Гэтая важная падзея адбылася ў Целяханскай спецыяльнай школе-інтэрнаце. Дзесяць маладых людзей адзін за адным вымавілі словы ўрачыстай клятвы. Начальнік упраўлення ўнутраных спраў Брэсцкага аблвыканкама Алег Шулякоўскі ўручыў ім пасведчанні членаў клуба і павіншаваў з гэтай значнай падзеяй.
— Велізарная падзяка за тое, што вы прынялі правільнае і адказнае рашэнне — уступіць у ваенна-патрыятычны клуб, — звяртаючыся да выхаванцаў школы-інтэрната, адзначыў Іван Кубракоў. — У юным узросце вы ўжо разумееце, што такое патрыятызм, любоў да Радзімы. Вельмі важна, што ініцыятыва стварэння фарміравання зыходзіла менавіта ад вас. Жадаю ўсім здароўя, поспехаў і ўдачы. Ведайце: супрацоўнікі Міністэрства ўнутраных справаў заўсёды побач!
Па словах кіраўніка ведамства, у моладзі стала трэндам уступаць у падобныя фарміраванні. Цяпер і целяханскія хлопцы здзейснілі сваю мару!
Міністр падарыў школе-інтэрнату тэлевізар і запрасіў выхаванцаў на навагодняе свята ў Палац Рэспублікі.
Урачыстыя мерапрыемствы ў Целяханскай спецыяльнай школе-інтэрнаце працягнуліся маляўнічым навагоднім паказам у рамках рэспубліканскай дабрачыннай акцыі «Нашы дзеці». Іван Кубракоў павіншаваў усіх з надыходзячымі святамі і ўручыў навучэнцам салодкія падарункі.
— Мы, дарослыя, шчаслівыя бачыць сёння вашы ўсмешкі, — заўважыў міністр унутраных спраў. — Новы год — час цудаў, сюрпрызаў. Жадаю кожнаму з вас шмат радасных імгненняў. Няхай спраўдзяцца ўсе мары!
Звяртаючыся да педагогаў, кіраўнік ведамства падкрэсліў, што яны як ніхто іншы разумеюць, што чужых дзяцей не бывае. «Захапляюся людзьмі вашай прафесіі, — сказаў ён. — Жадаю цярпення, дабрыні, моцнага здароўя і ўсяго найлепшага!»
У размове з журналістамі Іван Кубракоў нагадаў, што па ўсёй краіне стартавала выдатная і самая добрая акцыя — «Нашы дзеці». «Органы ўнутраных спраў па традыцыі далучыліся да яе, — дадаў міністр. — Дапамогу такім установам адукацыі, як Целяханская спецыяльная школа-інтэрнат, аказваем рэгулярна і па многіх напрамках». Ён паведаміў, што сродкі, якія па судзе выплачваюцца міліцыянерам і іх сем’ям, якія пацярпелі ад супрацьпраўных дзеянняў, супрацоўнікі перадаюць у дзіцячыя дамы. Вось і сёння так зрабіў баец атрада міліцыі асаблівага прызначэння.
Велізарнае ўражанне ў кіраўніка ведамства засталося ад верша «Мая міліцыя», які напісаў дзесяцікласнік Максім Мялік, а прачытаў вучань 6 класа Яўген Цымбал.
Вераніка КАНЮТА
Фота прэс-службы МУС
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
