Пяць разбітых аўто - вынік п'янай паездкі маладой мінчанкі

ДТЗ здарылася на сталічнай вуліцы Філімонава. 33-гадовая жанчына на “Міцубісі” з прыкметамі алкагольнага ап'янення рухалася з боку 2-га завулка Баграціёна ў напрамку вуліцы Запарожскай.

- Не справіўшыся з кіраваннем, наехала на бардзюрны камень, знесла некалькі пралётаў раздзяляльнай агароджы і выехала на сустрэчную паласу. Там сутыкнулася з аўтамабілем “Даф”, які стаяў у першай паласе. Затым, праехаўшы наперад, вылецела за межы праезнай часткі і сутыкнулася з “Фольксвагенам” і “БМВ”, якія знаходзіліся на гасцявой стаянцы. Ад удару з двума аўто “Міцубісі” адкінула наперад яшчэ і на прыпаркаваную “Ладу”, - паведаміла старшы інспектар па агітацыі і прапагандзе АДАІ Партызанскага РУУС г. Мінска Таццяна Спадабаева.

У выніку ДТЗ усе аўтамабілі атрымалі механічныя пашкоджанні. У дачыненні да мінчанкі было складзена два адміністрацыйныя пратаколы за адмову ад праходжання агляду і за ўчыненне ДТЗ. Пастановай начальніка раённай ДАІ жанчына пазбаўлена права кіравання транспартнымі сродкамі тэрмінам на тры гады. Акрамя таго, ёй прыйдзецца выплаціць вялікую суму штрафу.

• Дарэчы, у гэтым годзе ў сталіцы па віне нецвярозых кіроўцаў здзейснена 11 ДТЗ, у якіх два чалавекі загінулі і 14 атрымалі траўмы рознай ступені цяжкасці.

Дзяржаўтаінспекцыя нагадвае, што, у адпаведнасці дзеючым заканадаўствам, за кіраванне транспартным сродкам асобай, якая знаходзіцца ў стане алкагольнага ап'янення, ці перадачу кіравання транспартным сродкам такой асобе, а таксама адмова ад агляду прадугледжана адміністрацыйная адказнасць у выглядзе штрафу ад 50 да 100 базавых велічынь з пазбаўленнем права кіравання тэрмінам на тры гады. Паўторнае на працягу года такое парушэнне правілаў цягне ўжо крымінальную адказнасць і канфіскацыю аўтамабіля ў незалежнасці ад формы ўласнасці.

Сяргей РАСОЛЬКА

Фота ў мініяцюры: podrobnosti.ua