Пераможца конкурсу маладых выканаўцаў на «Славянскім базары ў Віцебску», народная артыстка Украіны і Інгушэціі, уладальніца ордэнаў Святой Ганны і Святога Мікалая Цудатворца, спявачка, у гонар якой сёлета запалілася новая імянная зорка ў Віцебску, — Таісія Павалій расказала пра ўзрост, калекцыю капялюшыкаў і дуэт з Прэзідэнтам.
— У 1993-м пасля конкурсу я моцна прастудзілася, у мяне не паварочвалася шыя, было вельмі дрэнна, памятаю, што мне калолі анальгін, каб хоць неяк рухалася. І тут Ігар, мой будучы муж, які ўваходзіў у склад украінскай дэлегацыі, грукае ў дзверы: «Тая, уставай, цябе тэрмінова чакаюць у прэс-цэнтры!» У прэзідыуме сядзела Надзея Бабкіна, якая і абвясціла: «Гран-пры — Таісія Павалій!» Захавалася нават відэа, дзе я, забыўшыся на боль, скачу ад радасці. Гэты шчаслівы дзень, першы Гран-пры ў гісторыі конкурсу, мы з украінскай дэлегацыяй адзначалі спачатку ў гасцініцы «Дзвіна», а потым — у зваротным цягніку «Віцебск—Кіеў». Але я ўсё яшчэ не верыла, што гэта адбываецца са мной, у маім жыцці. І толькі калі на пероне ў Кіеве нас сустракалі, здаецца, усе тэлекамеры, уся прэса Украіны, прыйшло разуменне: я — пераможца! Літаральна ў адзін дзень я стала зоркай. Напэўна, гэта тое, аб чым мараць усе артысты: каб вокладкі ўсіх часопісаў выходзілі з тваім фота, а на радыёстанцыях гучала твая песня... Гэта быў узлёт, за які дагэтуль удзячная «Славянскаму базару».
Праз 26 гадоў пасля перамогі Таісія Павалій не толькі помніць кожную нотку сваёй конкурснай песні, але і захоўвае адмысловы капялюшык, у якім скарыла журы і публіку ў Віцебску. У яе наогул сабралася цэлая калекцыя галаўных убораў — самых дарагіх сэрцу каля 20, астатнія артыстка без шкадавання раздорвае. Але гэтак жа часта і набывае новыя капелюшы: «Дзе мяне можна заўжды знайсці, гэта ў аддзеле галаўных убораў».
А яшчэ спявачка беражліва захоўвае дома мноства ручнікоў, найстарэйшы з якіх датуецца 1913-м — і вышыты яе бабуляю. «У прыгожай вышыўцы на гэтым ручніку — дрэвы, карані, птушкі, арнамент — дакладна схаваны нейкі код, і я спрабую разгадаць, які знак падае мой род».
Дарэчы, творчыя гены перадаліся ў спадчыну яе сыну Дзянісу Павалію: ён музыкант-мультыінструменталіст і кампазітар, які піша свой першы альбом.
Цяпер Таісія Павалій не так шмат выступае, бо рыхтуе вялікую сольную праграму, якой хоча адзначыць у Кіеве прыгожы юбілей — у снежні спявачцы будзе 55 гадоў. «60 — гэта ўжо неяк многа, а 55 — самы смак! — смяецца артыстка. — Так што праграма будзе драйвовая, з самымі лепшымі хітамі. Я наогул вельмі люблю спяваць на сцэне, бо ў студыі ўсё здаецца неяк блякла, хочацца перарабіць, а на сцэне тая энергетыка, якая зараджае як след. І не трэба ніякага шоу, хочацца, каб нішто не перашкаджала стасункам са слухачамі. Ведаеце, часта хочацца падысці да кожнага ў зале, узяць за руку і праспяваць толькі для яго, каб перадаць пачуцці».
Многія памятаюць, як Таісія Павалій падчас Купалля ў Александрыі нечакана праспявала разам з Прэзідэнтам Беларусі Аляксандрам Лукашэнкам. «З якімі яшчэ вядомымі палітыкамі вы хацелі б выступіць дуэтам?» — пацікавіліся журналісты. «Амбіцыйная частка мяне ўжо задаволеная, бо дуэт з Аляксандрам Лукашэнкам атрымаўся цудоўны, — мяркуе спявачка. — Ён настолькі абаяльны і чысты чалавек, што спяваць разам было адно задавальненне. Але можам паўтарыць, тым больш тая песня «Вярба» ўкраінскага паэта напісана на музыку беларускага кампазітара, а яе першым выканаўцам быў расійскі калектыў «Самацветы», так што гэта прадукт дружбы народаў. І калі што, я зноў падыду да Аляксандра Рыгоравіча, і мы спяём яе разам!»
Вікторыя ЦЕЛЯШУК
Фота Ганны ЗАНКАВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
