У Мінску адкрыўся ІХ Беларускі міжнародны медыяфорум «Партнёрства ў імя будучыні: рэаліі глабальнага свету». Сёлета ў ім прымае удзел каля 500 чалавек з 26 краін.
У рамках форуму пройдуць самыя розныя мерапрыемствы — ад эксперт-сесій да «Летняй школы журналістыкі», на якой ахвотныя змогуць наведаць майстар-класы вядомых рэпарцёраў, вядучых, аналітыкаў краін блізкага і далёкага замежжа.
Лілія АНАНІЧ, першы намеснік міністра інфармацыі Рэспублікі Беларусь, падчас учарашняй размовы з журналістамі заўважыла, што пад медыяфорумам трэба разумець сур'ёзнае абмеркаванне актуальных праблем развіцця сучаснага свету. «На пленарным пасяджэнні мы чакаем змястоўных дыскусій па тэме геапалітыкі, сусветнай эканомікі, журналістыкі», — заявіла яна. Лілія Ананіч лічыць, што ў сённяшніх умовах СМІ павінны аб'яднаць свае намаганні па замацаванні гуманітарнага супрацоўніцтва і накіраваць іх на рашэнне самых складаных задач.
Першы намеснік міністра інфармацыі таксама акцэнтавала ўвагу на тым, што далёка не заўсёды масмедыя служаць мірным мэтам. «На жаль, сёння СМІ з дапамогай новых тэхналогій часта ўключаюцца ў інфармацыйныя войны. Думаю, на форуме ў Мінску пойдзе сумленная, шчырая, адкрытая размова пра журналістаў, ролю журналістыкі, неабходнасць падаваць праўдзівую інфармацыю, якая служыла б умацаванню ўзаемаразумення, міру, дружбы паміж народамі», — выказала спадзяванні Лілія Ананіч.
Беларускі міжнародны медыяфорум — унікальны праект на прасторы СНД. Ён праводзіцца штогод, пачынаючы з 2006 года. За гады свайго існавання форум стаў знакавай пляцоўкай для абмену думкамі, выпрацоўкі новых ідэй і канцэпцый з удзелам экспертаў у галіне сродкаў масавай інфармацыі па важнейшых праблемах сучаснасці. Яго тэматыка закранала самыя розныя праблемы — сацыяльную адказнасць СМІ, ролю масмедыя як сродку прадухілення выклікаў і пагроз ХХІ стагоддзя, гісторыка-культурную спадчыну як фактар яднання... Сярод пытанняў, якія абмяркуюць эксперты сёлета, вылучаюцца наступныя: «Суверэнізацыі і інтэграцыя. Еўразійскі эканамічны саюз як платформа стварэння новага свету», «Сусветная камунікацыя ў кантэксце шматпалярнага свету», «Выклікі і пагрозы XХІ стагоддзя. Роля міжнароднай супольнасці ў прадухіленні канфліктаў і войнаў».
Надзея ЮШКЕВІЧ.
Сумесныя праекты ядзерных тэхналогій.