Вы тут

«Еўрабачанне—2019»: старт дадзены!


Сёння ў Тэль-Авіве на плошчы ля старэйшага ў краіне тэатра Габіма адбываецца афіцыйнае адкрыццё Еўратыдня. На чырвоную дывановую дарожку, якая сёлета, зрэшты, была аранжавай, выходзяць з бялюткіх лімузінаў і ўрачыста шпацыруюць пад прыцэлам тэлекамер дэлегацыі з 41 краіны—удзельніцы 64-га песеннага конкурсу. Трансляцыю цырымоніі ў прамым эфіры зладзіў ізраільскі тэлеканал Kan, а таксама інтэрнет-канал конкурсу.


Вы вячэралі ў шабат?

Цікавая дэталь: Ізраіль прымае «Еўрабачанне» ўжо ў трэці раз, прычым адбываецца гэта праз роўныя прамежкі ў 20 гадоў — 1979-ты, 1999-ты і, нарэшце, 2019-ты. Аднак упершыню гаспадаром шоу стаў менавіта Тэль-Авіў. 

Каб напоўніцу пагрузіць тысячы гасцей у ізраільскую гасціннасць і нацыянальны каларыт, муніцыпалітэт падрыхтаваў шэраг пазаконкурсных мерапрыемстваў — экскурсіі, паход на адкрыты кірмаш Шук Кармель, тэматычныя вечарынкі, а таксама адмысловы праект «вячэра ў шабат» (унікальная магчымасць трапіць перад фінальным шоу на традыцыйную святочную сямейную вячэру і пакаштаваць мясцовыя стравы. І хоць каштуе гэта задавальненне для турыстаў нятанна, ад 60 еўра на чалавека, попыт на кулінарнае знаёмства з Ізраілем надзвычай высокі).

Яшчэ адна цікавінка «Еўрабачання-2019» — магчымасць для артыстаў, ды і наогул для ўсіх ахвотных, высветліць сваё паходжанне. Рэч у тым, што партнёрам конкурсу выступае кампанія My Heritage, якая займаецца даследаваннямі паходжання чалавека. Таму ўсім удзельнікам конкурсу прапанавалі здаць ДНК-тэст і даведацца пра свае карані і нацыянальнасці сваіх далёкіх продкаў. Напрыклад, пераможца «Еўрабачання-2018» Нета Барзілай высветліла, што ў яе каля паловы генаў сефардскіх яўрэяў з Паўночнай Афрыкі і яшчэ палова — ашкеназійскіх яўрэяў з Усходняй Еўропы. Дарэчы, падобныя ДНК-тэсты для ўдакладнення свайго радаводу кампанія рэкламуе і прадае па ўсім свеце. 

Мільён для Мадоны

Сам конкурс арганізатары таксама пастараліся зрабіць відовішчным і эфектным. Дзеля гэтага ў каманду вядучых, акрамя зоркі YouTube Люсі Айяб і папулярных тэлеперсон Асі Азара і Эрэс Тала, запрасілі знакамітую ізраільскую супермадэль Бар Рафаэлі, а на шоу замовілі выступіць Мадону. Дзве песні, якія выканае амерыканская поп-дзіва, абышліся ў 1 мільён долараў, але гэту суму знайшлі па-за бюджэтам (спонсарам выступіў канадскі мільярдэр ізраільскага паходжання). Таксама сярод музычных «разынак» конкурсу — своеасаблівая пераклічка пераможцаў і фіналістаў «Еўрабачання» розных гадоў. Як плануецца, Монс Зэлмерлёў са Швецыі, Верка Сярдзючка з Украіны, Канчыта Вурст з Аўстрыі, Элені Фурэйра з Кіпра, леташняя пераможца Нета Барзілай... пераспяваюць песні адно аднаго.

Бела-ружовае, але не зефір

Асноўная ўвага гледачоў у зале і тэлеаўдыторыі, якая складае каля 200 мільёнаў чалавек па ўсім свеце, безумоўна, будзе належаць канкурсантам. У беларускі ЗЕНЫ (Зінаіда Купрыяновіч), якая выступіць у першым паўфінале 14 мая, задача мінімум — трапіць у дзясятку лепшых, каб працягнуць барацьбу ў фінале. Пакуль што шансы 16-гадовай артысткі еўрапейская прэса і фанаты ацэньваюць даволі сціпла, нягледзячы на завадны, танцавальны нумар і бадзёранькую модную песню. 

Чым яшчэ за тры хвіліны выступлення будзе браць публіку ЗЕНА? Ну, па-першае, прыродным абаяннем і хараством юнацтва — гэтага дабра ў артысткі хопіць на некалькіх менш матываваных спявачак. Па-другое, ванільным бела-ружовым уборам: высокія белыя чаравікі са шнуроўкай і лагатыпам-імем артысткі на халявах, бела-ружовы топ з графіці і такія ж шорты. Выглядае так, як быццам стылісты, якім надакучылі параўнанні артысткі з даўнімі вобразамі Брытні Спірс, вырашылі: а няхай параўноўваюць, і яшчэ ўзмацнілі эфект. Нарэшце, па-трэцяе, у нумары ЗЕНЫ, які адлюстроўвае, паводле задумкі рэжысёра-пастаноўшчыка Андрэя Цара, «культуру вуліц», два хлапцы-малайцы пакажуць трыкінг. Нічога страшнага за гэтым словам не хаваецца, проста спалучэнне паветранай акрабатыкі і танцу. Ну і напрыканцы, як водзіцца, піратэхніка: дым і 30 вогненных фантанаў.

У топ ідуць адны юнакі

Пакуль вы разважаеце, ці дастаткова ўсёй гэтай прыгажосці для фіналу конкурсу, скажам некалькі словаў пра тых, каго там даўно чакаюць — прынамсі, паводле прагнозаў букмекераў. У пяцёрцы найбольш верагодных пераможцаў сёлета адны толькі мужчыны. Фаварыт нумар адзін — Дуглас Лоўрэнс з Нідэрландаў, стаўкі на перамогу якога прымаюцца з каэфіцыентам менш за 3,5. Яму ў спіну дыхаюць швед Джон Лундвік, скандальны прадстаўнік Францыі Білал Хасані, расіянін Сяргей Лазараў, які па прыкладу многіх удзельнікаў «Еўрабачання» спрабуе двойчы ўвайсці ў адну раку (чаму б і не, калі ў тваёй камандзе Філіп Кіркораў?), і галасісты спявак Чынгіз з Азербайджана. Беларусь у спісах букмекераў па-ранейшаму ніжэй за 30-ю выніковую пазіцыю, хоць і хацелася б, каб на гэты раз прагнозы не спраўдзіліся. Нездарма ж слоган конкурсу сёлета — Dare to Dream, «Дазволь сабе марыць»!

Больш падрабязна пра сапернікаў ЗЕНЫ, цікавыя падзеі і галоўных фрыкаў «Еўрабачання-2019» чытайце ў наступных матэрыялах на сайце «Звязды».

Вікторыя ЦЕЛЯШУК

Фота eurovision.tv

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.