З дызайнерамі зручней за ўсё размаўляць на тэматычных выставах і паказах, дзе яны прадстаўляюць свае ідэі ўжо ўвасобленымі ў жыццё, і дзе гэтыя ідэі кожны глядач можа ацаніць, ва ўяўленні прымерыць на сябе і скласці ўласнае меркаванне: «падабаецца — не падабаецца» і «набыў бы» — «не набыў бы». Ну, а штогадовая найбуйнейшая галіновая выстава BelTexIndustry — безумоўна, галоўная падзея восені як для спецыялістаў лёгкай прамысловасці Беларусі, так і для дызайнераў прадпрыемстваў легпрама (і ўвогуле ўсіх дызайнераў, што ствараюць адзенне, абутак, аксесуары). Арганізатары кожны год імкнуцца здзівіць навізной канцэпцый і шырынёй ідэй.
Гэтымі днямі, з 25 па 27 кастрычніка, Міжнародная выстава-кірмаш па аптовым продажы тавараў лёгкай прамысловасці BTI-2023 працуе ў Мінску ў 47 раз. Праграма, як звычайна, насычаная (модныя паказы, шоу, выступленні топ-спікераў і бізнес сустрэчы), геаграфія — шырокая (51 экспанент з нашай краіны, Расійскай Федэрацыі, Кітайскай Народнай Рэспублікі, Узбекістана), а тэматыка ахоплівае абсалютна ўсе галіны лёгкай прамысловасці (ад жаночага, мужчынскага і дзіцячага адзення і абутку да тканін і нятканых матэрыялаў, бялізны і трыкатажу, гарсэтных вырабаў і купальнікаў, скуры і футра, фурнітуры, аксесуараў і г. д.). Словам, выстава цікавая як прафесіяналам у вобласці дызайну і прадстаўнікам гандлю, так і звычайным спажыўцам, якія сочаць за модай (і такіх наведвальнікаў у Футбольным манежы, дзе працуе BelTexIndustry, сёлета шмат, як, зрэшты, і штогод).
Адкрываючы BTI-2023, старшыня канцэрна «Беллегпрам» Таццяна Лугіна падкрэсліла: выстава дэманструе найноўшыя дасягненні лёгкай прамысловасці і крэатыўныя ідэі дызайнераў.
— Лёгкая прамысловасць у Беларусі развіваецца і з’яўляецца сферай творчых думак, — адзначыла кіраўнік канцэрна.
Таццяна Лугіна дадала, што перспектывы ў легпрама — велізарныя. Уласна кажучы, за беларускае адзенне, абутак, аксесуары ад вядучых брэндаў не сорамна ўжо сёння: дастаткова паглядзець паказы. А калі казаць мовай лічбаў, то прадукцыя «Беллегпрама» пастаўляецца амаль у 40 краін свету, і толькі за студзень-жнівень прадпрыемствы канцэрна нарасцілі экспарт на 7%.
— Тэмп росту экспарту тавараў лёгкай прамысловасці канцэрна склаў 107 працэнтаў па выніках студзеня-жніўня гэтага года. У тым ліку ў Расію — 124%, — распавяла намеснік старшыні «Беллегпрама» Наталля Мурашка.
У бліжэйшых планах «Беллегпрама» — адкрыць яшчэ сёлета два канцэпт-сторы «Да дому» ў Расіі, адзін з якіх — у Грозным.
Ну, а выстава адкрылася вельмі прыгожым, цёплым і мілым паказам «Беларускі — мы», арганізаваным канцэрнам «Беллегпрам» сумесна з Беларускім саюзам жанчын. У рамках паказу супрацоўніцы прадпрыемстваў канцэрна, звычайныя жанчыны самых розных узростаў, выйшлі на подыум, каб прадэманстраваць мадэлі з калекцый родных прадпрыемстваў («Світанак», «Купалінка», «Палессе», «Алеся, «Бабруйсктрыкатаж», «Камволь», «Белкрэда», «Цэнтр моды», «Славянка»). Ідэя «шыем для вас як для сябе» знайшла падтрымку і адабрэнне гледачоў. Паказ атрымаўся відовішчным і прафесійным, нягледзячы на тое, што на подыум выйшлі не прафесійныя мадэлі.
— Чаго яшчэ не можа беларуская жанчына? — заўважыла пасля яго завяршэння дырэктар тэлерадыёкампаніі «Мір» Вольга Шпілеўская. — Мы даказалі, што можам абсалютна ўсё!
«Звязда» пагутарыла за кулісамі подыума з адным з самых вядомых і знакамітых беларускіх дызайнераў, кіраўніком дызайн-цэнтра ААТ «Камволь» Эльвірай Жвікавай аб тым, на што варта звярнуць увагу жанчынам, каб актуалізаваць свой гардэроб, а таксама аб тэндэнцыях у мужчынскай модзе(бо брэнд Lemongrass, які належыць ААТ «Камволь», стварае стыльныя і запатрабаваныя калекцыі для мужчын).
