Зборнік выбраных руска- і крыху беларускамоўных вершаў Сабіны Брыло «Это буквы» ўжо сваёй назвай дае зразумець, што шукальнікам глыбіннага сэнсу ў паэзіі будзе адначасова вельмі цікава і незразумела. Але таямнічыя сэнсы шукаць не варта: вершы С. Брыло простыя і прамыя, іх нават можна назваць своеасаблівымі дзённікавымі запісамі. Адны больш інтымныя, пачуццёвыя, іншыя — пра калготкі, якія вісяць на крэсле. І вобразы, і метафары ў асноўным побытавыя, «жыццёвыя».
Сабіна Брыло не ставіць мэту ўразіць чытача хітрым паэтычным радком або мудрагеліста замаскіраваць свае любоўныя праблемы пад дываном з метафар пра высокае. Яна быццам піша як ёсць, як прыйшло ў галаву, як сцягнулі з канапы пасярод дня за ручкай з нататнікам. Многія вершы нібы не скончаныя ці быццам кінутыя на паўслове, нібы перарваная думка, якая і ў поўным варыянце пакінула б больш пытанняў, чым адказаў, а зараз і зусім нядобра чапляе сваёй нявызначанасцю. Тыя, хто любіць даступныя і «агульназразумелыя» вершы, хутчэй за ўсё, не будуць задаволены.
Але зборнік С. Брыло каштоўны не ступенню чыстага разумення яго чытачом. Ён каштоўны непатрабавальнай шчырасцю, непрыхаванай непрыгожасцю чалавечага жыцця і няўрымслівасцю думкі. Спалучэнне гэтае вельмі своеасаблівае:
Когда кто-то другой любит того, кого любишь ты —
Это невыносимо и кажется несправедливым.
По логике текста, здесь должно быть какое-то «но» —
Но я не знаю, какое, — и его здесь нету.
Чытаючы такую паэзію, можна або абурана адкінуць кніжку ўбок са словамі: «Аўтар наогул дбаў пра форму, пра ідэю?»; або ашалела саскочыць ужо са сваёй канапы і закрычаць: «Вось яно! Я гэта разумею, я гэта адчуваю!».
Тэма любві — рамантычнай, сексуальнай, сямейнай, да сябе — праходзіць праз увесь зборнік. Яе вечна не хапае, але яна нясцерпна патрэбная. І да такой ступені, што лірычная гераіня гатова хоць параўноўваць сябе з ежай у халадзільніку, хоць марыць пра тое, каб стаць гасцініцай: абы ўпусціць у сябе як мага больш людзей.
Если бы я была домом,
И у меня был выбор —
Каким домом мне быть, —
Я бы сделала выбор
Не в пользу семейного дома —
Я бы стала гостиницей.
У камплекце з «вечнымі тэмамі» ідзе вобраз маці і жанчыны — і часцей ён сумны, варты жалю або зусім жудасны. Ён настолькі прасякнуты пахам варыўні, бытавухай і чужым непатрэбным успрыманнем «цябе», што робіцца маркотна, калі ўспамінаеш: так і жывём. Заўсёды холадна, заўсёды ежа (ці ты яе, ці ты — яна, нават калі са згоды), заўсёды трэба імкнуцца быць некім іншым, не сабой.
когда ты спрашиваешь:
ну, что опять задумалась? —
я думаю, есть ли еще в мире
хотя бы одна шутка,
которой не нужно подыгрывать.
Рамантызацыі ў вершах С. Брыло няма. І калі паглядзець на зборнік строга, забыўшыся на хвіліну пра лірыку і паэтычныя ўздыхі, то «Это буквы» — кніга пра дэпрэсію. Гераіня з верша ў верш дэманструе фармальныя прыкметы чалавека ў дэпрэсіі: увесь час ляжыць, сябе не глядзіць, нават сіл прычасацца ў яе няма. Увесь зборнік — як адно вялікае чаканне чагосьці, безэмацыянальные, пазбаўленае сэнсу.
Загалоўны верш зборніка на самай справе ўяўляе сабой вельмі паказальную сітуацыю кантэкстуальнай інтэрпрэтацыі. А таксама — найлепшага ў паэзіі Сабіны Брыло. Нейкай калі не самаіроніі, то самасумленнасці. Маўляў, я магу напісаць пра што пажадаю. І пра боль, і пра цэтлікі, і пра тое, як неабходна заставацца сабой у свеце, які абавязкова чакае ад цябе таго, што ты не можаш і не хочаш рабіць.
Когда все это
Все это
Все
Превращается в буквы —
Смотришь на буквы,
Думаешь: это буквы.
Верш нібы расшыфроўвае назву зборніка, у ім гераіня нібы папярэджвае: тут можа і не быць тых патаемных сэнсаў, якія вы хочаце ўбачыць. Пачуцці, пакладзеныя на літары, — гэта проста літары. Аўтар вельмі сумленная ў гэтым плане: яна як бы і не прэтэндуе на ўрачыстае ўнясенне сваіх твораў у спіс Высокай Паэзіі. Яна проста выдала зборнік літар, якія, магчыма, штосьці для яе значаць і якія, магчыма, не значаць нічога для кагосьці іншага. І гэта па-свойму займальна: як прыйсці на ўрачыстую вячэру ды замест шыкоўных страў убачыць на стале засохлы хлеб, недаедкі ад снедання... І не прыдрацца — труфеляў ніхто і не абяцаў.
Гэты верш хутчэй пра дысацыяцыю, чым пра сэнс і тое, з якім узрушэннем мы шукаем яго ў чужых літарах:
Между добром и злом — выбрал меня.
Не лучшее, но, слава Богу — не вечное.
Валерыя ДЗЯТКОВА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?