Пандэмiя каранавiруса не найлепшым чынам паўплывала на дзейнасць шмат якiх галiн народнагаспадарчага комплексу Мiншчыны. Як прадпрыемствы i арганiзацыi выходзяць са складанай сiтуацыi, чым iм дапамагае дзяржава, расказаў «Звяздзе» старшыня камiтэта эканомiкi Мiнаблвыканкама Дзянiс Курленка.
— Дзянiс Мiкалаевiч, на якую падтрымку могуць разлiчваць суб'екты гаспадарання Мiнскай вобласцi, найбольш пацярпелыя ад пандэмii, — у тым лiку i недзяржаўнай формы ўласнасцi?
— Адпаведна Указу Прэзiдэнта Рэспублiкi Беларусь ад 24 красавiка 2020 года № 143 «Аб падтрымцы эканомiкi» на дапамогу могуць разлiчваць суб'екты ўсiх формаў уласнасцi, вiды дзейнасцi якiх найбольш зазналi неспрыяльнае ўздзеянне эпiдэмiялагiчнай сiтуацыi. У межах дакумента вызначаны льготы i прэферэнцыi ў частцы падаткаабкладання i арэндных адносiн.
— Прадпрыемствы i арганiзацыi якiх сфер дзейнасцi найбольш адчулi на сабе наступствы пандэмii?
— У большай ступенi — грамадскага харчавання, турызму. У транспартнай галiне iстотна знiжаны пасажыраабарот у рэгулярных напрамках, адзначаецца адмоўная дынамiка грузаабароту i экспарту транспартных паслуг.
Складаная сiтуацыя з напаўненнем санаторна-курортных арганiзацый i гасцiнiц. Загрузка сродкаў размяшчэння ў сярэднiм складае 33 %. Разам з тым у красавiку гэтага года паказчык не перавышаў 13 %.
Аднак цяпер суб'ектамi гаспадарання прымаюцца рашэннi аб аднаўленнi работы аб'ектаў грамадскага харчавання. Асобныя турыстычныя прадпрыемствы пачынаюць фармiраваць прапановы на летнi адпачынак.
— Падтрымка аказваецца па заяўным прынцыпе цi якiм iншым? Хто ўжо звярнуўся па дапамогу?
— Аказанне падтрымкi ажыццяўляецца як па заяўным прынцыпе, так i па падачы ўдакладняльных дэкларацый у Мiнiстэрства па падатках i зборах Рэспублiкi Беларусь па месцы знаходжання суб'екта гаспадарання. Па стане на 7 лiпеня ў Мiнскай вобласцi задаволена амаль восем тысяч зваротаў, 99 % з iх датычыцца падаткаабкладання.
— Цi рэкамендавана знiжаць стаўкi арэнднай платы на сваiх аб'ектах прыватным арэндадаўцам?
— Мiнскiм аблвыканкамам i рай-, гарвыканкамамi праведзена работа па iнфармаваннi юрыдычных асоб i iндывiдуальных прадпрымальнiкаў аб магчымасцi даваць арандатарам — суб'ектам гаспадарання з улiкам аб'ёму iх выручкi адтэрмiноўку па аплаце арэнднай платы, а таксама змяншаць яе памер. I многiя з iх прымаюць рашэннi па змяншэннi ставак арэнднай платы.
— Якiя пытаннi часцей за ўсё ўзнiкаюць у суб'ектаў гаспадарання па нормах указа?
— У цяперашнi час у суб'ектаў гаспадарання пытаннi па рэалiзацыi нормаў указа амаль адсутнiчаюць. Гэтаму паспрыяла тое, што Мiнаблвыканкам сумесна з мясцовымi i распарадчымi органамi ўлады, iншымi зацiкаўленымi бакамi распрацаваў метадычныя рэкамендацыi ў частцы падаткаабкладання i арэндных адносiн. Яны размешчаны на афiцыйных сайтах Мiнаблвыканкама, райгарвыканкамаў i ў рэгiянальных сродках масавай iнфармацыi. Акрамя таго, на месцах вызначаны спецыялiсты, адказныя за работу па гэтым нарматыўным прававым акце.
— Як памяншэнне памеру падатковых плацяжоў i iх адтэрмiноўка паўплываюць на напаўненне мясцовых бюджэтаў?
— Адтэрмiноўкi плацяжоў — гэта не страты бюджэту, а паступленнi, якiя прыйдуць у казну пазней, калi прадпрыемствы, якiя пацярпелi ад наступстваў пандэмii, пачнуць працаваць на поўную моц.
Што датычыцца недаатрыманых даходаў у сувязi са змяншэннем памеру падатковых плацяжоў, то неабходна сачыць, каб не было разбалансаванасцi бюджэту. У першую чаргу — за кошт змяншэння не першачарговых расходаў. З другога боку, дзяржава ў асобе мясцовых органаў улады iдзе насустрач сумленным суб'ектам гаспадарання, якiя, нягледзячы на часовыя цяжкасцi, працягваюць захоўваць працоўныя калектывы.
Таццяна ЛАЗОЎСКАЯ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?