Члены Савета Рэспублікі правялі прамыя тэлефонныя лініі па пытаннях сямейнай палітыкі і ўдасканалення заканадаўства ў сферы шлюбу і сям’і
«Тэматычныя» прамыя тэлефонныя лініі па пытаннях сямейнай палітыкі і ўдасканалення заканадаўства ў сферы шлюбу і сям’і былі праведзены ўпершыню. Сенатары, якія прадстаўляюць усе рэгіёны краіны, адказалі на пытанні грамадзян. Прамыя лініі — толькі частка мерапрыемстваў па пытаннях умацавання статусу сям’і і сямейных каштоўнасцяў у Рэспубліцы Беларусь, арганізаваных Саветам Рэспублікі напярэдадні Дня маці.
Сведкамі размовы некаторых парламентарыяў з насельніцтвам сталі карэспандэнты «Звязды». Удалося даведацца, з якімі пытаннямі людзі звярталіся і да Старшыні Савета Рэспублікі Наталлі Качанавай.
Тэлефон у кабінеце спікера верхняй палаты парламента не змаўкаў ні на хвіліну. Пытанні, з якімі да Наталлі Качанавай звярталіся грамадзяне, датычыліся самага рознага профілю. Адчувалася, што тэма сямейнай палітыкі — адна з самых хвалюючых.
Сям’я з Полацка, якая выхоўвае дзіця-інваліда, паскардзілася на непрыдатныя жыллёвыя ўмовы. Маці, бацька і двое дзяцей пражываюць у двухпакаёвай кватэры. Для жыццядзейнасці хворага хлопчыка задзейнічана нямала абсталявання, якое патрабуе адпаведнай прасторы. Акрамя таго, хлопчык знаходзіцца на індывідуальным навучанні: штодзень да яго прыходзяць педагогі. А ў сям’і расце яшчэ і дачушка. Наконт паляпшэння жыллёвых умоў маці дзіцяці-інваліда неаднойчы звярталася да мясцовых органаў улады, аднак праблема не вырашаецца. Наталля Качанава паведаміла, што ў бліжэйшы час будзе сустракацца са старшынёй Полацкага райвыканкама, з якім абавязкова абмяркуе гэтае пытанне.
Жыхарка Ліды папрасіла разабрацца з маёмасным пытаннем. Жанчына расказала, што на спадчыну яе ўнучкі-сіраты прэтэндуюць чужыя людзі. Старшыня Савета Рэспублікі паабяцала разабрацца ў гэтым пытанні, аб чым заяўніцу праінфармуюць.
Са сваёй бядой да Наталлі Качанавай звярнулася і маці траіх дзяцей. Жанчына расказала, што пабудавала кватэру з дапамогай дзяржаўных сродкаў. Так склалася абставіны, што жанчына развялася з мужам, які прэтэндуе на палову кватэры. Суд гэтае рашэнне падтрымлівае. Наталля Качанава паабяцала дасканала вывучыць сітуацыю.
Як адзначыла ў размове з журналістамі Старшыня Савета Рэспублікі, прамая тэлефонная лініі з’яўляецца пацверджаннем таго, што пытанне сямейных каштоўнасцяў хвалюе многіх. «Перш за ўсё гэта пытанні, якія датычацца выхавання нашага падрастаючага пакалення, патрыятычнага выхавання, — канкрэтызавала Наталля Качанава. — Многія тэлефанавалі менавіта з прапановамі: экскурсійнае наведванне знакавых месцаў, якія есць у нашай краіне, заслон прапагандзе нетрадыцыйных каштоўнасцяў у інтэрнэце. Людзі занепакоены лёсам сваіх дзяцей. І вядома, мы, як заканадаўцы, павінны думаць аб гэтым. Былі пытанні, якія датычацца падзелу маёмасці. Ужо неаднаразова падымаецца пытанне раздзелу маемасці сем’яў, якія будавалі жыллё з дзяржаўнай падтрымкай — гэта нашы шматдзетныя сем’і. Хочам больш комплексна падысці да разгляду гэтага пытання і ўзяць яго на кантроль».
Вераніка КАНЮТА
Фота БелТА
Падрабязна аб прамой тэлефоннай лініі, якую сенатары праводзілі па ўсёй краіне ў рэпартажах са сталіцы і рэгіёнаў раскажам у спецыяльным выпуску «Мясцовага самакіравання».
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.