Прыгоды знакамітых

У першую суботу вясны сацыякультурны тэлеканал прапануе аўдыторыі правесці вечар за праглядам класікі. Іранічны дэтэктыў аб прыгодах легендарных Шэрлака Холмса і доктара Ватсана сёлета адзначае 45-годдзе з дня выхаду ў свет яго першых частак шматсерыйнай кінастужкі.

Так, 2 сакавіка ў эфіры «Беларусь 3» зможам убачыць кінаработы рэжысёра Ігара Масленікава «Знаёмства» і «Крывавы надпіс». Першыя фільмы серыяла, які распавядае аб прыгодах легендарных сышчыкаў, быў зняты па матывах апавяданняў «Стракатая стужка» і «Эцюд у барвовых танах» англійскага пісьменніка Артура Конан Дойла. «Прыгоды Шэрлака Холмса і доктара Ватсана» — адзін з шэдэўраў савецкага кінематографа. А непараўнальная ігра Васіля Ліванава і Віталя Саломіна робіць гэты кінатвор аднолькава цікавым для гледачоў розных узростаў і пакаленняў. Зняліся тут таксама акцёры Рына Зялёная, Марыя Саломіна, Ігар Дзмітрыеў, Мікалай Карачанцаў, Андрэй Ільін і іншыя. І той поспех, які фільм займеў у шматлікай аўдыторыі, яго стваральнікам даўся нялёгка. Калі рэжысёр зацікавіўся сцэнарыем, напісаным Юліем Дунскім і Валерыем Фрыдам, то і задумаў зняць першыя два фільмы. Пасля яны настолькі зацікавілі гледачоў, што апошнія запатрабавалі працягу. Сам Ігар Масленікаў сітуацыю тлумачыў так: «Асноўная памятка двухсот фільмаў, знятых па апавяданнях пра Шэрлака Холмса ва ўсім свеце, заключаецца ў тым, што паўсюль фігуруе толькі ён... На Ватсана мала хто звяртаў увагу, ён нібыта быў няўлоўным. У інсцэніроўцы Дунскога і Фрыда мне спадабалася менавіта тое, як надзвычайна дакладна і з іроніяй выпісаны ўзаемаадносіны двух людзей. Ватсан стаў цікавым, жывым».

Першапачаткова выканаўцам галоўнай ролі рэжысёр бачыў толькі Васіля Ліванава, аднак у працэсе здымак узніклі пытанні. Акцёра не хацела зацвярджаць на ролю кіраўніцтва Цэнтральнага тэлебачання, бо лічыла, быццам ён не адпавядае вобразу англійскага шпіка. Ды яшчэ і хадзілі легенды пра няпросты характар артыста, але пасля здымак пробных эпізодаў з Ліванавым і Саломіным іх усё ж зацвердзілі, хоць і праблемы на тым не скончыліся. На здымках экранны Шэрлак моцна пасварыўся з Масленікавым, і толькі вялікае цярпенне апошняга дазволіла захаваць акцёра ў карціне без замены выканаўцы галоўнай ролі ў перспектыве. За год працы з артыстам рэжысёру давялося перажыць шмат усяго: сваркі, зрыў здымак. 

І толькі калі аднойчы Ліванаў даведаўся, што яго ўсё ж могуць пасунуць у кадры, замяніўшы Барысам Клюевым, то вырашыў больш не заігрываць з лёсам.

Дарэчы, на ролю Шэрлака спрабаваліся акцёры Аляксандр Кайданоўскі, Алег Янкоўскі і іншыя, а вось увасобіць Ватсана маглі Алег Басілашвілі, Леанід Кураўлёў, Юрый Багатыроў, аднак спыніліся на кандыдатуры Віталя Саломіна. Ён быў абсалютнай супрацьлегласцю Ліванава, бо ўмеў знаходзіць з усімі агульную мову, не ўдзельнічаў у канфліктах і трымаўся замкнута. Яму нават удалося пасябраваць са сваім экранным напарнікам, хоць акцёры сустрэліся і ўпершыню пазнаёміліся на пробах. Прычым сяброўства ў мужчын захавалася на ўсё жыццё. 

Як пасля патлумачыць Васіль Ліванаў, поспех іх экраннага дуэта ў тым, што «ў адносінах да жыцця мы супадалі ў многім. Віталь дзяліўся са мной глыбока асабістымі перажываннямі, якімі, думаю, не дзяліўся больш ні з кім... На экране можна сыграць каханне. А сяброўства сыграць немагчыма. Трэба сябраваць». Згадайце выканаўцаў легендарнай дэтэктыўнай гісторыі за праглядам кінастужак на «Беларусь 3». А ўжо ў суботу, 9 сакавіка, чакайце працягу.

Алена ДРАПКО