У сценах БДУІР адбылася выніковая нарада галоўнага ўпраўлення ідэалагічнай работы і па справах моладзі Мінгарвыканкама. Сустрэча прайшла па тэме «Арганізацыя ідэалагічнай работы ў г. Мінску ў 2021 годзе і задачах на 2022 год».
Начальнік галоўнага ўпраўлення ідэалагічнай работы і па справах моладзі Мінгарвыканкама Вольга Чамаданава падкрэсліла, што сёння ўсе структуры ідэалагічнай «вертыкалі» працуюць адной камандай.
— На бягучы момант 2022 года мы можам казаць аб выніках, якія з’явіліся за мінулы перыяд. Гэта новыя праекты, якія мы актыўна развіваем. Яны найперш звязаныя з маладзёжнай палітыкай. Менавіта мы арыентаваныя на моладзь, удзяляем ёй асаблівую ўвагу. Гэта выяўляецца ў правядзенні культурных патрыятычных мерапрыемстваў, у якія ўцягнута ўся моладзь без выключэння. Стартавалі новыя праекты, прысвечаныя Вялікай Айчыннай вайне. Запланаваны шырокія дыялогавыя пляцоўкі ва ўстановах адукацыі сталіцы. Да гэтых мерапрыемстваў актыўна далучаюцца грамадскія арганізацыі Мінска. У моладзі ёсць запыт на прадастаўленне тэматычных пляцовак для самарэалізацыі. І важна, што моладзь з’яўляецца не толькі ўдзельнікам гэтых мерапрыемстваў, але і іх ініцыятарам. А мы можам падставіць плячо і падзяліцца сваім прафесійным досведам. Тым больш у нас ёсць усе рэсурсы, каб працаваць актыўна і аператыўна рэагаваць на запыты, якія ставіць перад намі жыццё. Сёння немагчыма працаваць паасобку. У нас адна мэта і адна ідэя.
Міністр адукацыі Беларусі Андрэй Іванец адзначыў, што для моладзі і ў цэлым для насельніцтва Беларусі пытанні ідэалагічнага і патрыятычнага выхавання выйшлі на першы план.
— Кожны кіраўнік любой установы адукацыі павінен разумець, што пытанні выхавання — гэта яго асабістая і персанальная адказнасць. Гэтая работа не павінна быць фармальнай. Сёння моладзь вельмі адчувальная да таго, як з ёй выбудоўваюць дыялог. Яе цікавіць шмат пытанняў, і мы мусім даць на іх адказы. Тым больш што ў нашай краіне, як адзначыў кіраўнік дзяржавы, ёсць усе зыходныя пазіцыі. Нам не трэба распаўсюджваць фэйкі для таго, каб данесці праўду да людзей. Мы жывём у нармальнай краіне, і кожны павінен разумець, што гэта прадмет гонару.
Андрэй Іванавіч не пакінуў без увагі і надзённую праблему ў адукацыі — з дзецьмі ўкраінскіх бежанцаў. Міністр адукацыі запэўніў, што сёння выбудавана поўная работа па прыёме ўсіх дзяцей, якія прыязджаюць з Украіны на тэрыторыю Беларусі. Ім знаходзяць месцы ва ўстановах дашкольнай і сярэдняй адукацыі.
Да нарады была прымеркавана тэматычная выстава-прэзентацыя «Захоўваем гістарычную памяць — памнажаем духоўныя каштоўнасці сталіцы». На экспазіцыі былі прадстаўлены прадпрыемствы, арганізацыі, грамадскія аб’яднанні сталіцы, іх значныя праекты і акцыі. Яе наведаў старшыня Мінгарвыканкама Уладзімір Кухараў.
Метадыст Наталля Самурганава прадстаўляла на выставе ўпраўленне па адукацыі Партызанскага раёна, які ідзе ў нагу з часам. Адукацыйны тэлеграм-канал Партызанскага раёна прадстаўлены рубрыкамі, што дапамагаюць згадаць гісторыю Беларусі, атрымаць веды аб беларускай мове і наведаць музейны квэст.
— У нас быў праведзены невялікі аналіз: каб не страціць падпісчыкаў, тэлеграм-канал павінен весціся правільна, разумна і сучасна. Вылучылі рубрыкі, якія не толькі цікавыя, але і прадстаўляюць інфармацыю, якая для падлеткаў даступная — кароткая, лаканічная. Рубрыкі вядуцца педагогамі Партызанскага раёна. Мы пастараліся прадставіць найбольш значныя і ўжо створаныя ў раёне віртуальныя музеі, турыстычныя маршруты па Партызанскім раёне. У рубрыцы «Музейны квэст» можна з дапамогай тэлефона наведаць выставу, бо ўсе экспанаты алічбаваныя праз QR-коды.
Адным з яркіх герояў выставы стаў Кірыл Манулік, дзесяцікласнік сталічнай гімназіі № 146. Хлопец са сваім праектам «Пчаліны вартаўнік» стаў фіналістам на конкурсе «100 ідэй для Беларусі».
— Уплыў пчол на ўраджайнасць, харчовую бяспеку чалавецтва велізарны. Праект складаецца ў тым, што для захавання пчалінай прадукцыі я вырабіў лекі з піхты сібірскай. Яна выкарыстоўваецца ў хімічных вырабах і харчовай прамысловасці, а таксама цалкам бяспечная для пчол. Навуковая работа пісалася з настаўнікам біялогіі. Я спачатку проста цікавіўся і глядзеў літаратуру па дадзенай тэме. Пасля доўгіх эксперыментаў было вырашана аб’яднаць у выгадны тандэм кроп і піхту.
На нарадзе асаблівае месца ў ідэалагічнай рабоце з моладдзю было адведзена распаўсюджванню рознай інфармацыі. Вольга Чамаданава звярнула ўвагу на Канстытуцыю Рэспублікі Беларусь, на якую абапіраюцца пры рабоце з падрастаючым пакаленнем.
— Сёння мы занадта часта гаворым аб фэйках. Моладзь павінна атрымліваць аб’ектыўную, праўдзівую і правераную інфармацыю. Гэта залежыць і ад работы журналістаў, і ад нас як ідэолагаў. Мы гатовыя даваць тую інфармацыю, якая патрабуецца аператыўна, гатовыя ўступаць у пэўную дыскусію, калі гэта спатрэбіцца і, вядома ж, абвяргаць тое, што сёння спрабуюць нам навязаць у тым ліку і заходнія краіны.
За 2021 год з’явілася шмат цікавых праектаў, пра якія мы раней не разважалі. Сёння гэтыя праекты ініцыіруе сама моладзь, а мы яе падтрымліваем.
Аляксей КАРПУК
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
