У першай сесіі Мінгарсавета новага склікання ўзялі ўдзел Старшыня Савета Рэспублікі, упаўнаважаны прадстаўнік кіраўніка дзяржавы ў Мінску Наталля Качанава, старшыня Мінгарвыканкама Уладзімір Кухараў, памочнік Прэзідэнта — інспектар па горадзе Мінску Аляксандр Барсукоў.
Наталля Качанава адзначыла, што стаць дэпутатам — высокі гонар, звярнуўшы ўвагу таксама на тое, што прадстаўнікі дэпутацкага корпуса сталіцы ўвойдуць у склад УНС. «Не магла сёння не прыйсці, каб сказаць добрыя словы віншаванняў. За кожным з вас стаіць вялікая колькасць людзей, якія жывуць у Мінску. І той давер, які вам аказалі, — вялікая адказнасць. Але, паверце, гэта вельмі цікавая работа».
Спікер адзначыла, што важна ў няпростых умовах турбулентнасці захаваць краіну. «Калі мы праводзім такія электаральныя кампаніі, калі людзі падтрымліваюць уладу сваім удзелам у іх, сведчыць аб тым, што мы робім абсалютна ўсё для таго, каб наша краіна развівалася, жыла ў міры і спакоі. Як важна сёння менавіта гэта. Менавіта гэты пасыл, які яшчэ, можа, дзесяць гадоў таму камусьці здаваўся банальным, — адзначыла Наталля Качанава. — Ізноў бразгаюць зброяй, ідзе істэрыя, нагнятанне, узбраенне, назапашванне войскаў на нашых межах... Мы як ніколі павінны быць адзіныя ў сваіх парывах захаваць тыя заваёвы, якія дасягнулі за гэты невялікі прамежак у гісторыі краіны. Бо ён невялікі насамрэч.
А колькі зроблена! Паглядзіце, якая цудоўная краіна! Чыстая, дагледжаная, шчаслівая. Сёння мы можам рэалізаваць усе свае магчымасці».
Наталля Качанава пажадала дэпутатам, каб іх праца была ім да спадобы, а таксама поспехаў, удачы. Са свайго боку Савет Рэспублікі акажа народным выбраннікам усялякую падтрымку. Галоўнае — не быць абыякавымі да таго, што адбываецца. «Будзем працаваць сумесна, каб рэалізоўваць тыя задачы, якія ставіць перад намі кіраўнік дзяржавы. Яны жыццёвыя, ідуць ад зямлі, не надуманыя — для таго, каб краіна развівалася, народ жыў добра», — адзначыла спікер.
На першай сесіі дэпутаты выбралі старшыню гарсавета. Ім стаў Арцём Цуран, які да нядаўняга часу быў намеснікам старшыні Мінгарвыканкама
Як адзначыў Аляксандр Хіжняк, адзін з выбраных дэпутатаў, пры выбары кандыдатуры старшыні Мінгарсавета ўлічваліся яго аўтарытэтнасць не толькі ў дэпутатаў, але і ў кіраўніцтва Мінскага гарадскога выканаўчага камітэта, вопыт грамадскай работы, у тым ліку дэпутацкі, практычны і кіраўніцкі вопыт.
«Дзейнасць старшыні заўсёды знаходзіцца навідавоку — на яго раўняюцца, ад яго чакаюць прыняцця рашэнняў», — дадаў Аляксандр Хіжняк.
Арцём Цуран падзякаваў за давер. «Сёння ў зале сабраліся людзі, якім неабыякавы лёс свайго горада, яркія прадстаўнікі самых розных сфер дзейнасці, палітычных перакананняў, прафесій і ўзроўню адукацыі, актыўныя ўдзельнікі дзяржаўнага курсу, які рэалізуецца ў краіне. Канстытуцыяй Рэспублікі Беларусь — галоўным дакументам нашай краіны — нам прадпісаны кампетэнцыі, якія непасрэдна ўплываюць на дабрабыт грамадзян, развіццё эканомікі горада. Гэта зацвярджэнне праграм сацыяльна-эканамічнага развіцця, мясцовых бюджэтаў і справаздач аб іх выкананні, устанаўленне мясцовых падаткаў, вызначэнне парадку кіравання і распараджэння камунальнай уласнасцю і іншае», — адзначыў ён.
