Па пашыраную нараду, якую правёў старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Міхаіл Русы, былі запрошаны прадстаўнікі Мінгарвыканкама і зацікаўленых міністэрстваў.
Нагода для такога маштабнага разгляду — калектыўны зварот грамадзян па пытанні выдзялення шматдзетным сем’ям субсідый на будаўніцтва жылля ў адным з шматкватэрных дамоў Мінска.
У гутарцы з журналістамі да пачатку нарады Міхаіл Русы паведаміў, што па даручэнні спікера Савета Рэспублікі Наталлі Качанавай займаецца высвятленнем усіх абставін складанасцяў, з якімі сутыкнуліся грамадзяне.
— Сёння мы праводзім чарговы разгляд калектыўнага звароту шматдзетных сем’яў па цэлым шэрагу пытанняў, з якімі яны сутыкнуліся пры атрыманні жылля ў Мінску. Тут сабрана вялікае кола прадстаўнікоў органаў дзяржаўнага кіравання, службаў Мінгарвыканкама, міністэрстваў юстыцыі, архітэктуры і будаўніцтва, працы і сацыяльнай абароны для таго, каб дэталёва разабрацца ў сітуацыі і знайсці магчымасці высветліць прычыны, чаму ў людзей з’явілася неабходнасць пісаць скаргі, і калі ёсць недапрацоўкі на заканадаўчым узроўні — аператыўна знайсці рашэнне ў гэтым кірунку, — патлумачыў абраны фармат сустрэчы старшыня профільнай камісіі.
Ён перакананы: калі людзі звяртаюцца, гэта дапамагае заканадаўцам бачыць цэлы шэраг прабелаў у нарматыўнай базе, якую можна і неабходна аператыўна дапрацаваць.
— 15 сакавіка пачала дзейнічаць абноўленая Канстытуцыя і цэлы шэраг нарматыўна-прававых актаў будзе перапрацаваны. Таму будзе рэальная магчымасць частку такіх прыкладаў аператыўна ўнесці і дапоўніць заканадаўства, — адзначае Міхаіл Русы.
Што датычыцца сённяшняй размовы, паводле меркавання сенатара, яна будзе дастаткова сур’ёзнай:
— На пустым месцы 40 чалавек па адным і тым жа пытанні звяртацца не будуць. Хтосьці дзесьці недапрацаваў, магчыма, да канца не высветлілі ўсе нюансы. Таму мы паслухаем кожны орган дзяржаўнага кіравання і мы знойдзем рашэнне гэтага пытання.
Сенатар нагадаў: калі шматдзетная сям’я звярнулася з заявай аб атрыманні жылля з субсідыямі і сацыяльнымі гарантыямі, якія прадугледжаны ў адпаведнасці з заканадаўствам, на працягу года яны павінны быць накіраваны на яго будаўніцтва.
— Чаму тут не спрацавала, хто ў гэтым вінны, і калі ёсць нейкі прабел у заканадаўстве — усё высветлім і прымем рашэнне, каб людзі былі задаволены, — падкрэсліў старшыня профільнай камісіі Савета Рэспублікі.
Паводле яго ацэнкі, работа з людзьмі — гэта, свайго кшталту, экспертная ацэнка заканадаўства на прадмет яго зручнасці і эфектыўнасці яго работы.
Вольга АНУФРЫЕВА
Фота БелТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
