У Міністэрстве інфармацыі краіны пад кіраўніцтвам першага намесніка міністра Ігара Луцкага прайшло пасяджэнне аргкамітэта па правядзенні 24-й Мінскай міжнароднай кніжнай выстаўкі-кірмашу.
Несумненна, прыярытэтнымі кірункамі ў арганізацыі і правядзенні свята кнігі, якое пройдзе 8—12 лютага 2017 года, стануць 500-годдзе беларускага кнігадрукавання, юбілеі класікаў беларускай літаратуры — народных паэтаў Беларусі Якуба Коласа, Янкі Купалы, Пімена Панчанкі, народнага пісьменніка Беларусі Янкі Брыля.
Краінай — ганаровым госцем на выстаўку запрошана Вялікабрытанія. Варта ўспомніць, што ў нас традыцыйна ўмацоўваліся беларуска-англійскія літаратурныя сувязі. У Мінску выйшла нямала кніг пісьменнікаў Вялікабрытаніі на беларускай і рускай мовах. Творы Васіля Быкава, Івана Шамякіна, Янкі Брыля, нашых айчынных класікаў перакладзены на англійскую мову.
Саюз пісьменнікаў Беларусі і Выдавецкі дом «Звязда» пры падтрымцы міністэрства інфармацыі рыхтуюць правядзенне ў час выстаўкі-кірмашу традыцыйнага Міжнароднага сімпозіума літаратараў «Пісьменнік і час». Папярэднюю згоду прыняць у ім удзел выказалі празаікі, паэты, драматургі, публіцысты больш як з дзесяці краін свету. Пройдзе ў лютым і семінар маладых пісьменнікаў. Арганізатары гэтага творчага праекта — Міністэрства інфармацыі краіны, Саюз пісьменнікаў Беларусі, Выдавецкі дом «Звязда», выдавецтва «Мастацкая літаратура».
Кастусь Лешніца
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
