Вы тут

Хто замінае нармальна расці клубніцам?


Асноўныя шкоднікі клубніц — сунічны клешч, малінава-сунічны даўганосік, сунічны лістаед, сунічны пільшчык, смаўжы. Акрамя гэтых можна вылучыць хрушча, дакладней яго лічынкі, і мядзведку.


Сунічны клешч

Вельмі маленькае насякомае, убачыць якое можна толькі ў лупу, з'яўляецца найбольш небяспечным шкоднікам клубніц. Пасяляецца на маладых лістах, якія яшчэ не разгарнуліся і высмоктвае з іх усе сокі. Радзей гэты шкоднік пасяляецца на бутонах, кветках і ягадах. Лісты становяцца зморшчанымі, недаразвітымі, з ненармальна жаўтлявым адценнем. Ягады з кустоў, пашкоджаных кляшчом, робяцца кіслымі. Ён размнажаецца ў другой палове лета. Перапаўзае з заражаных кустоў на вусы тым самым заражаючы расаду.

Як распазнаць ворага?

1. Варта звярнуць увагу на лісты, якія становяцца недаразвітымі, зморшчанымі і жоўкнуць.

2. Кусты, пашкоджаныя кляшчом, становяцца карлікавымі, зніжаюць плоданашэнне. Агульная карціна выразна вымалёўваецца ў канцы плоданашэння.

3. З дапамогай лупы варта агледзець маладыя лісты. На заражаных можна разгледзець шкоднікаў, якія збіраюцца ў вялікіх колькасцях у складках лістоў.

Шкоднік мае цела даўжынёй каля 0,2 мм шклопадобнага жаўтлявага колеру. Лічынкі белага колеру. Актыўна размнажаецца пры вільготным, цёплым надвор'і. На працягу лета развіваюцца чатыры пакаленні, і са з'яўленнем маладых вусоў клешч перабіраецца на іх.

Меры барацьбы

1. Каб не распаўсюджваць кляшча, трэба вылучыць заражаныя ўчасткі і не браць з іх расаду.

2. Пасля збору ўраджаю варта скасіць лісце клубніц і неадкладна яго спаліць. Скошаныя кусты багата паліць і падкарміць угнаеннямі.

3. Старыя, заражаныя плантацыі знішчыць, і не закладаць новыя плантацыі побач са старымі на працягу 4—5 гадоў.

4. Варта строга выконваць агратэхніку, ранняй вясной збіраць і спальваць старое лісце, не дапускаць загушчанасці, выполваць пустазелле, рыхліць глебу і праводзіць падкормкі мінеральнымі ўгнаеннямі.

5. Ранняй вясной і пасля збору ўраджаю, скошвання і знішчэння старога лісця правесці апырскванне інсектыцыдамі.

6. Высаджваць толькі здаровую расаду. Калі ёсць падазрэнні, што расада заражаная, — правесці тэрмічную апрацоўку.

Абеззаражанне расады шляхам прагравання ў гарачай вадзе: карані расады трэба адмыць ад зямлі і патрымаць у гарачай вадзе (46º) на працягу 12—13 хвілін, а затым спаласнуць прахалоднай вадой. Затым расаду густа распікіраваць на адведзеным участку і добра даглядаць: прыцяніць, падкарміць, паліваць. Калі яна прыжывецца і ўтворыць новыя лісты, яе можна высаджваць на пастаяннае месца. Калі ёсць падазрэнне на заражэнне, то лепш наогул не высаджваць.


Малінава-сунічны даўганосік

Маленькі чорны жучок, які пашкоджвае кветкі суніц. Увесну самка адкладвае яйкі ў бутоны суквеццяў, падгрызае кветаножкі ў бутонаў, якія падсыхаюць і не развіваюцца. Чарвячок па выхадзе з яечка, сілкуецца бутонам.

Маладыя жучкі сілкуюцца няспелымі ягадамі, што выклікае іх недаразвітасць. У сярэдзіне лета жучкі перасяляюцца на маліну.

