Вы тут

Як знайсці нагоду для радасці


Часам хочацца крышку пасумаваць. І не заўсёды гэта дрэнна. Плыні суму непазбежна набягаюць пасля вельмі добрага часу — як бурапенная хваля, якая сыходзіць з узбярэжжа, пакідае аскепкі ракавін. Сумаваць — значыць падводзіць вынікі. Думаць пра важнае і не вельмі, пра тое, што насамрэч прыносіць асалоду, а што варта пакінуць, — і такім чынам выстаўляць для сябе некаторыя арыенціры.


Сцэна з маладосці галоўных герояў спектакля «Юбілей ювеліра».

Прыблізна такі стан быў у мяне ў мінулы панядзелак. З аднаго боку, хацелася крышку мінору. Бо я толькі што прыехала з выезду на прыроду, у лес, дзе была ў цудоўнай кампаніі, — вярнулася ў звыклую рэальнасць. А, з іншага боку, душа прагнула працягу свята.

Вось і трапілася мне ў метро рэклама спектакля «Юбілей ювеліра» ў Нацыянальным купалаўскім тэатры. У сеціве знайшла апісанне — пастаноўка створана спецыяльна для найстарэйшай трупы тэатра — тых артыстаў, якія ўжо на заслужаным адпачынку. Талент з узростам нікуды не знікае, таму гэтых акцёраў вырашылі задзейнічаць.

Дзівосным чынам «Юбілей ювеліра» спраўдзіў мае ўнутраныя чаканні і трапіў, што называецца, у самы яблычак. Лёгкі салодкі роздум разліваўся ў зале. Ён плаўна перацякаў у пэўную багемную ўзнёсласць, захапленне. Напаўняў той асалодай, якую атрымліваеш хіба што ў сталічным Купалаўскім тэатры.

У спектаклі ад самага пачатку закранаюцца многія магістральныя для кожнага чалавека тэмы. Гаворыцца пра тое, што жыццё аднойчы скончыцца і, можа быць, скон ужо стаіць за дзвярыма. І ці хопіць часу зрабіць штосьці самае важнае? Пра тое, што мара неабходна кожнаму чалавеку: без яе жыццё будзе паўколерным. Гэты спектакль і пра сварлівую жонку — прытым яна каханая і кахае! Ён пра складаныя адносіны бацькоў і дзяцей — і пра тое, што гэтыя адносіны павінны быць для кожнага вялікай каштоўнасцю.

У «Юбілеі ювеліра» амаль 90-гадовы хворы нязломна верыць у сваю светлую зорку. Жанчына, якую ніхто ў жыцці не любіў і не казаў ёй добрых слоў, адважваецца стаць каралевай!.. А жонка таго самага хворага горача прызнаецца, што і кахае, і раўнуе яго вельмі моцна, нягледзячы на ўсе кропельніцы і таблеткі...

Сцэны з маладосці герояў зроблены надзвычай яскрава — яны нібы знаходзяцца ў галаграме, размаўляюць і танцуюць адно з адным у іншым, паралельным свеце — ад гэтай прыгажосці немагчыма адвесці позірк.

...У сваім рабочым раскладзе каралева пазначыла сустрэчу з галоўным героем на 60 гадоў наперад! А каралі, як вядома, не спазняюцца. Тут яшчэ раз успамінаеш пра пунктуальнасць — тую самую, якая з'яўляецца ветлівасцю манаршых асоб. Аднак ці пацвердзіцца яна гэтым разам?..

Разам з акцёрамі Купалаўскага тэатра перажываеш той сум, каторы неаддзельны ад радасці. Прасейваеш сваю паўсядзённасць праз сіта значнасці. І разумееш, што на некаторых важных рэчах трэба мацней сканцэнтравацца. І што некаторыя, на першы погляд неістотныя, з'яўляюцца сапраўднай каштоўнасцю.

* * *

Дапоўніць успрыманне спектакля (ці чагосьці падобнага да яго) можна, як бы банальна для кагосьці гэта ні гучала, бутэрбродам з ласосем і кавалачкам лімона і грэйпфрутавым сокам, набытымі ў антракце ў тэатральным буфеце. Кіслы смак, памножаны на лёгкі сум, як той мінус на мінус, дае яскравы, выразны плюс. Бо пакуль чалавек жывы, ён заўсёды знойдзе нагоду для радасці. І зусім маленькую або нават агромністую мару.

Ніна ШЧАРБАЧЭВІЧ

Загаловак у газеце: Лёгкі сум і кіславаты смак?..

Выбар рэдакцыі

Эканоміка

Энергія смецця, якасць вады і зніжэнне затрат удвая. Камунальнікі і навукоўцы абмеркавалі ўплыў інавацый на жыццё галіны

Энергія смецця, якасць вады і зніжэнне затрат удвая. Камунальнікі і навукоўцы абмеркавалі ўплыў інавацый на жыццё галіны

Святлодыёды са шматслойнымі нанаплёнкамі, якія мяняюць колер у залежнасці ад часу сутак і падстройваюцца пад біярытм чалавека...

Спорт

Сёлета футбольнаму клубу «Віцебск» спаўняецца 60 гадоў

Сёлета футбольнаму клубу «Віцебск» спаўняецца 60 гадоў

«У юбілейны сезон хацелася сур'ёзна адзначыць дзень нараджэння. Але пандэмія каранавіруса ўнесла свае карэктывы».

Эканоміка

 Фiнансiстам патрэбны банкноты — прымаюць любыя. Банкi гарантуюць, што захаваюць нашы грошы

Фiнансiстам патрэбны банкноты — прымаюць любыя. Банкi гарантуюць, што захаваюць нашы грошы

Фiнансавыя паслугi адзiн аднаму людзi аказваюць ужо тысячы гадоў.