Пяць беларускіх самбістаў — найлепшыя ў свеце

Героі тыдня. Беларускія самбісты заваявалі пяць медалёў на чэмпіянаце свету, які праходзіў у Ерэване. Чэмпіёнкай свету ў вагавай катэгорыі да 65 кг стала Даніэла Ждан. Анжэла Жылінская заняла другое месца ў катэгорыі да 72 кг. Бронзавыя медалі заваявалі Анфіса Капаева (да 50 кг), Таццяна Мацко (да 59 кг) і Уладзіслаў Бурдзь (да 58 кг). Усяго першынства планеты ў Ерэване сабрала больш за 330 спартсменаў з 65 краін, беларускую каманду прадстаўлялі 19 спартсменаў.

Каманда тыдня. На лёдзе сталічнай «Чыжоўкі-Арэны» прайшоў Кубак Прэзідэнцкага спартыўнага клуба па хакеі. Удзел у спаборніцтвах прынялі юніёрскія (U18) зборныя Беларусі і Казахстана, а таксама жаночая і юнацкая (U16) зборныя Расіі. У рамках турніру прайшлі спаборніцтвы па хакеі 3×3. У фінале сустрэліся каманды Беларусі і Расіі, пераможцамі сталі гаспадары лёду.

У фінальным матчы класічнага варыянта хакея таксама сустрэліся беларуская і расійская каманды. З вынікам 1:0 перамагла зборная Беларусі. Такім чынам, беларуская юніёрская зборная нашай краіны перамагла ва ўсіх матчах турніру. На другім месцы ў розыгрышы Кубка Прэзідэнцкага спартыўнага клуба размясціліся хакеісты з Казахстана, Расія-U16 замкнула тройку. Найлепшым галкіперам спаборніцтваў быў прызнаны варатар нашай юніёрскай зборнай Антон Крупавец, найлепшым абаронцам быў названы расіянін Мікіта Фядотаў, а найлепшым нападаючым — Абзал Алібек з каманды Казахстана. Найбольшую колькасць рэзультатыўных балаў набраў форвард зборнай Беларусі (U18) Алег Хомчанка.

Перамога тыдня. Гандбалісты СКА-Мінск разграмілі каманду «Бусел Кітая» у матчы пятага тура рэгулярнага чэмпіянату SEHA-лігі. Таксама за адзін матч армейцы ўстанавілі два рэкорды дывізіёна «Усход». Вынік сустрэчы — 47:26. У другой палове сустрэчы мінчане закінулі ў вароты саперніка 29 мячоў, што з’яўляецца рэкордам рэзультатыўнасці для адной каманды за адзін тайм. Выніковая вікторыя з перавагай у 21 мяч таксама стала рэкорднай для ўсходняга дывізіёна.

Турнір тыдня. У Брэсцкім абласным цэнтры алімпійскага рэзерву па водных відах спорту завяршыўся адкрыты чэмпіянат Беларусі па плаванні на кароткай вадзе. Трое плыўцоў перамаглі адразу ў чатырох асабістых відах праграмы. Канстанцін Курачкін стаў чэмпіёнам Беларусі на дыстанцыях 200 м, 400 м, 800 м і 1500 м вольным стылем; Ілья Шымановіч выйграў «золата» на 50 м, 100 м і 200 м брасам, а таксама на 200 м комплексным плаваннем; Анастасія Шкурдай была найлепшай на дыстанцыях 50 м, 100 м і 200 м на спіне, а таксама на 50 м кролем. Падчас чэмпіянату былі пабіты два нацыянальныя рэкорды на кароткай вадзе. Аліна Змушко пераадолела дыстанцыю 200 м брасам за 2.19,25 сек. Таксама ўласны рэкорд Беларусі на дыстанцыі 200 м на спіне абнавіла Анастасія Шкурдай — цяпер найлепшы вынік у краіне складае 2.00,15 секунд.

Лічба тыдня. 16 камплектаў узнагарод разыгралі падчас адкрытага чэмпіянату Беларусі па канькабежным спорце. Трохразовым чэмпіёнам Беларусі стаў Ігнат Галавацюк, які перамог на дыстанцыях 500 м і 1000 м, а таксама ў мас-старце. Па два індывідуальныя залатыя медалі выйгралі Ганна Дамарацкая (500 м, мас-старт), Кацярына Слоева (1000 м і 1500 м), Марына Зуева (3000 м і 5000 м) і Ягор Дамарацкі (5000 м і 10 000 м). Наймацнейшым на дыстанцыі 1500 метраў у мужчын стаў Віктар Рудэнка.

У камандным спрынце ў мужчын перамогу атрымала тройка з Магілёва ў складзе Яўгена Гагіева, Уладзіслава Гапона і Уладзіслава Запойкіна. У жанчын пераможнай тройкай стала зборная Беларусі, у якую ўвайшлі Крысціна Бурмістрава, Дамініка Кухарчык і Сафія Татурэвіч. У абедзвюх камандных гонках пераследу адзначыліся прадстаўнікі сталіцы: сярод мужчын найлепшымі сталі Ягор Дамарацкі, Андрэй Ільюцік і Віктар Рудэнка, а ў дзяўчат найлепшы час паказалі Марыя Давыдава, Дамініка Кухарчык і Паліна Сівец.

Валерыя СЦЯЦКО

Фота з адкрытых крыніц