Меры барацьбы

1. Не саджайце маліну побач з клубніцамі!

2. Увесну праводзіць апрацоўку прэпаратамі-інсектыцыдамі.


Сунічны лістаед

Часам на лісці клубніц з'яўляюцца пашкоджанні ў выглядзе хадоў і скразных адтулін, выедзеных у мякаці ліста так, што застаецца толькі ніжняя скурка. Гэтыя пашкоджанні наносіць сунічны лістаед, жоўта-буры жук даўжынёй 3—4 мм.

Жукі зімуюць пад расліннымі рэшткамі. Рана вясной, выйшаўшы з зімоўкі, яны пачынаюць есці лісце клубніц. А перад цвіценнем адкладваюць яйкі ў ніжняй частцы лісцяў, а таксама на хвосціках і сцёблах. Праз 10—15 дзён з яек вылупляюцца лічынкі і пачынаюць есці мякаць ліста. Праз 20—25 дзён лічынкі сыходзяць неглыбока пад зямлю і там акукліваюцца. Маладыя жукі з'яўляюцца пасля плоданашэння.

Меры барацьбы

1. Увесну правесці апрацоўку прэпаратамі-інсектыцыдамі.

2. Вялікае значэнне мае рыхленне глебы пад кустамі, якое праводзіцца ў канцы плоданашэння, што выклікае частковую гібель кукалак.


Смаўжы

Смаўжы пашкоджваюць расліны па начах, а часам і днём, у сырое, пахмурнае надвор'е. Асабліва церпяць моцна загушчаныя пасадкі, а таксама расліны, якія растуць у нізкіх месцах і зарослыя пустазеллем.

Меры барацьбы

Для знішчэння смаўжоў лепш за ўсё праводзіць апыленне пашкоджаных імі раслін і глебы вакол іх свежагашанай вапнай, размеленым суперфасфатам або попелам.

Ад запаўзання смаўжоў градку можна абараніць палоскай 15—20 см з вапны, суперфасфату або тоўчанага жалезнага купарвасу. Але часта гэтыя меры не прыносяць ніякай карысці, асабліва ў дажджлівае халоднае лета.

Загаловак у газеце: Шкоднікі клубніц

Выбар рэдакцыі

Эканоміка

У Брэсцкай вобласцi першымi ўкаранiлi практыку выязных прыёмаў дзяржрэгiстратараў

У Брэсцкай вобласцi першымi ўкаранiлi практыку выязных прыёмаў дзяржрэгiстратараў

Хто валодае нерухомай маёмасцю альбо ўчасткам зямлi, ведае, як важна мець адпаведныя дакументы на сваю ўласнасць.

Эканоміка

Як генафонд раслін адаптуецца да змен клімату

Як генафонд раслін адаптуецца да змен клімату

Работа па вывучэннi генетычных рэсурсаў раслiн у Беларусi была пачата яшчэ ў 20-я гады мiнулага стагоддзя.

Грамадства

Паэт Iван Юркiн: З жонкай упершыню пацалаваўся ў дзень вяселля 47 год таму

Паэт Iван Юркiн: З жонкай упершыню пацалаваўся ў дзень вяселля 47 год таму

Песнi на вершы Iвана Юркiна карыстаюцца вялiкай папулярнасцю. Хто не ведае гiмна гасцiннасцi нашай краiны — «Прыязджайце да нас у Беларусь»? Вось таму было цiкава пазнаёмiцца з музай паэта — яго жонкай Надзеяй Iванаўнай. 

Грамадства

Колькасць «супрацьпрышчэпачнiкаў» змяншаецца, бо вакцыны даказваюць сваю эфектыўнасць

Колькасць «супрацьпрышчэпачнiкаў» змяншаецца, бо вакцыны даказваюць сваю эфектыўнасць

Сусветны тыдзень iмунiзацыi сёлета пройдзе з 24 да 30 красавiка пад лозунгам #Vaccines Work for AN# — «За агульны доступ да эфектыўных вакцын».