Па словах Арцёма Цурана, дзякуючы ўдзелу ў выбарчай кампаніі найвышэйшых прафесіяналаў, дасведчаных кіраўнікоў ёсць усе падставы меркаваць, што сістэма кіравання горадам атрымае новы імпульс для стымулявання эканамічнага росту.
«У адной звязцы з выканаўчай уладай горада і краіны выбудуем эфектыўную сістэму каардынацыі рэальнага сектара эканомікі і сацыяльнай сферы. Эканоміка, напаўненне, размеркаванне бюджэту — важныя кірункі дзейнасці Савета. Але ў цэнтры ўвагі — мінчане, сотні тысяч людзей, якія жывуць, працуюць, вучацца, займаюцца спортам... Мы, дэпутаты Мінгарсавета, павінны ставіць наперадзе ўсяго клопат аб нашых жыхарах, рашэнне праблем і задач, якія стаяць перад уладай горада, якія патрабуюць найглыбейшага вучэння, нетрывіяльнага падыходу», — заявіў Арцём Цуран.
Ён абазначыў асноўныя кірункі дзейнасці Мінгарсавета: дапамагчы канкрэтнаму чалавеку, выручыць, падтрымаць.
«Прыём грамадзян нам неабходна максімальна наблізіць да месца жыхарства. Няма патрэбы арганізоўваць прыёмныя гадзіны, сумешчаныя з прыёмнымі гадзінамі кіраўніка па месцы асноўнай працы. Удзел у адзіным дні дэпутата, прамыя лініі, цеснае супрацоўніцтва з рэгіянальнымі СМІ — няпоўны пералік інструментарыя, які дазваляе не адрывацца ад зямлі, праблем акругі», — адзначыў Арцём Цуран.
Асобна ён спыніўся на супрацоўніцтве з камітэтамі грамадскага самакіравання.
«Гэтыя людзі ведаюць усё аб сваіх дамах, дварах, суседзях, — дадаў старшыня Мінгарсавета. — Сутнасць простая — стварыць супольнасці неабыякавых людзей унутры кожнай акругі. Ініцыятыўныя рашэнні акруговага Савета трэба стымуляваць рэальнымі справамі. У горадзе створаны ўсе ўмовы для прасоўвання мясцовых ініцыятыў».
Арцём Цуран звярнуў увагу на тое, што 29-е скліканне пачынае работу ў Год якасці і ў перыяд важнай электаральнай кампаніі. «Ад асабістага ўдзелу кожнага з нас у гэтых працэсах будзе залежыць ацэнка насельніцтвам работы ўсяго Мінгарсавета і ўлады ў цэлым», — сказаў ён.
Старшыня Мінгарвыканкама Уладзімір Кухараў падкрэсліў важнасць сумеснай працы. Агульная задача — зрабіць жыццё ў Мінску больш камфортным. Таксама важныя зносіны з жыхарамі і данясенне аб’ектыўнай, праўдзівай інфармацыі.
«Арцём Мікалаевіч — чалавек вопытны, які ведае падрыхтоўку нарматыўных дакументаў і зможа арганізаваць работу Мінгарсавета на належным узроўні», — адзначыў Уладзімір Кухараў.
Акрамя выбрання старшыні, падчас сэсіі дэпутатаў вырашылі і інўыя арганізацыйныя пытанні.
У чым бачаць сваю ролю нававыбраныя дэпутаты Мінскага аблсавета.
