Імклівае развіццё тэхналогій сказваецца і на адным з самых тэхналагічных відаў мастацтва – кіно. Працэс стварэння фільма таннее і спрашчаецца, таму патэнцыйныя аўтары могуць зрабіць свае першыя крокі ў кінаіндустрыі дзякуючы звычайнаму тэлефону. Міжнародны фестываль мабільнага кіно velcom Smartfilm бярэ гэты прынцып на ўзбраенне і абвяшчае свой восьмы сезон: з 20 лістапада кандыдаты могуць прапаноўваць свае фільмы да ўдзелу. Галоўныя патрабаванні: работы павінны быць знятыя на тэлефон, а іх хронаметраж не можа перавышаць дзесяці хвілін.
Тэма гэтага году дае ўдзельнікам пэўную свабоду: “Заснавана на рэальных падзеях”, здаецца, аўтараў амаль не абмяжоўвае. Заяўкі будзе разглядаць прафесійнае журы, у склад якога ўвайшлі добра вядомыя ў кінаіндустрыі праграмны дырэктар кінафестывалю “Лістапад” Ігар Сукманаў, каардынатар Нацыянальнага конкурса на “Лістападзе” Мікалай Лаўрэнюк, кінакрытыкі Ганна Яфрэменка і Антон Сідарэнка, кінажурналіст Тарас Тарналіцкі, прадзюсар Леанід Каліценя.
Свайго пераможцу будзе выбіраць і так званае народнае журы пад кіраўніцтвам рэжысёра Улады Сяньковай, у склад якога тэарэтычна можа трапіць кожны жадаючы – дастаткова толькі прайсці спецыяльны тэст на афіцыйным сайце фестывалю smartfilm.by.
Удзельнікі будуць змагацца за Гран-пры, першую, другую і трэцюю прэміі фестывалю, а таксама за званне “Найлепшы баёпік” і “Найлепшы сцэнарый, заснаваны на рэальных падзеях”. Пераможцам будуць уручаны грашовыя прызы і падарункі, у тым ліку смартфоны, ад генеральнага партнёра Smartfilm’а кампаніі Huawei.
Падаваць свае заяўкі на ўдезл – то бок знятыя на камеру мабільнай прылады фільмы – можна да 29 снежня, а вынікі будуць падведзены 31 студзеня ўжо новага года. Пераможцы і работы з шорт-ліста фестывалю будуць даступныя для прагляду на сайце праекта VOKA.
Апроч конкурсу Smartfilm прадугледжвае таксама шэраг мерапрыемстваў, напрыклад, спецыяльны паказ карціны “Халодны фронт” і вечарыну з удзелам актрысы, што ў ім сыграла, Дар’і Чарнушы. На івэнты фестывалю можна трапіць бясплатна па папярэдняй рэгістрацыі.
Фестываль арганізуе кампанія velcom пры падтрымцы Міністэрства культуры.
Сафія ПАЛЯНСКАЯ
Сумесныя праекты ядзерных тэхналогій.
