Вы тут

Грузіны і беларусы ў фаворы: «Лістапад» назваў пераможцаў


Адразу тры ўзнагароды Мінскага міжнароднага кінафестывалю адышлі беларускаму дакументалісту Андрэю Куцілу, Кшыштаф Занусі атрымаў прыз Прэзідэнта «За захаванне і развіццё традыцый духоўнасці ў кінамастацтве», а польская карціна «Цела Божае» стала найлепшым ігравым фільмам з пункту гледжання гледачоў.


Кадр з фільма «Атлантыда».

Учора ў кінатэатры «Масква» на ўрачыстай цырымоніі закрыцця былі падведзены вынікі кінафестывалю «Лістапад». Найлепшай ігравой работай Нацыянальнага конкурсу стала кароткаметражка «Пляж/лес/тамбур» Кірыла Галіцкага і Святланы Казлоўскай, у анімацыі перамагла карціна Алены Пяткевіч «Магістр вольных мастацтваў Францыск Скарына», а ў дакументалістыцы — фільм Summа Андрэя Куцілы.

Апошні ўганараваны таксама прызам Гільдыі кіназнаўцаў і кінакрытыкаў, а другая работа рэжысёра «Стрыптыз і вайна» атрымала Спецыяльны прыз журы ў Асноўным конкурсе дакументальнага кіно «Лістапада». Гран-пры за найлепшы дакументальны фільм у гэты час адышоў кітайскай карціне «Наша машына часу» Яна Суня і С. Леа Чыана.

Найлепшым у конкурсе «Маладосць на маршы» быў названы ўдзельнік з Аўстрыі «Ліліан» Андрэаса Хорвата. Гэты ж фільм сваёй узнагародай адзначыла і журы Міжнароднай федэрацыі кінакрытыкаў FІРRЕSСІ. Прыз глядацкіх сімпатый апроч «Цела Божага» атрымала дакументальная карціна «Эйфарыя быцця» Рэкі Саба з Венгрыі, а ў конкурсе фільмаў для дзіцячай і юнацкай аўдыторыі «Лістападзік» — нямецкая работа «Рока змяняе свет» Каці Бенрат.

Як прыз за найлепшую мужчынскую ролю, так і прыз за найлепшую жаночую ролю атрымалі акцёры грузінскіх фільмаў — адпаведна Леван Гелбахіані з «А потым мы танцавалі» і Саламе Дзямурыя з карціны «Удых-выдах». За найлепшую аператарскую работу ў Асноўным конкурсе ігравога кіно быў адзначаны Кім Хён Сок за кітайскі фільм «Бывай, сын мой», за найлепшы сцэнарый — стужка «Злачынны чалавек» Дзмітрыя Мамуліі (зноў Грузія), за найлепшую рэжысуру — польскае «Цела Божае» Яна Камасы, а таксама Спецыяльны прыз журы.

І нарэшце. Гран-пры «Золата Лістапада» за найлепшы фільм атрымала ўкраінская антыўтопія Валянціна Васяновіча «Атлантыда».

Поўны спіс пераможцаў можна знайсці на афіцыйным сайце кінафестывалю lіstараd.соm, некаторыя ўдзельнікі сёлетняга фестывалю будуць выходзіць у мінскі пракат.

Вольга МІЦКЕВІЧ

Выбар рэдакцыі

Эканоміка

Усё, што трэба ведаць пра змены ў Жыллёвым кодэксе

Усё, што трэба ведаць пра змены ў Жыллёвым кодэксе

Мы паспрабавалі адшукаць самыя вострыя вуглы новаўвядзенняў і ўявіць, як будзе працаваць гэты дакумент пачынаючы з 2020 года.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Як запрасіць чалавека, каб ён не прыйшоў, і знойдзены кашалёк.

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...