У нававыбраных дэпутатаў, якіх на выбарах падтрымалі іх выбаршчыкі, пачынаецца перыяд плённай работы, у якой яны павінны зрабіць акцэнт на вырашэнні праблем, што хвалююць грамадзян. Гэтыя і іншыя не менш важныя задачы былі агучаны на пасяджэнні першай сесіі Мінскага абласнога Савета дэпутатаў. У яе рабоце прыняў удзел старшыня Мінаблвыканкама Аляксандр Турчын.
«Многія з вас узначальваюць працоўныя калектывы, вы жывяце ў населеных пунктах, камунікуеце з людзьмі, і для нас вельмі важная зваротная сувязь. Каб вырашэнне актуальных для нашых грамадзян пытанняў апярэджвала іх звароты ў вышэйстаячыя арганізацыі і на прыёмы. Мы павінны адчуваць і разумець, што ў нас адбываецца, каб аператыўна выконваць гэту работу. Работа сесій павінна будавацца так, каб дэпутаты маглі абазначаць праблематыку акруг», — звярнуўся да дэпутатаў Аляксандр Турчын.
Ён таксама зазначыў, што, акрамя службовых абавязкаў, якія выконваюць прадстаўнікі актыву, у іх ёсць яшчэ і вялікая грамадская нагрузка. Таму для дэпутата важная актыўная жыццёвая пазіцыя, каб ён мог агучыць пытанні, якія неабходна вырашаць для паляпшэння жыцця і дабрабыту нашых жыхароў.
Дэпутаты Мінскага абласнога савета дэпутатаў 29-га склікання ў якасці старшыні падтрымалі кандыдатуру Наталлі Якубіцкай, якая не толькі падзякавала калегам за давер, але і падвяла вынікі працы дэпутацкага корпуса мінулага склікання.
«З дэпутатамі 28-га склікання мы правялі 71-ю сесію і прынялі больш як 520 рашэнняў, якія датычацца розных сфер і кірункаў дзейнасці. Толькі ў рамках Указа № 366 мы прынялі рашэнне адносна 40 аб’ектаў (16 — сельгаспрызначэння і 24 — сацсферы), якія былі вельмі важныя для вобласці. Многія пытанні датычыліся добраўпарадкавання і навядзення парадку на зямлі, у прыватнасці вырашэння праблемы пустых дамоў. Садзейнічанне занятасці насельніцтва, работа з моладдзю, міжпарламенцкія сувязі — вось яшчэ шэраг пытанняў, у вырашэнні якіх таксама прымалі ўдзел дэпутаты», — адзначыла Наталля Якубіцкая, якая выказала надзею, што новае скліканне будзе працаваць гэтак жа плённа.
Свае меркаванні аб маючай адбыцца рабоце ў абласным актыве выказалі нававыбраныя дэпутаты. «У якасці дэпутата планую строга адпавядаць сваёй перадвыбарнай праграме. У перыяд перадвыбарнай кампаніі было прыемна чуць, што па многіх кірунках жыцця людзі адзначалі істотныя паляпшэнні, але і агучылі хвалюючыя іх пытанні. Яны датычацца ЖКГ, добраўпарадкавання. Пры ўзаемадзеянні з мясцовымі органамі ўлады мы працягнем удасканальваць гэтыя кірункі, каб людзі былі задаволены нашай работай. Мы прадстаўляем розныя ўстановы, арганізацыі і грамадскія аб’яднанні, таму будзе цікава пачуць меркаванні, цікавыя прапановы і шляхі вырашэння пытанняў», — расказаў Аляксандр Юрчанка, начальнік галоўнага кантрольна-аналітычнага ўпраўлення Мінскага аблвыканкама.
