Дакранiся да сваёй мары!

У кастрычнiку пачаў працу трэцi лiтаратурны конкурс «БрамаМар»

У студэнтаў беларускiх ВНУ ёсць час да 15 снежня бягучага года для таго, каб падаць свае творы на конкурс. Ён пройдзе ў два туры. Падчас першага студэнты дасылаюць свае творы ў адпаведнасцi з намiнацыямi на электронную скрыню brаmаmаr2013@gmаil.соm, а журы ў складзе вядомых лiтаратараў вызначае фiналiстаў.

Падчас другога тура фiналiсты атрымаюць лiтаратурныя заданнi i блiжэй пазнаёмяцца адзiн з адным i з арганiзатарамi конкурсу. Таксама яны возьмуць удзел у майстар-класах прадстаўнiкоў творчай iнтэлiгенцыi краiны.

Журы конкурсу — сучасныя пiсьменнiкi, выкладчыкi, мэтры сваёй справы: Алесь Карлюкевiч, Раiса Баравiкова, Уладзiмiр Лiпскi, Таццяна Сiвец, Iрына Шаўлякова, Наталля Кузьмiч, Галiна Багданава, Ягор Конеў.

На працягу 2013—2014 навучальнага года Iнстытут журналiстыкi БДУ (кафедра лiтаратурна-мастацкай крытыкi i творчая лабараторыя «Крытык») упершыню арганiзуе рэспублiканскi лiтаратурны конкурс «БрамаМар-юнi» для школьнiкаў 9-11 класаў. Падтрымку школьнаму конкурсу аказваюць Мiнiстэрства адукацыi Рэспублiкi Беларусь i Мiнскi абласны iнстытут развiцця адукацыi. Парадак удзелу вучняў аналагiчны: не пазней за 15 снежня неабходна даслаць свае творы па электроннай пошце на адрас brаmаmаr2013@gmаil.соm.

Як адзначыў куратар праекта, дацэнт кафедры лiтаратурна-мастацкай крытыкi Уладзiмiр Капцаў на прэс-канференцыi з нагоды адкрыцця рэспублiканскага лiтаратурнага конкурсу «БрамаМар», для ўдзельнiкаў i пераможцаў абедзвюх яго частак прадугледжаны цiкавыя мерапрыемствы творчага, адукацыйнага i забаўляльнага напрамкаў. Галоўная мэта конкурсу — не падзялiць удзельнiкаў на «лепшых» i «ўсiх астатнiх», а падтрымаць кожнага ўдзельнiка на яго шляху да творчай самарэалiзацыi, да здзейснення сваёй мары.

На думку выкладчыка Iнстытута журналiстыкi БДУ Ганны Курэйчык, конкурс «БрамаМар» — гэта выдатная магчымасць, найперш для падлеткаў з рэгiёнаў краiны сустрэцца з лепшымi пiсьменнiкамi краiны, атрымаць ад iх аб'ектыўную ацэнку сваiх здольнасцяў i канструктыўную крытыку. А для больш сталых маладых аўтараў з лiку студэнцтва конкурс можа стаць першым крокам да «дарослага» супрацоўнiцтва з выдавецтвамi i такiм чынам — пачаткам кар'еры.

Член журы i асноўны iнфармацыйны партнёр конкурсу дырэктар — галоўны рэдактар выдавецкага дома «Звязда» Алесь Карлюкевiч у сваёй прамове адзначыў важнасць гэтага мерапрыемства для развiцця нацыянальнай лiтаратуры. З'яўленне новых аўтараў, асаблiва тых, што пiшуць на беларускай мове, — гэта гарантыя таго, што нацыянальная лiтаратура будзе жыць не толькi як з'ява ўнутранага жыцця, але i як форма iснавання Беларусi на мiжнародным узроўнi.

Дарэчы, творы ўдзельнiкаў i пераможцаў конкурсу друкуюцца ў газеце «Лiтаратура i Мастацтва» i часопiсе «Маладосць», якiя ўваходзяць у склад выдавецкага дома. Алесь Карлюкевiч адзначыў таксама, што «Звязда» гатовая да друкавання канкурсантаў i ў кнiжным фармаце, калi iх творы будуць цiкавымi для чытачоў.

Падрыхтаваў Юрый Царык.