Вы тут

Старшыня Палаты прадстаўнікоў сустрэўся з кіраўніком місіі Еўрапейскага саюза


Андрэа Віктарын узначальвае прадстаўніцтва ЕС у Беларусі з верасня 2015 года. У гэтыя дні яна завяршае сваю місію ў нашай краіне ў сувязі з прызначэннем у Арменію. Дыпламат учора развіталася са старшынёй і дэпутатамі Палаты прадстаўнікоў.


«Вы, напэўна, ведаеце, што вы заўсёды жаданы госць у парламенце Рэспублікі Беларусь, — вітаў кіраўніка Прадстаўніцтва ЕС Уладзімір Андрэйчанка. — І таму мы сёння са шкадаваннем і нават сумам успрымаем тое, што вы завяршаеце сваю місію ў Беларусі. Шкадуем, бо за час вашай работы вельмі шмат зроблена для вываду адносін нашай краіны з Еўрапейскім саюзам на новы, больш якасны ўзровень».

Адносіны гэтыя, лічыць спікер ніжняй палаты, нармалізаваліся, і самае галоўнае — развіваюцца па многіх кірунках. Важна, што за час работы Андрэа Віктарын адбылося шмат візітаў у нашу краіну высокапастаўленых асоб, парламентарыяў Еўрапейскага саюза.

«Вы бралі вельмі актыўны ўдзел у грамадскім жыцці Беларусі, — заўважыў старшыня Палаты прадстаўнікоў. — Заўсёды былі на ўсіх дзяржаўных святах, вельмі шчыльна працавалі з рэгіёнамі, дапамагалі ім у выкарыстанні грантаў».

Асобна Уладзімір Андрэйчанка спыніўся на міжпарламенцкіх адносінах. «Вы ведаеце, што нашы адносіны сёння, мякка кажучы, на недастатковым узроўні. Тым не менш наша пазіцыя — іх важна развіваць, знаходзіць пункты судакранання, узаемадзеяння. Няхай нашы крокі наперад будуць невялікія, але іх трэба рабіць больш, — сказаў парламентарый. — Еўрапарламентарыі павінны разумець, што так, ёсць сёння адчувальныя пытанні, якія трэба вырашаць, і мы адкрытыя да гэтай размовы, у тым ліку і па пытаннях адмены смяротнага пакарання. Вы ведаеце, што парламент вельмі шчыльна ў гэтым кірунку працуе, нядаўна збіралася рабочая група Савета Еўропы па Беларусі і Азіі, рыхтуемся праводзіць 27 жніўня ў Беларусі сумесны з сакратарыятам Савета Еўропы семінар. Мы ў гэтым кірунку працуем, не трэба нас прыціскаць, падганяць. Думаю, што патрэбны час, і мы выйдзем на пэўнае рашэнне».

Яшчэ адзін важны аспект узаемаадносін з Еўрасаюзам — гандлёва-эканамічны. ЕС з'яўляецца другім па значнасці рынкам для беларускага экспарту. Летась з краін — членаў гэтага інтэграцыйнага аб'яднання прыцягнута 5,4 мільярда долараў інвестыцый, у тым ліку прамых — 4,6 мільярда долараў. «Мы задаволены інвестыцыйным супрацоўніцтвам з Еўропай, лічым, што сёння найлепшыя тэхналогіі — еўрапейскія, — сказаў Уладзімір Андрэйчанка. — Уся наша мяса-малочная прамысловасць працуе на нямецкім і італьянскім абсталяванні. Мы маем намер развіваць гэта. Вы бачыце, што ў апошнія гады парламент зрабіў шмат намаганняў па абароне замежных інвестараў, у цэлым па развіцці бізнесу ў Беларусі».

За апошні час добра развіваліся і гуманітарныя кантакты, супрацоўніцтва ў сферы спорту. Спікер Палаты прадстаўнікоў нагадаў Андрэа Віктарын яе словы пра тое, што да восені або восенню пагадненне паміж Беларуссю і ЕС аб спрашчэнні візавага рэжыму будзе падпісана і адбудзецца візіт у нашу краіну вярхоўнага прадстаўніка ЕС па знешняй палітыцы і палітыцы бяспекі Фредэрыкі Магерыні.

Андрэа Віктарын пагадзілася з тым, што за апошнія чатыры гады адносіны паміж ЕС і Беларуссю прыкметна прасунуліся наперад. «Дзякую вам і кожнаму беларускаму парламентарыю за адкрытасць. Пытанні, якія мы абмяркоўвалі, былі няпростыя, тым не менш вы заўсёды гатовыя да дыялогу, — сказала яна. — У нас было добрае супрацоўніцтва пры абмеркаванні пытанняў правоў чалавека, свабоды сходаў, тэматыкі смяротнага пакарання. Гэтыя тэмы вельмі блізкія для жыхароў Еўрапейскага саюза, і я зноў хачу падкрэсліць вашу гатоўнасць да ўзаемадзеяння».

Прадстаўнік ЕС заявіла: «Мы зацікаўленыя ў тым, каб Беларусь была свабоднай, незалежнай, суверэннай краінай з квітнеючай эканомікай. Краінай, у якой у павазе правы чалавека, забяспечваюцца прынцып вяршэнства права, дэмакратычныя каштоўнасці. І мы жадаем развіваць супрацоўніцтва ва ўсіх сферах. Еўрапейскі саюз пацвярджае і прызнае канструктыўную пазіцыю, якую Беларусь займае на міжнароднай арэне па пытаннях урэгулявання крызісу ва Украіне. Мы прызнаем ваш унёсак у забеспячэнне міру ў вашым рэгіёне. Мы таксама цэнім супрацоўніцтва Беларусі ў рамках «Усходняга партнёрства» і бачым рост зацікаўленасці Беларусі ў гэтым праекце».

Вольга МЯДЗВЕДЗЕВА

Фота БЕЛТА

Загаловак у газеце: Падзяка на развітанне

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.