«Як дэпутат прадстаўляю Бярэзінскую выбарчую акругу № 2. У рамках сваёй перадвыбарнай кампаніі на сустрэчах з калектывамі я даваў слова, каб як мага аператыўней вырашаць праблемы. Ведаю, што мясцовыя органы ўлады выконваюць сваю работу, але ім таксама патрэбна падтрымка дэпутатаў. Мне бліжэй сацыяльная сфера, але я гатовы ўключыцца і ў вырашэнне задач жыллёва-камунальнай сферы. Сам я родам з вёскі, увесь час там праводжу свой адпачынак, таму мне вядомыя праблемы сельскай мясцовасці .Разумею, што ўсё няпроста, але хацелася б, нават дзесьці ў рамках сваёй сямейнай гісторыі, зрабіць уклад у развіццё Бярэзінскага раёна і Мінскай вобласці ў цэлым», — падзяліўся начальнік галоўнага ўпраўлення па спорце і турызме Мінаблвыканкама Яўген Булойчык.
«У мяне ёсць досвед працы ў статусе дэпутата райсавета, таму з упэўненасцю магу сказаць, што валодаю праблемамі сваёй акругі, ведаю шляхі іх вырашэння. Сярод прыярытэтных — праблемы ЖКГ, добраўпарадкаванне дарог, у тым ліку з мэтай павышэння іх бяспекі, вуліц, тэрыторый. Для сябе таксама адзначаю важнасць патрыятычнага выхавання моладзі», — сказаў Генадзь Асіпенка, намеснік гендырэктара УСП «Трэст Рэммантажбуд» Салігорска.
Гаворачы аб прапанаваным кандыдаце — Дзмітрыі Дзямідаве, калегі, якія ведаюць яго асабіста, адгукнуліся аб ім, як аб аўтарытэтным і адказным кіраўніку, які прымае ўзважаныя рашэнні. Ён працаваў старшынёй Наваполацкага гарвыканкама. Як адзначылі дэпутаты, яго жыццёвы вопыт і прафесіяналізм дапамогуць выканаць намечаныя планы.
Новы кіраўнік дэпутацкага корпуса вобласці падзякаваў за аказаны давер. «Я ўсведамляю меру адказнасці, якая кладзецца на мяне як на старшыню абласнога Савета дэпутатаў, — сказаў Дзмітрый Дзямідаў. — Дэпутаты на сесіях разглядаюць такія важныя пытанні, як фарміраванне бюджэтных і праграм развіцця рэгіёна, кіравання дзяржаўнай маёмасцю, падаткамі, што пералічваюцца ў мясцовы бюджэт, і многія іншыя. Адказнасць за прыняцце рашэння дастаткова вялікая».
У ліку важных задач кіраўнік аблсавета абазначыў пытанні жыццезабеспячэння грамадзян, для чаго трэба рэгулярна праводзіць асабістыя прыёмы, у тым ліку выязныя, каб выяўляць актуальныя пытанні, якія патрабуюць аператыўнага вырашэння. Дзмітрый Дзямідаў заклікаў актывізаваць работу ў гэтым кірунку і падтрымліваць прапановы, накіраваныя на развіццё канкрэтнага населенага пункта.
На першай сесіі Брэсцкага абласнога Савета вырашаны арганізацыйныя пытанні.
На першай сесіі Брэсцкага абласнога Савета 29-га склікання старшынёй аблсавета выбраны Ігар Брылевіч, дэпутат па Пінкавіцкай выбарчай акрузе, які да гэтага працаваў старшынёй Пінскага райвыканкама.
Сесія праходзіла ў рэжыме відэаканферэнцыі з удзелам старшыні аблвыканкама Юрыя Шулейкі і памочніка Прэзідэнта — галоўнага інспектара па Брэсцкай вобласці Валерыя Вакульчыка. На сувязі былі кіраўнікі ўсіх раёнаў вобласці.
Сесію адкрыў старшыня абласной выбарчай камісіі Аляксандр Каляда. Ён коратка падвёў вынікі нядаўніх выбараў.
— Агульная колькасць выбаршчыкаў, якія былі ўключаны ў спісы па Брэсцкай вобласці, склала 996 599
чалавек, удзел у галасаванні прынялі 759 388 чалавек, або 76,2 працэнта ад агульнай колькасці выбаршчыкаў — паведаміў Аляксандр Каляда. — Падчас сёлетняй кампаніі нават на ўзроўні сельскіх Саветаў назіралася канкурэнцыя. Апошні фактар таксама паспрыяў высокай яўцы выбаршчыкаў.
