Часам садоўнік ці агароднік пачынае скардзіцца, якая цяжкая яго доля, менавіта калі падыходзіць час перакопкі ўчастка. І сапраўды, такая работа далёка не кожнаму па сілах, але ці можна без яе абысціся? Ці можна не перакопваць участак?
1. Пачнём з такога мінуса перакопкі, як тое, што яна можа прывесці да гібелі чарвякоў у глебе. Насамрэч гэта не выдумка. Перакопваючы глебу позняй восенню, мы разбураем жыллё чарвякоў, якія ўладкаваліся там на зімоўку. Ды тут ёсць адно вялікае «але»: перакопка, можа, і прыводзіць да гібелі і шкоднікаў, напрыклад, драцянікаў і падобных, але калі шкоднікаў у вас у глебе няма і вы ў гэтым упэўненыя, то лепш адкласці перакопку на вясну, даўшы чарвякам спакойна перазімаваць.
2. Ці можа перакопка глебы разбурыць яе структуру? Здзівіцеся, але так. І калі ўжо асцерагаецеся за цэласнасць глебы, то аптымальны варыянт — пад перакопку ўнесці, скажам, гной, закапаць сідэраты, унесці перагной ці кампост.
3. Яшчэ адна прычына не капаць глебу — фактычная закладка насення пустазелля ў грунт. У гэтым ёсць рацыя, бо калі на ўчастку пустазеллю ўдалося вырасціць насенне і раскідаць яго па паверхні, то з дапамогай перакопкі мы тое насенне ўнясём у грунт, створым насенны запас для пустазелля на доўгія гады.
Вясновая ж перакопка толькі змешвае гэтае насенне ў глебе, нейкае ідзе глыбей, а нейкае вышэй і тут жа прарастае дружна, шчоткай. Калі ж апрацаваць глебу павярхоўна, вялікая верагоднасць, што насенне загіне ўзімку, калі мароз ударыць па не накрытай снегам глебе.
4. Перакопка агаляе глебу. Па вялікім рахунку, і ў гэтым выказванні ёсць доля праўды. Ці заўважалі вы, як пасля перакопкі грунт дружна зарастае пустазельнай расліннасцю? А калі глебу, скажам, апрацаваць пласкарэзам, затым можна адразу замульчыраваць яе той жа саломай, пілавіннем і чымсьці падобным, і тая мульча спрытна затармозіць рост пустазелля.
5. Яшчэ адно меркаванне — перакопка разбурае пласт перагною. Яна яго літаральна размазвае, размяркоўвае па паверхні глебы, мінералізуе, а гэта можа ў перспектыве прывесці да збяднення глебы. Аднак толькі ў тым выпадку, калі вы яе зусім не падкормліваеце арганічнымі ўгнаеннямі.
Такім чынам, рэзюмуем: капаць ці не? Вырашаць вам. Напрыклад, многія аддаюць перавагу не лапаце, а пласкарэзу. Яго мінус у тым, што ён не для цаліны, аднак на апрацаванай глебе выдатна замяняе рыдлёўку. Акрамя таго, сёння створаны і прадаюцца палольнікі; чым яны вастрэйшыя, тым лепш, яны куды зручней рыдлёўкі і сіл патрабуюць мінімум.
Ірына ТАМКОВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
