Спартсменкі клуба «Сільфіда» выступяць на Чэмпіянаце свету па эстэтычнай групавой гімнастыцы ў Алматы.
Упершыню сусветнае першынство па эстэтычнай групавой гімнастыцы адбудзецца ў Азіі.
У рамках XXIII Чэмпіянату свету ў Алматы з 22 па 24 лістапада пройдуць Чэмпіянат чатырох кантынентаў і міжнародны турнір «Almaty Cup». У спартыўных мерапрыемствах прымуць удзел наймацнейшыя каманды з 15-17 краін свету, больш за 1500 спартсменаў, трэнераў, суддзяў. Будзе разыграна 50 камплектаў медалёў у доўгай і кароткай праграмах, у некалькіх узроставых катэгорыях, а таксама сярод змешаных каманд.
Беларусь будуць прадстаўляць чатыры каманды клуба эстэтычнай групавой гімнастыкі «Сільфіда» пад кіраўніцтвам Таццяны Ржэўскай, Кацярыны Бязверхай і Крысціны Куляшовай.
У Чэмпіянаце свету прымуць удзел дзве каманды з Беларусі: у катэгорыі «юніёры» — «Сільфіда-Флэйм», у катэгорыі «жанчыны» — «Сільфіда-Флёр». У міжнародным турніры «Almaty Cup», які пройдзе ў рамках спаборніцтваў, сваё майстэрства пакажуць: «Сільфіда-Скарлет» (у катэгорыі «дзеці 10-12 гадоў» ), «Сільфіда-Сімфонія» ( «дзеці 12-14 гадоў»), «Сільфіда-Флэйм» («юніёры») і «Сільфіда-Флёр» («жанчыны»).
— У 2019 годзе на Чэмпіянаце свету па эстэтычнай гімнастыцы ў Іспаніі каманда клуба «Сільфіда», пад маім кіраўніцтвам, упершыню выйшла ў фінал сусветнага першынства і заняла сёмае месца сярод 35-і наймацнейшых каманд свету, — распавяла чытачам партала Выдавецкага дома «Звязда» намеснік старшыні Беларускай асацыяцыі эстэтычнай групавой гімнастыкі, кіраўнік клуба эстэтычнай групавой гімнастыкі «Сільфіда» і трэнер жаночай каманды Таццяна Ржэўская. — Гэта найлепшы вынік беларусак за ўсю гісторыю развіцця эстэтычнай гімнастыкі ў краіне. Пасля такога поспеху здарыўся трохгадовы перапынак ва ўдзеле беларускіх каманд у чэмпіянатах свету. Спачатку каранавірус, потым забарона на ўдзел у сусветных стартах для Расіі і Беларусі. Мы з нецярпеннем чакалі магчымасці паказаць сваё майстэрства, і такое права, у восьмы раз, клуб атрымаў. Зараз у Мінску праводзім заключныя трэніроўкі і хутка каманды клуба вылецяць на першынство свету ў Алматы.Арганізатарамі спаборніцтваў з’яўляюцца Міжнародная федэрацыя эстэтычнай групавой гімнастыкі (IFAGG), Міністэрства турызму і спорту Рэспублікі Казахстан, Акімат горада Алматы, Казахстанская федэрацыя эстэтычнай групавой гімнастыкі.
Пажадаем нашым спартсменкам вярнуцца дадому з ўзнагародамі!
Віктар ІВАНЧЫКАЎ
Фота аўтара
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?