У адзіны дзень галасавання, 25 лютага, па 1902 выбарчых акругах на выбарах у мясцовыя Саветы ўсіх узроўняў Брэсцкай вобласці абраны 1902 дэпутаты (у Брэсцкі аблсавет — 48 чалавек), — працягваў старшыня камісіі.— Сярод выбраных дэпутатаў 35,2 працэнта складаюць жанчыны, 3,2 працэнта — моладзь ва ўзросце да 30 гадоў, 41,9 працэнта — раней з’яўляліся дэпутатамі. У Савет увайшлі прадстаўнікі ўсіх асноўных сфер народнай гаспадаркі і сацыяльных груп насельніцтва:
575 народных абраннікаў з’яўляюцца работнікамі сферы адукацыі, культуры, навукі, аховы здароўя, 97 — гандлю, бытавога абслугоўвання насельніцтва, 198 — прамысловасці, транспарту, будаўнічай галіны, 404 — сельскай гаспадаркі, 315 — дзяржаўных органаў, 76 — праваахоўнікі і ваеннаслужачыя, 35 — прадпрымальнікі, 24 — пенсіянеры, 171 — прадстаўнікі іншых сфер дзейнасці.
Ігара Брылевіча тайным галасаваннем выбралі аднагалосна. За яго аддалі галасы ўсе 47 дэпутатаў, якія прымалі ўдзел у выбарах. Ігар Брылевіч — ураджэнец Пінска, выпускнік Брэсцкага дзяржаўнага тэхнічнага ўніверсітэта і Акадэміі кіравання. Больш за пяць гадоў узначальваў Пінскі раён. Асноўную работу паспяхова спалучае з грамадскай, цяпер ён з’яўляецца старшынёй Брэсцкага абласнога аддзялення Беларускай партыі «Белая Русь».
Ігар Брылевіч падзякаваў за аказаны давер і запэўніў удзельнікаў сесіі, што ўсе свае намаганні будзе прыкладаць да справы развіцця першага рэгіёна. Ігар Максімавіч падкрэсліў, што дэпутацкі корпус зараджаны на работу:
«У працэсе выбараў мы сустракаліся з людзьмі, якія прыходзілі з пытаннямі, праблемамі, просьбамі. Пытанні ўздымаліся абсалютна розныя. Многія датычацца дзяржаўнага будаўніцтва, мер, якія прымаюцца для ўмацавання суверэнітэта, захавання міру на нашай зямлі. Шмат каго хвалююць пытанні, звязаныя з якасцю жыцця: будаўніцтва дарог, станцый абезжалезвання, дакладнай работы прадпрыемстваў і ўчасткаў ЖКГ. Наша задача цяпер — вывучаць і выконваць наказы выбаршчыкаў».
Старшыня Брэсцкага аблвыканкама Юрый Шулейка ў сваім звароце да новых дэпутатаў выказаў упэўненасць, што яны будуць актыўнымі, ініцыятыўнымі, стануць эфектыўна вырашаць праблемы сваіх выбаршчыкаў.
Кіраўнік абласнога Савета 28-га склікання Юрый Наркевіч, які нядаўна выбраны дэпутатам Палаты прадстаўнікоў Нацыянальнага сходу краіны, скарыстаў нагоду, каб яшчэ раз падзякаваць калегам па 28-м скліканні і пажадаць новым выбраннікам плённай работы.
— Сёння нам не сорамна за сваю работу — сказаў Юрый Наркевіч. — Па многіх паказчыках Брэсцкая вобласць не адзін год на перадавых пазіцыях у краіне. У гэтым ёсць пэўная заслуга і дэпутацкага корпуса. Нам ёсць што перадаць новаму скліканню. Мы рады, што на змену прыйшлі падрыхтаваныя, кампетэнтныя і паважаныя людзі. Таму ёсць усе падставы спадзявацца, што новы дэпутацкі корпус зробіць важкі ўнёсак у далейшае развіццё вобласці.
