Ад студэнтаў — да пенсіянераў: у Брэсце дружна наводзяць прыгажосць

Зараз у Брэсце квітнеюць садовыя дрэвы, зелянее трава, распускаюцца лісце, два-тры тыдні таму ў горадзе пачаліся масавыя акцыі па ўборцы тэрыторыі і навядзенні парадку пад эгідай гарвыканкама і яго старшыні Сяргея Лабадзінскага. Мэр пастаянна выкладваў справаздачы ў тэлеграм-канале і адзначаў актыўных.

У працоўных дэсантах па ўборцы любімага горада ўдзельнічалі многія працоўныя калектывы, установы і арганізацыі. Асабліва масавай стала акцыя па расчыстцы ляснога масіву паблізу абласной бальніцы. На самай справе пры ўездзе ў горад з боку трасы М1 размешчаны цэлы шэраг медыцынскіх устаноў, якія аб’яднаны ў своеасаблівы медыцынскі гарадок. Ён знаходзіцца ў даволі маляўнічай лясной мясцовасці. У добрае надвор’е ў цёплы час года тут гуляюць пацыенты, якія дыхаюць чыстым паветрам. А каб лясны масіў быў прывабным ва ўсіх адносінах, і патрэбныя такія ўборкі, якая адбылася 23 сакавіка. Тады на працу выйшлі пад сотню чалавек.

Завадатарамі сталі дэпутаты гарадскога савета, супрацоўнікі гарвыканкама і адміністрацый абодвух раёнаў Брэста. Прыйшлі прадстаўнікі грамадскіх арганізацый і палітычных партый. Была задзейнічана тэхніка камунальнай службы. Людзі чысцілі лес ад паваленых дрэў, галін, сухога ламачча, грузілі пералічанае на прычэпы. Заадно збіралі смецце.

Асаблівая ўвага надавалася памятным мясцінам, месцам пахаванняў, памятным знакам. У адзін з дзён ля мемарыяльнай дошкі ў гонар пісьменніка Сяргея Смірнова і памятнага знака 7800 воінам Чырвонай Арміі, якія загінулі ў 1942-1943 годзе ў лагеры «чырвоныя казармы», сабраліся актывісты Саюза моладзі і Брэсцкага дзяржаўнага абласнога вучылішча алімпійскага рэзерву. Хлопцы падчас свайго суботніка навялі парадак у ваколіцах, сабралі смецце, выграблі леташнюю лістоту і галінкі, а таксама вычысцілі пліту і мемарыяльную дошку.

Асабліва адзначыў старшыня гарвыканкама старанне школьнікаў. 26 сакавіка на навядзенні парадку працавалі вучні і педагогі школ № 3, 4, 12, 22, 25, 26 Маскоўскага раёна. Дзеці не толькі прыбіралі, але і садзілі саджанцы дрэў і кустоў, рыхтавалі да сезону кветнікі.
Ініцыятыву падтрымалі 35 студэнтаў факультэта замежных моў Брэсцкага дзяржаўнага ўніверсітэта імя А. С. Пушкіна, яны правялі працоўную акцыю на карысць роднага горада. Да іх далучыліся супрацоўнікі тэрытарыяльнага цэнтра сацыяльнага абслугоўвання насельніцтва Маскоўскага раёна абласнога цэнтра. Разам яны наводзілі парадак у лясным масіве насупраць абласной бальніцы. На наступны дзень працавалі ўжо студэнты фізіка-матэматычнага факультэта названага ўніверсітэта, супрацоўнікі Брэстадаканала, Брэсцкага цэнтра стандартызацыі, метралогіі і сертыфікацыі, прадпрыемстваў «Брэсцкі мясакамбінат», «Брэсцкі пекар», прадпрыемстваў свабоднай эканамічнай зоны «Брэст». Пералік можна працягваць. Мэр Брэста адзначае кожны працоўны калектыў, які ўдзельнічае ў добрай справе. Дарэчы, ён сам і старшыня гарадскога савета Андрэй Філановіч удзельнічалі ў некалькіх рабочых акцыях.

Актывісты арганізацыі ветэранаў працы Ленінскага раёна прынялі ўдзел у месячніку па добраўпарадкаванні. Ветэраны раёна на чале са сваім лідарам Надзеяй Палта прыбралі магілы Герояў Савецкага Саюза Сушанава, Козырава, Вавілава, Пазнякова і іншыя пахаванні на гарнізонных могілках.

Важна, што справу навядзення парадку падтрымліваюць не толькі члены працоўных і навучальных калектываў, прадстаўнікі грамадскіх арганізацый, але і асобныя гараджане. Прыклад падаюць пенсіянеры. Некаторыя з надыходам вясны прыбіраюць двары, тэрыторыю вакол пад’ездаў, высаджваюць кветкі. Такія, напрыклад, як Лідзія Пятрова. Каля пад’езда свайго дома па вуліцы Луцкай на невялікім кавалку зямлі яна абсталявала квітнеючы сад. Там растуць ружы, нарцысы, шмат іншых кветак. Другога красавіка на клумбе ўжо расцвілі ружовыя цюльпаны. Лідзія Дзмітрыеўна чалавек вельмі сціплы, таму фатаграфавацца адмовілася. Яна сказала, што кветкі яе радуюць, таму яна і садзіць іх, і дадала, што зрабіць вось такі куток прыгажосці каля свайго дома пад сілу кожнаму.
 

Святлана Яскевіч.
Фота тэлеграм-канала Брэсцкага гарвыканкама.