гомельскай абласцей. Пад песні бойка ідзе гандаль. За чавускімі шашлыкамі выбудоўваюцца чэргі. Хлебасольнае свята працягнецца да позняга вечара і скончыцца ўрачыстым салютам. З 20.00 да 23.00 для жыхароў і гасцей горада адбудзецца танцавальна-забаўляльная праграма.

Нэлі ЗІГУЛЯ

Фота аўтара

Слаўгарад

Выбар рэдакцыі

Здароўе

Сезон грыпу чакаецца ў студзені — сакавіку. Эпідэміёлаг расказаў, як і калі лепш прышчапіцца

Сезон грыпу чакаецца ў студзені — сакавіку. Эпідэміёлаг расказаў, як і калі лепш прышчапіцца

З пачаткам навучальнага года рэгіструецца і рост захваральнасці на рэспіраторныя інфекцыі.

Жыллё

Кватэры разыходзяцца як гарачыя піражкі. 2023 год можа стаць сапраўды рэкордным

Кватэры разыходзяцца як гарачыя піражкі. 2023 год можа стаць сапраўды рэкордным

Як адзначаюць фінансавыя эксперты, рынак жылой нерухомасці выйшаў на беспрэцэдэнтна высокія паказчыкі па колькасці здзелак.

Культура

Кірыл Халецкі: «Мой дэбют адкрые магчымасці  для іншых маладых кінематаграфістаў»

Кірыл Халецкі: «Мой дэбют адкрые магчымасці для іншых маладых кінематаграфістаў»

З рэжысёрам «Кіношнікаў» — наша размова пра мары і іх увасабленне ў рэальнасць.

Культура

Як пакажуць мінулае ў кінастужцы «На другім беразе»

Як пакажуць мінулае ў кінастужцы «На другім беразе»

Хто здолее змяніць гісторыю ці змяніцца пад яе ўплывам?