Намеснікам старшыні абласнога Савета выбраны Васіль Казадой, дырэктар РУП «Беларусьнафта-Брэстаблнафтапрадукт». Сфарміравана пяць дэпутацкіх камісій, выбраны іх старшыні.
Святлана ЯСКЕВІЧ
Кацярына ЗЕнкевіч ізноў выбрана старшынёй Гомельскага абласнога Савета дэпутатаў.
У складзе дэпутацкага корпуса абласнога Савета больш як 38 працэнтаў народных выбраннікаў, якія маюць вопыт работы на гэтым узроўні.
Крыху больш за трэць — жанчыны. Усе без выключэння дэпутаты маюць вышэйшую адукацыю, два чалавекі з вучонай ступенню доктар навук і яшчэ два — кандыдат навук. Найбольшае прадстаўніцтва — з галін прамысловасці, транспарту, будаўніцтва. Так, у аблсавеце прадстаўлена практычна ўся інфраструктура паўднёва-ўсходняга рэгіёна.
Старшынёй Гомельскага абласнога Савета дэпутатаў 29-га склікання на першай сесіі аднагалосна выбрана Кацярына Зенкевіч. Яна падзякавала дэпутатам за высокі давер.
«Гэта наша сумесная адказнасць перад грамадзянамі. Кожны дэпутат павінен быць вядомы як мінімум у сваёй акрузе, а ў ідэале павінен жыць праблемамі гэтага рэгіёна, вырашаць тыя пытанні, якія сёння хвалююць выбаршчыкаў. Створана каманда аднадумцаў, прафесіяналаў, якія будуць працаваць на вынік, без фармалізму і ў інтарэсах жыхароў рэгіёна. У Гомельскай вобласці ёсць вялікія магчымасці і рэзервы, і мы бачым у іх шлях да далейшага росквіту вобласці. Задзейнічаем усе магчымыя рэзервы для развіцця», — падзялілася планамі яна.
Кацярына Зенкевіч нагадала, што бюджэт вобласці сфарміраваны дэпутатамі 28-га склікання. «Больш сродкаў, чым у мінулым годзе, будзе накіравана на бягучы і капітальны рамонты дарог. Таксама бачым, што ёсць патрэба ў сацыяльных аб’ектах — як у Гомелі, так і раёнах. Традыцыйна больш як 70 працэнтаў бюджэтных сродкаў будзе накіроўвацца на сацыяльную сферу. Зацверджана і інвестыцыйная праграма, дзе запланаваны шэраг праектаў, якія датычацца ўсіх галін. Гэта дасць магчымасць палепшыць якасць жыцця нашых выбаршчыкаў», — дадала яна.
Старшыня Гомельскага аблвыканкама Іван Крупко высока ацаніў работу абласнога Савета дэпутатаў 28-га склікання пад старшынством Кацярыны Зенкевіч. Ён падкрэсліў, што, нягледзячы на няпросты перыяд, ускладнены пандэміяй, сацыяльна-палітычнымі асаблівасцямі, дэпутацкі корпус зладжана спрацаваў па ўсіх кірунках.
«Прыняцце аператыўных рашэнняў садзейнічала бяспецы нашых грамадзян. У прыватнасці, работа па далейшым павышэнні даступнасці медабслугоўвання насельніцтва працягваецца. Упэўнены, што дэпутаты абласнога Савета 29-га склікання прыкладуць усе намаганні па развіцці Гомельскай вобласці, каб дастатак і ўзровень дабрабыту нашых людзей толькі раслі», — акцэнтаваў ён.
Асобна адзначыў губернатар і ініцыятыву дэпутатаў: з уласных рэсурсаў яны падтрымлівалі людзей з асаблівасцямі развіцця. Гэтую традыцыю плануюць працягваць і надалей.
Паводле БелТА
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».