Па выніках другой Міжнароднай метапрадметнай вочна-завочнай навуковай канферэнцыі «Этнасы і лёсы ў жыцці і творчасці Ф. І. Цютчава: да 220-годдзя з дня нараджэння» выдадзена калектыўная манаграфія пад рэдакцыяй доктара педагагічных навук, прафесара кафедры лінгвістычных дысцыплін і міжкультурных камунікацый Брэсцкага дзяржаўнага тэхнічнага ўніверсітэта, загадчыцы навукова-даследчай лабараторыі па сацыякультурных праблемах памежжа Марыі Жыгалавай.
Аўтарамі зборніка сталі даследчыкі творчасці вялікага паэта і дыпламата з Беларусі, Германіі, Грузіі, Польшчы, Расіі, Румыніі, ЗША, Ірана, Украіны і іншых краін.
Яркі жывапіс слоў, філасофскія пошукі і смелыя імкненні ў спазнанні складанасці быцця ў творчасці Ф. Цютчава прыцягваюць аматараў паэзіі. У сваім уступным слове Марыя Жыгалава падкрэсліла: «Праблемы, узнятыя Ф. Цютчавым, актуальныя і сёння. Паэтычнай і дыпламатычнай творчасцю паэт пацвярджае значнасць чалавека ў гэтым свеце як часткі прыроды і соцыуму, які павінен клапаціцца пра пазітыўную камунікацыю і жыць у гармоніі». «Цютчаўскія» тэмы даследавання аўтараў манаграфіі шматаспектныя: яго службовая і дыпламатычная дзейнасць, асэнсаванне і вывучэнне жыцця і творчасці паэта ў полікультурнай прасторы, лінгвістычныя асаблівасці вершаў, узаемасувязі і кантакты ў сусветным літаратурным працэсе ў розных часавых і геаграфічных зрэзах.
Доктар філалагічных навук, прафесар кафедры беларускага літаратуразнаўства Брэсцкага дзяржаўнага ўніверсітэта імя А. С. Пушкіна Зоя Мельнікава ў артыкуле «Цютчаўскія матывы ў беларускай паэзіі пачатку ХХ стагоддзя» прасачыла галоўныя тэндэнцыі развіцця беларускай літаратуры і абгрунтавала ўплыў творчасці рускага паэта на маладую беларускую літаратуру, выявіла тыпалагічныя вобразна-сэнсавыя паралелі паміж творамі Ф. Цютчава і М. Багдановіча, Я. Купалы, З. Бядулі, В. Ластоўскага. На старонках манаграфіі змешчаны і дыялог філолагаў — кандыдата філалагічных навук, дацэнта кафедры прафесійнага развіцця супрацоўнікаў адукацыі Брэсцкага абласнога інстытута развіцця адукацыі Станіслава Рачэўскага і кандыдата філалагічных навук, дацэнта кафедры агульнага і рускага мовазнаўства Брэсцкага дзяржаўнага ўніверсітэта Людмілы Гадуйкі. Суаўтары з прымяненнем кампаратывісцкага падыходу разглядзелі тэмы невычарпальнасці светастварэння, выяўлення касмічнага і зямнога ў паэзіі Ф. Цютчава і М. Багдановіча. У асобным артыкуле Станіслаў Рачэўскі прааналізаваў уклад паэта Максіма Багдановіча ў развіццё прыродаапісальнай лірыкі «Цютчаўская «Прырода — не злепак, не бяздушны лік...» у паэзіі Максіма Багдановіча». Старшыня Брэсцкага абласнога аддзялення Саюза пісьменнікаў Беларусі Таццяна Дземідовіч прасачыла ўплыў натурфіласофіі Ф. Шэлінга на творчасць Ф. Цютчава і яе далейшае развіццё ў сусветным літаратурным працэсе на прыкладзе творчасці Зінаіды Дудзюк.
Паэзію Ф. Цютчава ва ўзнаўленні па-беларуску Міколам Гілем разгледзела кандыдат філалагічных навук, дацэнт кафедры лінгвістычных дысцыплін і міжкультурных камунікацый Брэсцкага дзяржаўнага тэхнічнага ўніверсітэта Ніна Борсук.
Навукова-выдавецкі праект арганізаваны пры падтрымцы Расійскага цэнтра навукі і культуры ў Брэсце і ГА «Русское общество».
Таццяна АНАТОЛЬЕВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.