На Гомельшчыне парламентарыі працягваюць аналіз цэн харчовых, прамысловых тавараў першай неабходнасці і медыцынскіх прэпаратаў. Член Пастаяннай камісіі Палаты прадстаўнікоў па заканадаўстве Ірына Даўгала правяла маніторынг кошту, наяўнасці і асартыменту медтавараў у аб'ектах аптэчнай сеткі дзяржаўнай і прыватнай формаў уласнасці Гомеля.
Для правядзення маніторынгу былі абраныя аптэкі ў Савецкім раёне абласнога цэнтра. У іх абслугоўваецца значная колькасць пажылых, людзей з інваліднасцю, шматдзетныя сем'і і іншыя ўразлівыя катэгорыі грамадзян. У непасрэднай блізкасці — дарослая і дзіцячая паліклінікі, таму са спісам ад урача многія накіроўваюцца менавіта сюды, кажуць правізары аптэк. Скаргаў на павышэнне цэн на лекі апошнім часам супрацоўнікам не паступала.
— Наадварот, людзі задаволеныя, бо многія лекі значна патаннелі, — падчас маніторынгу настрой наведвальнікаў перадалі парламентарыю супрацоўнікі дзяржаўнай аптэкі «Фармацыя» № 165 па вуліцы Быхаўскай.
Тут для пакупнікоў арганізавана электронная чарга, для зручнасці пажылых людзей, інвалідаў, пакупнікоў з дзецьмі ўладкаваныя месцы адпачынку. У аптэцы не толькі лекавыя сродкі, але і прылады медыцынскай тэхнікі — у асартыменце.
— Штомесяц прыходжу сюды. Купляю прапісаныя лекі за 10 % ад кошту, бо ў мяне група інваліднасці, — падзялілася пастаянная наведвальніца гэтай аптэкі Лідзія Кузьмінічна Крывашэева. — Цяпер вось аддала за ўсе лекі 12 рублёў, а так бы — 120. Таму я вельмі задаволеная. Толькі словы падзякі.
Маніторынг кошту тавараў аптэчнай сеткі разам з аналізам цэн на харчовыя і прамысловыя тавары першай неабходнасці — сталая, сістэмная работа, звярнула ўвагу Ірына Даўгала.
— Гэта звязана з тым, што неабходна не проста кантраляваць даступнасць і асартымент сацыяльна значных тавараў, але і аналізаваць сістэму цэнаўтварэння на іх, — растлумачыла яна.
Парламентарый дадала, што да яе скаргаў ад жыхароў Гомеля на неабгрунтаваны рост цэн на лекі не паступала. Але аналіз цэн у аптэках як дзяржаўнай, так і прыватнай формаў уласнасці застаецца актуальным і важным пытаннем.
— Сёння нельга не казаць аб тым, што рост цэн у цэлым адбіваецца на настроі людзей. Але калі выконваецца баланс росту кошту і адпаведнага росту, у першую чаргу, пенсіі, сацыяльных дапамог і гэтак далей, то і ў людзей ёсць разуменне і адэкватная ацэнка дзяржаўнай палітыкі. І гэта вельмі важна, таму што мы працуем для людзей і ў імя людзей, — падкрэсліла дэпутат. — Зразумела, жыццё не стаіць на месцы і эканамічныя працэсы дыктуюць свае законы, але рост кошту, вядома, павінен быць абгрунтаваным, паступовым, каб рост заработнай платы, пенсіённага забеспячэння, усіх сацыяльных выплат і дапамог суадносіўся з ростам цэн. Для гэтага і праводзім маніторынгі. Не трэба нажывацца на горы і праблемах людзей, гэта не прынясе ніводнаму суб'екту гаспадарання ні матэрыяльнага, ні маральнага задавальнення.
Увогуле, у аптэчнай сетцы Гомельшчыны рэалізоўваецца каля 8 тысяч найменняў тавараў, звярнула ўвагу генеральны дырэктар Гомельскага РУП «Фармацыя» Людміла Сапега, якая далучылася да парламентарыя падчас маніторынгу. Яна падкрэсліла, што цэны на медпрэпараты і ў дзяржаўных, і ў прыватных аптэчных сетках — строга пад кантролем заканадаўства. Разам з тым, сёння ў аптэках назіраюцца выпадкі, калі істотна адрозніваецца цана на ідэнтычныя пазіцыі прэпаратаў.
— Вядома, мы прааналізавалі сітуацыю, — зрабіла акцэнт Ірына Даўгала. — Гэта ў першую чаргу звязана з тэрмінамі закупкі прэпаратаў. Часцей за ўсё гэта датычыцца імпартных тавараў, якія былі закуплены на піку курсавых ваганняў. Напрыклад, у пачатку года закупка ішла па дастаткова высокім курсавым эквіваленце. Лекі паступілі ў рэалізацыю і іх рэшткі прадаюцца па ранейшай цане, а новае паступленне можа быць таннейшым. Такія моманты мы тлумачым.
Кіраўнік Гомельскага РУП «Фармацыя», у сваю чаргу, адзначыла, што сёння ў аптэках спыненыя пастаўкі пэўных лекавых сродкаў. Найперш гэта прэпараты, якія паступалі з Украіны.
— Але ў той жа час, цяпер дадзенае пытанне вырашаецца вытворцамі з таго боку і пастаўкі ідуць праз іншыя краіны. Акрамя таго, пэўныя прэпараты замяняюцца аналагічнымі найменнямі іншых вытворцаў, — запэўніла Людміла Сапега.
Праводзіцца сур'ёзная работа, у тым ліку ў рамках Саюзнай дзяржавы, па замене прэпаратаў і іх складнікаў імпартнай вытворчасці, заўважыла Ірына Даўгала. І гэта таксама ўплывае на цэнаўтварэнне, паколькі мяняюцца і выдаткі на лагістыку. Дэпутат падкрэсліла, што па выніках маніторынгу кошту, наяўнасці і асартыменту медтавараў у абраных аптэках дзяржаўнай і прыватнай формаў уласнасці заўваг няма. На кантролі застаецца забяспечанасць аптэк супрацьвіруснымі прэпаратамі, лекамі для лячэння хранічных захворванняў, а таксама сродкамі дэзынфекцыі.
Дарэчы, дэпутат ніжняй палаты парламента падзялілася, што падчас прыёмаў грамадзян ёй даводзіцца закранаць пытанне прафілактыкі захворванняў, вядзення здаровага спосабу жыцця.
— Сёння ў нас створана проста каласальная інфраструктура спартыўных і фізкультурных аб'ектаў. Прыходзьце самі, са сваімі сем'ямі, рухайцеся, займайцеся дыхальнай гімнастыкай, імкніцеся бачыць пазітыўнае, бо гэта ў тым ліку ўплывае на фізічны стан кожнага чалавека, — заклікала парламентарый.
Наталля КАПРЫЛЕНКА
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
