Свята дзіцячай кнігі прайшло ў Мінску

10 верасня, падчас святкавання Дня горада Мінска, на пляцоўцы каля Нацыянальнай бібліятэкі Беларусі па ініцыятыве Саюза пісьменнікаў Беларусі адбылося Свята дзіцячай кнігі пад назвай «У гасцях у Францыска Скарыны».

Мерапрыемства стала своеасаблівым аглядам творчых сіл Саюза пісьменнікаў Беларусі, якія задзейнічаны ў стварэнні кніг для юнага чытача. Менавіта гэты жанр сучаснай літаратуры развіваецца найбольш дынамічна, з выкарыстаннем навацый у далучэнні шырокай аўдыторыі да чытання.

Сваю творчасць прадставілі: Міхась Пазнякоў, Мікола Чарняўскі, Уладзімір Мазго, Генадзь Аўласенка, Ніна Галіноўская. Да іх далучыліся дзіцячыя пісьменнікі з усіх рэгіёнаў Беларусі.

На галоўнай пляцоўцы свята гучалі вершы на беларускай і рускай мовах не толькі з вуснаў прафесійных пісьменнікаў і паэтаў, але і юных удзельнікаў Тэатра паэзіі Мінскага гарадскога аддзялення Саюза пісьменнікаў Беларусі.

Чароўная кніжная фея, аўтар шматлікіх кніг для дзяцей Кацярына Хадасевіч-Лісавая запрасіла ўсіх удзельнікаў мерапрыемства на сустрэчу з аўтарамі, на якіх прадстаўлена магчымасць набыць кнігі з аўтографамі пісьменнікаў.

— Дзень горада Мінска, сэрца нашай Радзімы, дарагі для ўсіх нас. Мне давялося быць у многіх краінах, мець зносіны з многімі людзьмі, і ўсё без выключэння захапляюцца нашым выдатным горадам. Я ганаруся тым, што мая творчасць дапамагае юным жыхарам Мінска, Беларусі станавіцца разумнейшымі, дабрэйшымі і расці сапраўднымі патрыётамі, вартымі грамадзянамі нашай краіны. У нашай арганізацыі больш за трыста пісьменнікаў, у Мінску створана каля сарака клубаў, студый, літаратурных аб’яднанняў. Мы праводзім штогод да васьмі тысяч літаратурных сустрэч, выдаём сто — сто дваццаць новых кніг. Дзень горада Мінска — гэта і наша свята, — распавёў старшыня Мінскага гарадскога аддзялення Саюза пісьменнікаў Беларусі вядомы паэт, празаік Міхась Пазнякоў.