Мерапрыемства стала часткай маштабнага сацыяльна-творчага праекта Беларускага саюза жанчын «Сямейнае чытанне». У галерэі «З’ява» сабраліся барысаўскія сем’і, у тым ліку шматдзетныя, школьнікі, прыхільнікі беларускай літаратуры, супрацоўнікі бібліятэкі. Сярод ганаровых гасцей — унучаты пляменнік Якуба Коласа, барысаўчанін Іван Белы, намеснік старшыні Пастаяннай камісіі Палаты прадстаўнікоў па правах чалавека, нацыянальных адносінах і сродках масавай інфармацыі Лілія Ананіч.
Дарэчы, парламентарый з’яўляецца ініцыятарам, натхняльнікам і куратарам стварэння зборніка твораў беларускай класікі «Бацькоўскі дар». Над выдавецтвам кнігі сумесна працавалі Беларускі саюз жанчын, міністэрствы інфармацыі і адукацыі, выдавецтва «Народная асвета». Дзякуючы праекту, на працягу некалькіх гадоў выдаюцца кнігі, якія павінны быць на кніжных паліцах у беларускіх сем’ях.
— У нашай рэспубліцы гэтымі днямі праходзіць Тыдзень бацькоўскай любові, які злучае два цудоўныя беларускія святы — Дзень маці і Дзень бацькі, — звярнула ўвагу Лілія Ананіч. — Год таму, у такія ж радасныя кастрычніцкія дні, убачыла свет новая кніга «Бацькоўскі дар», у якой сабраны шэдэўры айчыннай класікі. І сёння разам з прадстаўнікамі выдавецтва «Народная асвета» — дырэктарам Вікторыяй Калістратавай і загадчыкам аддзела рэалізацыі і рэкламы Жаннай Рэзнік — мы прывезлі яе ў Барысаў. У выданні — творы Янкі Купалы («Спадчына», «Курган») і Якуба Коласа («Новая зямля»), якія простымі і вельмі пранікнёнымі словамі, шырока і дзіўна дакладна паказваюць нам, беларусам, што такое «спадчына» і «родная зямля».
Па словах дэпутата, кніга нагадвае чытачам, што сям’я — гэта найвышэйшая каштоўнасць беларускага грамадства і дзяржавы. «Менавіта ў традыцыйнай сям’і закладваюцца ў дзіцяці асновы любові да сваіх блізкіх, да сваёй роднай краіны — Беларусі, — лічыць парламентарый. — Гэта і павінна быць найважнейшым нашым, бацькоўскім, дарам».
Лілія Ананіч перакананая, што фармат сямейнага чытання не страціў сваёй актуальнасці. «Гэта працэс, які спрыяе камунікацыі паміж бацькамі і дзецьмі, магчымасць для бацькоў фарміраваць багаты ўнутраны свет свайго дзіцяці, — патлумачыла яна. — Надышоў час інтэрнэту і гаджэтаў, дзеці паглынаюць без разбору ўсё, што прадстаўлена ў сетцы. Таму нам, дарослым, так важна вярнуцца да чытання кніг і прывучаць да гэтага дзяцей».
Не толькі ўнутранае напаўненне вылучае выданне, а і яго афармленне. Кніга аформлена ў спрадвечна беларускіх традыцыях: на вокладцы — ручнікі колеру лёну з вышыўкай. Вялікая колькасць ілюстрацый робіць яе яшчэ больш цікавай. Дарэчы, аўтарам фотаздымкаў, на якіх адлюстраваны любімыя мясціны Купалы і Коласа, з’яўляецца наш калега, шматгадовы фотакарэспандэнт «Звязды» Анатоль Кляшчук, які нядаўна пайшоў з жыцця. Чалавека ўжо няма, а яго работы радуюць сучаснікаў і, варта спадзявацца, будуць радаваць яшчэ ні адно пакаленне беларусаў.
Вераніка КАНЮТА
Фота Барысаўскай раённай газеты «Адзінства»
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».