Украіна вызначылася са слоганам і дызайнам лагатыпа сёлетняга міжнароднага песеннага конкурсу. Краіна-гаспадыня «Еўрабачання-2017» сустрэне гасцей заклікам Celebrate Dіversіty — «Адзначаем разнастайнасць».
Як заўважыў выканаўчы прадзюсар конкурсу Ён Ола Санд, гэты слоган дапаўняе леташнюю тэму Come Together («Аб'яднацца») і ляжыць у аснове каштоўнасцяў «Еўрабачання», адначасова аб'ядноўваючы жыхароў розных краін і падкрэсліваючы ўнікальнасць кожнай з іх. Заклік дапоўнены адметным лагатыпам, заснаваным на традыцыйных украінскіх каралях — намісце (у фальклорнай традыцыі гэта адначасова традыцыйнае жаночае ўпрыгажэнне і абярэг, сабраны з мноства розных пацерак, — сімвал прыгажосці і здароўя).
Таксама днямі Кіеў атрымаў ад папярэдняй сталіцы «Еўрабачання» Стакгольма сімвалічныя ключы ад конкурсу. Крыху пазней адбылася папярэдняя жараб'ёўка краін-удзельніц, паводле якой прадстаўнік Беларусі, гурт Navіband, выступіць на конкурсе ў другой палове другога паўфіналу 11 мая. Кампанію беларусам складуць прадстаўнікі яшчэ 18 краін: Аўстрыі, Балгарыі, Венгрыі, Даніі, Ізраіля, Ірландыі, Літвы, Македоніі, Мальты, Нарвегіі, Нідэрландаў, Расіі, Румыніі, Сан-Марына, Сербіі, Харватыі, Швейцарыі і Эстоніі.
Нагадаем, удзел у сёлетнім конкурсе песні «Еўрабачанне», які пройдзе ў Кіеве з 9 па 13 мая, пацвердзілі 43 краіны.
Вікторыя ЦЕЛЯШУК
Летась зафіксавана зніжэнне колькасці выпадкаў гібелі на вытворчасці.
Карэспандэнты «Звязды» пабачылі, як праходзяць рэпетыцыі.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
