Вы тут

У Гродне ў адмысловай лабараторыі ткацтва робяць эксклюзіўны габелен з выявай самой маці Беларусі


Незвычайны рукатворны падарунак землякам у гонар святкавання 75-годдзя Перамогі ў Вялікай Айчыннай вайне рыхтуюць у Гродзенскім абласным метадычным цэнтры народнай творчасці. Тут у адмысловай лабараторыі ткацтва робяць эксклюзіўны габелен з выявай... самой маці Беларусі.


Аўтар эскіза сімвалічнага габелена — кандыдат мастацтвазнаўства, прафесар кафедры гісторыі і тэорыі мастацтваў Беларускай дзяржаўнай акадэміі мастацтваў Яўген Шунейка. Менавіта ён сумясціў у адной карціне і замалёўкі з мінулага, і адвечныя сімвалы, і элементы традыцыйнага арнаменту, і сучасныя краявіды. У цэнтры кампазіцыі, абрамленай традыцыйным арнаментам, мастак змясціў вобраз маці Беларусі, у ніжняй частцы габелена будуць знаходзіцца замалёўкі ваенных гадоў, у сярэдзіне — будні гараджан і сельскіх жыхароў, наверсе — пазнавальныя панарамы беларускіх гарадоў. Над стварэннем шматколернага палатна памерам 1,5 на 2 метры працуе родная сястра Яўгена Феліксавіча, метадыст абласнога метадычнага цэнтра народнай творчасці, майстар габеленаў Алена Шунейка. Любоў да народнай творчасці ў іх сямейная — перайшла ў спадчыну ад бацькі, вядомага гродзенскага мастака-тэкстыльшчыка і даследчыка Фелікса Шунейкі.

Ужо на працягу амаль 40 гадоў Алена Шунейка працягвае бацькаву справу: натхнёна працуе за ўнікальным станком — вертыкальнымі кроснамі, якія не маюць аналагаў у краіне. Ды і сама тэхніка ткацкага рамяства, якой валодае гродзенская майстрыха, адзіная ў сваім родзе, бо працягвае традыцыі так званага падвойнага і пераборнага аднабаковага ткацтва («закладання»). Гэты элемент нематэрыяльнай культурнай спадчыны Гродзеншчыны, дарэчы, восем гадоў таму папоўніў Дзяржаўны спіс гісторыка-культурных каштоўнасцяў Беларусі. У творчай скарбонцы ткачыхі — шэраг арыгінальных сюжэтна-тэматычных габеленавых кампазіцый з выявамі помнікаў архітэктуры, рэлігійнымі, гістарычнымі сюжэтамі, у якіх традыцыйныя ўзоры ў прамым і пераносным сэнсе пераплеценыя з уласным аўтарскім стылем.

Алене Шунейка дапамагае ў рэалізацыі новай задумы калега і пераемніца ткацкага рамяства Юлія Барадзіна — малады метадыст прызнаецца, што загадзя прадчувае радасць і захапленне ад канчатковага выніку працы «ў чатыры рукі».

«Безумоўна, гэта вялікі і складаны творчы працэс, праца не аднаго дня і нават не аднаго месяца, — расказала «Звяздзе» загадчык аддзела традыцыйнай культуры Гродзенскага абласнога метадычнага цэнтра народнай творчасці Вольга Шлавянец. — Калі б над ім працаваў толькі адзін майстар, праект доўжыўся б каля года, але паколькі праца ідзе ў чатыры рукі, спадзяёмся, што вынік зможам прадставіць жыхарам і гасцям Гродна калі не ў маі, да Дня Перамогі, то напярэдадні Дня Незалежнасці 3 ліпеня. Пакуль яшчэ прапрацоўваецца пытанне, дзе будзе выстаўлены габелен — магчыма, у нас у цэнтры, а магчыма, ён будзе перададзены ў падарунак аднаму з музеяў».

Творчая група ўжо прадумала дэталі аб'ёмнай работы, падабрала патрэбныя колеры і літаральна днямі заклала першую нітку ў станок. Але будучая «тканая акварэль» пакуль безназоўная, таму абвешчаны конкурс на лепшую назву габелена. Прапановы прымаюцца да 9 сакавіка на электронную паштовую скрыню оnmсnt@tut.bу з пазнакай «габелен» і ў сацыяльных сетках. А сачыць за пакрокавым стварэннем рукатворнага цуду можна на афіцыйным сайце цэнтра і ў сацыяльных сетках УКантакце і Instagram.

Вікторыя ЗАХАРАВА

Фота Гродзенскага АМЦНТ

Загаловак у газеце: Звязаныя адной музай

Выбар рэдакцыі

Грамадства

Нацыянальная акадэмія навук ініцыюе стварэнне народнага летапісу Вялікай Айчыннай вайны

Нацыянальная акадэмія навук ініцыюе стварэнне народнага летапісу Вялікай Айчыннай вайны

Навукоўцы звяртаюцца да кіраўніцтва абласных і раённых выканаўчых камітэтаў, устаноў адукацыі і культуры, грамадскіх арганізацый, усіх зацікаўленых грамадзян з просьбай разгарнуць работу па зборы ўспамінаў і фатаграфій удзельнікаў падзей Вялікай Айчыннай вайны.

Грамадства

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

З Леанiдам Левiным, славутым нашым архiтэктарам, мяне пазнаёмiў Генадзь Бураўкiн — яго даўнi, харошы сябра.

Грамадства

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Без мiлiцыi мы нiяк», — рэзюмаваў Прэзiдэнт Беларусi Аляксандр Лукашэнка падчас сустрэчы з мiнiстрам унутраных спраў Юрыем Караевым, маючы на ўвазе сiтуацыю з каранавiрусам. 

Грамадства

Чым сябе заняць на самаiзаляцыi?

Чым сябе заняць на самаiзаляцыi?

Урачы па ўсiм свеце запусцiлi флэшмоб #StayAtHome.