У музеі кнігі Нацыянальнай бібліятэкі адкрылася выстаўка «Кніжныя скарбы Куцеінскага манастыра», прымеркаваная да 400-годдзя з дня заснавання на Віцебшчыне Свята-Багаяўленскага храма. У ХVII cтагоддзі ён стаў адным з буйнейшых асветніцкіх і культурных цэнтраў. Пры манастыры працавалі выдатныя майстры — разьбяры па дрэву, вырабе чэканкі, іканапісцы. Была тут і шыкоўная бібліятэка, дзе захоўваліся друкаваныя і рукапісныя кнігі.
Але найбольшую вядомасць Куцеінскаму манастыру прынеслі друкары. Пры праваслаўным манастыры ў 1630-1654 гады працавала друкарня, дзе выдавалася навукова-асветніцкая, царкоўна-палемічная і свецкая літаратура на царкоўнаславянскай і старабеларускай мовах. У ёй у 1631 годзе выйшаў і знакаміты буквар Спірыдона Собаля. Арыгіналу старажытнага падручніка, на жаль, у Беларусі няма, але ў Музеі кнігі сёння можна пабачыць факсімільнае выданне буквара, здзейсненае ў 2014 годдзе.
На адкрыцці выстаўкі генеральны дырэктар Нацыянальнай бібліятэкі Вадзім Гігін, заўважыў, што манастыр, нягледзячы на тое, што ствараўся ў вельмі няпросты час, адыграў вялікую ролю ў асветніцкай справе, захаванні духоўных каштоўнасцяў, а супрацоўнік Мінскай духоўнай акадэміі Аляксей Дзямідаў распавёў пра гісторыю праваслаўнага цэнтра.
У музее кнігі прадстаўлены рарытэты, як выдадзеныя ў Куцеінскай друкарні, так і тыя, што захоўваліся пры манастыры, пра што сведчаць запісы, зробленыя на кнігах.
На часовай выстаўцы экспануюцца рукапісны помнік — Сінодзік Куцеінскага манастыра XVIII стагоддзя, узор перакладной літаратуры «Гісторыя пра Варлаама і Іасафа», «Актоіх Іаана Дамаскіна», адно з цудоўных літургічных выданняў «Трэфалагіён» і іншыя экспанаты. Прадстаўлены шэраг кірылічных выданняў і рукапісаў XVII-XVIII стагоддзяў з запісамі Куцеінскага манастыра. Сярод іх — рукапісныя ноты «Ірмалогій» XVII стагоддзя, маскоўскія і кіеўскія богаслужэбныя старадаўнія гравюры. Таксама на экспазіцыі змешчаны дакументы, звязаныя з гісторыяй Куцеіснкага манастыра.
Алена ДЗЯДЗЮЛЯ
Фота Лізаветы ГОЛАД
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
