Бясплатную юрыдычную кансультацыю можна атрымаць 1 снежня

Бясплатную юрыдычную кансультацыю з нагоды Дня натарыуса беларусам дораць 1 снежня натарыусы, адвакаты і супрацоўнікі юстыцыйных ведамстваў.

Да прадстаўнікоў Беларускай натарыяльнай палаты можна прыйсці ў любую натарыяльную кантору і бюро краіны цягам рабочага часу 1 снежня. Наведвальнікі змогуць атрымаць кансультацыю па пытаннях пагадненняў аб дзецях і шлюбных дагавораў, даведацца пра афармленне спадчынных правоў і адчужэнне нерухомасці, складанне тастаментаў і згод, а таксама разабрацца ў іншых праблемах, якія ўваходзяць у кампетэнцыю натарыусаў. Поўны спіс натарыяльных кантор і бюро Беларусі з адрасамі, нумарамі тэлефонаў і часам працы можна паглядзець на сайце беларускай натарыяльнай палаты ў раздзеле «Знайсці натарыуса».

Члены Беларускай калегіі адвакатаў з нагоды прафесійнага свята запрашаюць грамадзян на бясплатныя кансультацыі ў тэрытарыяльныя калегіі адвакатаў па ўсёй краіне. На кожным з тэрытарыяльных сайтаў можна даведацца дакладны час і месца правядзення акцыі. Адвакаты адкажуць на пытанні, якія не звязаныя з прадпрымальніцкай дзейнасцю і не патрабуюць вывучэння дакументаў.

Галоўнае ўпраўленне юстыцыі Брэсцкага аблвыканкама ладзіць кансультацыі 1 снежня з 14:30 да 16:00 па адрасе: г. Брэст, вул. Міцкевіча, 3. Папярэдне да абласных натарыусаў, адвакатаў, работнікаў ЗАГС, супрацоўнікаў фонду сацыяльнай абароны насельніцтва, якія будуць весці прыём, можна запісацца па нумары: 8016 21-25-29. Акрамя таго, кожны аддзел прымусовага выканання Брэсцкай вобласці з 10:00 да 12:00 правядзе прамыя тэлефонныя лініі.

У галоўным упраўленні юстыцыі Віцебскага аблвыканкама 1 снежня з 9:00 да 11:00 будуць працаваць прамыя тэлефонныя лініі: датычна работы органаў прымусовага выканання — 8 (0212) 62-03-37; па пытаннях работы органаў ЗАГС, натарыята, адвакатуры, прастаўлення апастылю на афіцыйных дакументах — 8 (0212) 67-56-70.

Спецыялісты галоўнага ўпраўлення юстыцыі Гродзенскага аблвыканкама правядуць прамыя тэлефонныя лініі 1 снежня з 10:00 да 13:00 па наступных пытаннях: работа органаў прымусовага выканання — 8(0152) 61 10 16; рэгістрацыя і ліквідацыя камерцыйных і некамерцыйных арганізацый — 8 (0152) 61 09 39; 

работа органаў ЗАГС і архіваў — 8 (0152) 61 09 50; прастаўленне апастылю на афіцыйных дакументах — 8 (0152) 61 09 48.

Галоўнае ўпраўленне юстыцыі Гомельскага аблвыканкама ладзіць прамыя тэлефонныя лініі 1 снежня з 10:00 да 12:00. Па пытаннях прастаўлення апастылю на афіцыйных дакументах можна тэлефанаваць па нумары 8 (0232) 51 02 75; па пытаннях архіўнай справы і справаводства — 8 (0232) 51 02 76; рэгістрацыя (ліквідацыя) суб’ектаў гаспадарання — 8 (0232) 51 02 78; 

прымусовае выкананне выканаўчых прадпісанняў аб спагнанні аліментаў, сродкаў на ўтрыманне сужэнца і іншае — 8 (0232) 51 02 86.

Прамыя тэлефонныя лініі з 10:00 да 12:00 1 снежня пройдуць і ў галоўным упраўленні юстыцыі Магілёўскага аблвыканкама. Па пытаннях дзейнасці органаў натарыята і ЗАГС можна званіць на нумар 8 (0222) 74 97 26; адносна рэгістрацыі юрыдычных асоб — 8 (0222) 74 14 15; па пытаннях дзейнасці рыэлтарскіх арганізацый — 8 (0222) 75 25 79; па пытаннях выканання выканаўчых дакументаў — 8 (0222) 29 45 52; 

па пытаннях дзейнасці дзяржаўных архіўных устаноў — 8 (0222) 75 05 55.

Тэматыку кансультацый, нумары тэлефонаў і прозвішчы спецыялістаў, якія будуць весці прамыя тэлефонныя лініі ў галоўным упраўленні юстыцыі Мінскага аблвыканкама сумесна з органамі прымусовага выканання 1 снежня з 10:00 да 12:00, можна паглядзець на сайце.

Галоўнае ўпраўленне юстыцыі Мінгарвыканкама прамыя тэлефонныя лініі правядзе 1 снежня з 9:00 да 13:00. Тэматыку кансультацый, нумар тэлефона і прозвішча спецыялістаў, якія ўдзельнічаюць у дабрачыннай акцыі, можна паглядзець на сайце.

Мэта падобных дабрачынных акцый, правядзенне якіх прымяркоўваецца да памятных дат і дзяржаўных свят, — забеспячэнне абароны правоў і інтарэсаў грамадзян, павышэнне ўзроўню прававой культуры, свядомасці і адукаванасці беларусаў.

Ірына СІДАРОК