Добрай традыцыяй ва Упраўленні ўнутраных спраў Віцебскага аблвыканкама стала ўзнагароджанне нераўнадушных грамадзян, якія дапамагаюць праваахоўнікам раскрываць злачынствы і папярэджваць здарэнні. Такіх смелых і неабыякавых людзей у паўночным рэгіёне хапае, паказальна, што сярод узнагароджаных ёсць і дзеці.
У выніку актыўнай дапамогі і спагадлівасці насельніцтва УУС Віцебскага аблвыканкама з 2009 года праводзіць патрыятычную акцыю «Грамадзянская мужнасць». Сёлета яе героямі сталі шэсць чалавек. У намінацыі «Самы юны ахоўнік правапарадку» адзначаны тры... дзяўчынкі. 13-гадовая жыхарка вобласці Дар’я Мароз, вучаніца Крынкаўскай школы Лёзненскага раёна, знайшла кашалёк, у якім знаходзілася 1500 долараў і больш за 200 беларускіх рублёў, а яшчэ членскі білет БРСМ з прозвішчам. Дзяўчынка паведаміла аб знаходцы сваёй маці, а тая перадала інфармацыю ў Лёзненскі РАУС.
12-гадовыя віцябчанкі Анастасія Трус і Дана Пчалаводава знайшлі ў лесапаркавай зоне «Юр’ева гара» мабільны тэлефон. Дзяўчынкі аднеслі яго маці Анастасіі, а тая паведаміла аб гэтым праваахоўнікам Чыгуначнага РАУС г. Віцебска. У ходзе правядзення агляду інфармацыі, якая змяшчалася ў гаджэце, былі атрыманы сведчанні аб супрацьпраўнай дзейнасці двух мужчын — распаўсюджванне асабліва небяспечнага псіхатропнага рэчыва «альфа-РVР» шляхам размяшчэння закладак на тэрыторыі Віцебска.
Педагог-псіхолаг адной са школ горада Наваполацка па выніках дыагностыкі выявіла факт сексуальнага гвалту ў адносінах непаўналетняй вучаніцы. Настаўнік перадала інфармацыю дырэктару ўстановы адукацыі, пасля чаго ў сітуацыі сталі разбірацца праваахоўнікі. Аператыўнікі ўстанавілі, што 34-гадовы жыхар Наваполацка на працягу некалькіх гадоў здзяйсняў дзеянні сексуальнага характару ў адносінах сваёй дачкі, якая нічога не расказвала маці. Злачынец затрыманы.
У намінацыі «Народны дэтэктыў» адзначаны Аляксандр Данілаў, які ў сакавіку мінулага года заўважыў у лесапаласе двух невядомых мужчын, якія ў ходзе размовы прызналіся, што шукаюць закладкі. Аляксандр Іванавіч паведаміў аб гэтым старшыні сельвыканкама, а той патэлефанаваў у Віцебскі РАУС. У ходзе затрымання аўтамабіля, які належаў аднаму з падазраваных, аператыўнікі знайшлі асабліва небяспечнае псіхатропнае рэчыва — парамецілэфедрон. Па дадзеным факце была ўзбуджана крымінальная справа за незаконны абарот наркотыкаў.
Самым смелым і рашучым стаў студэнт 4 курса МІТСО Арцём Байрамаў, які аказаў дапамогу супрацоўнікам Верхнядзвінскага РАУС у затрыманні злачынца. У студзені бягучага года маладому чалавеку патэлефанавала знаёмая Ганна, якая прасіла прыехаць па дапамогу. Калі юнак аказаўся ў пад’ездзе дома, каля якога яго чакала знаёмая, то ўбачыў кроў, бацькоў Ганны і невядомага мужчыну ў стане алкагольнага ап’янення з нажом у руцэ. Паранены бацька дзяўчыны трымаў руку злачынца з нажом, тады Арцём не разгубіўся і выбіў халодную зброю. Маладому чалавеку ўдалося скруціць незнаёмца, вывесці на вуліцу і ўтрымліваць да прыезду праваахоўнікаў.
Усіх гэтых сумленных і рашучых герояў віншавалі ў Віцебскім УУС. «Акцыя „Грамадзянская мужнасць“ — гэта мерапрыемства, на якім мы ўшаноўваем тых, хто не прайшоў міма злачынства. Гэта людзі, якія не разгубіліся ў экстрэмальных сітуацыях, праявілі мужнасць, стойкасць, грамадзянскую адказнасць і дапамаглі затрымаць парушальнікаў закона. Сапраўды героі нашага часу, якія ў крытычны момант не думаюць пра тое, дапамагаць міліцыі ці не, а проста дзейнічаюць. Упэўнены, што па-іншаму яны б і не паступілі. Сёння наша работа — па першым званку прымаць меры для затрымання злачынцаў. Але ёсць людзі, якія бачаць тое, што адбываецца, першымі. Іх рэакцыя высакародная і ўсім зразумелая: зло павінна быць пакаранае», — адзначыў першы намеснік начальніка УУС Віцебскага аблвыканкама — начальнік міліцыі грамадскай бяспекі Аляксей Шаховіч, уручаючы заслужаныя ўзнагароды.
Аляксандра ГВОЗДЗЕВА
Фота УУС Віцебскага аблвыканкама
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