— На BTI-2023 мы прадстаўляем блок адзення street wear, на мой погляд, дастаткова дынамічны, і пры гэтым з дастаткова аскетычных тканін. Гэта штаны, стыльныя спадніцы, бомберы, камбінезоны. У гэтым паказе мужчынскае адзенне мы не дэманструем, але ў нашай калекцыі ёсць новыя прапановы і для мужчын. Гэта, напрыклад, кэжуальныя паліто ў колеры горкага шакаладу. Таксама для мужчын у нашай калекцыі — выдатная куртка-кашуля, якая вельмі добра працуе разам з вадалазкамі. Такія мадэлі да гэтага часу ў трэндзе. А ў цэлым, у нас у гэтым сезоне шмат радкоў, якія імітуюць ручны шывок; як і звычайна, ў нас ёсць патайныя «складанасці» ўнутранага дызайну, якія пры раскрыцці пінжака або кашулі выяўляюцца, дастаўляюць задавальненне ўладальніку гэтых рэчаў і забяспечваюць камфорт. Высокая якасць і ўвага не толькі знешняму, але і ўнутранаму дызайну (калі, напрыклад, прадугледжана дадатковая кішэня, куды можна пакласці мабільны тэлефон, калі прыгожа апрацаваны ўнутраныя швы) — у прынцыпе фішка гандлёвай маркі Lemongrass.
— А калі казаць аб модзе жаночай?..
— Мы прапануем калекцыю smart casual ў мяккай каляровай гаме — гэта, напрыклад, вельмі камфортныя запашныя жакеты без гузікаў пад пояс, якія дазваляюць адчуваць сябе ўтульна і ў офісе, і па-за ім. Гэтай восенню да нас вярнуліся модныя адценні шэрага — з базавых колераў шэрая гама стала адной з трэндавых. У падтрымку шэраму ідуць мяккія зялёныя адценні, аліўкавыя, іншыя спакойныя экалагічныя тоны. Але актуальныя ў халодным сезоне і «выбуховыя» колеры — каралеўскі сіні, вінныя тоны (у прыватнасці, колер вытрыманага чырвонага віна). У такой каляровай палітры мы прапануем нашым пакупніцам касцюмы бліжэй да навагодніх карпаратыўных вечарынак.
— Вернемся да мужчынскай моды: як сёння дызайнеры трансфармуюць ідэю класічнага касцюма?
— Мы перажылі пандэмію, усе вярнуліся на працоўныя месцы: значыць, вярнулася і запатрабаванасць дзелавога касцюма. Іншая справа, што мужчынскі касцюм у апошнія гады зведаў некаторыя змены ў кірунку кэжуальнасці, мяккасці, расслабленасці. Беларускія мужчыны крыху больш кансерватыўныя, па традыцыі аддаюць перавагу больш фармальным касцюмам з выразнай лініяй пляча. Тым не менш, мы працуем і над тым, каб стварыць новы канструктыў, прапанаваць нашым мужчынам сучасныя мадэлі з мякчэйшым плячом і меней фармалізаваным сілуэтам. Так, неўзабаве ў нашых калекцыях з’явяцца штаны на кулісцы з мяккімі складкамі па поясе. А ў цэлым, заўжды ёсць фармальная частка калекцыі і яе больш кэжуальная частка. Наша грамадства вельмі рознае па сваіх густах і модных перавагах, але працэнт мужчын, якія цікавяцца модай і не прапускаюць модныя навінкі, у нашай краіне значна вырас.
Паўнату карціны развіцця айчыннай моднай думкі дапоўнілі на выставе лакальныя, невялікія брэнды.
— Прыняла ўдзел у выставе BTI-2023, таму што мне вельмі спадабалася яе арганізацыя, — дзеліцца ўражаннямі дызайнер Алена Леванюк, аўтар брэнда біжутэрыі і аксесуараў Levona. — Захацелася акунуцца ў атмасферу гэтага маштабнага моднага мерапрыемства. Я працую ў стылі fashion, ствараю ўпрыгожванні з ланцужкоў (мабыць, я першай у Беларусі, яшчэ ў 2011 годзе, пачала працаваць з ланцугамі) і аўтарскія клатчы з пластыка.
— Наколькі дызайнерскія рэчы запатрабаваныя сёння ў нашай краіне?
— Дызайнерскія рэчы ў Беларусі запатрабаваныя, і з кожным днём усё больш. Вядома, такія рэчы каштуюць не танна — ды яны і не могуць быць таннымі. Але стэрэатып пра нейкія «спрошчаныя» вобразы нашых жанчын — маўляў, «беларускі не хочуць вылучацца, прыцягваць увагу» — даўно прыйшоў час пакінуць у мінулым: ён не адпавядае рэчаіснасці. Сучасныя беларускія жанчыны жадаюць і ўмеюць несці сябе па-іншаму.
Аляксандра АНЦЭЛЕВІЧ
Фота Віктара ІВАНЧЫКАВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
