У нацыянальны архіў перадалі дакументы партызанскага руху

Дакументы былі знойдзеныя 29 чэрвеня ў Салігорскім раёне пошукавай групай імя Героя Савецкага Саюза В. З. Каржа.

У Нацыянальны архіў Рэсбулікі Беларусь перадалі дакументы партызанскай брыгады імя У. І. Леніна. Мерапрыемства прайшло ў прысутнасці супрацоўнікаў Нацыянальнага архіва, навучэнцаў мінскага сувораўскага вучылішча і школьнікаў. Цырымонія перадачы адкрылася кінахронікай партызанскага руху часоў Вялікай айчыннай вайны. Супраць захопнікаў змагалася 300 тысяч партызанаў і 70 тысяч падпольшчыкаў.

Міністр юстыцыі Алег Войнаў падзякаваў пошукавай групе, а таксама распавёў пра важнасць захавання гісторыі, асаблівую ролю ў гэтым архіваў: «Цяпер у нацыянальны архіў уваходзяць розныя дакументы партызанскага руху, якія не маюць аналагаў на тэрыторыі СНД. Беражлівыя адносіны камандзіраў партызанскіх групаў дазволілі захаваць гэтыя дакументы для будучых пакаленняў» — адзначыў ён.

Знойдзеныя дакументы будуць з’яўляцца асновай далейшых даследаванняў партызанскага руху. Некаторыя дакументы — з грыфам «абмежавана» — у абавязкі партызанскай групы ўваходзіла выяўленне памагатых акупантаў, яго агентуры, а ў кіраўніцтва групы ўваходзілі людзі з ваеннай адукацыяй, службоўцы войскаў НКУС.

Пасля цырымоніі ўручэння кейса з дакументамі, у якой прынялі ўдзел члены пошукавай групы і навукоўцы-гісторыкі, дырэктар Салігорскага краязнаўчага музея Віталь Іваноў распавёў пра гісторыю выяўлення дакументаў. Унучка начальніка разведкі перадала музею ўспаміны, надрукаваныя на машынцы. У тэксце было напісана пра дакументы. Далей самым важным было аднаўленне і захаванне знойдзеных матэрыялаў. Дзякуючы працы вопытных супрацоўнікаў Нацыянальнага архіва, а таксама дапамозе практыкантаў гістфака БДУ, удалося захаваць большую частку дакументаў. Аднаўленчыя працы падоўжыліся амаль месяц — 26 дзён.

Па словах доктара гістарычных навук Аляксандра Кавалені, дакументы таксама ўвойдуць у шматтомны летапіс гісторыі Беларусі, у якой цяпер налічваецца 146 тамоў. Таксама гісторык папрасіў наведвальнікаў дасылаць успаміны сваякоў, дзеля захавання і папаўнення гісторыі Беларусі ў гады Вялікай Айчыннай вайны.

У канцы мерапрыемства наведвальнікі змаглі азнаёміцца з іншымі знаходкамі пошукавай групы, якія адносяцца да партызанскага руху, а таксама задаць пытанні навукоўцам-архівістам.

Аляксандр ПЯТРОЎСКІ, студэнт 4 курса факультэта журналістыкі БДУ

Фота Віктара ІВАНЧЫКАВА