Што пачытаць у ліпеньскім нумары «Алесі».
Не кантраляваць дзяцей па дробязях, а выбудоўваць такія адносіны, каб нашчадкі самі захацелі падзяліцца сваімі хваляваннямі і радасцямі, — правіла Кацярыны Старавойтавай, пераможцы рэспубліканскага конкурсу «Жанчына года — 2022» у намінацыі «Мацярынская слава».
— Лічу, бацькі павінны быць сябрамі сваім дзецям, але пры гэтым не губляць аўтарытэту, — расказвае аб сваіх педагагічных прынцыпах Кацярына Старавойтава ў гутарцы з журналістам «Алесі».
Мацярынства з яго нястомнымі клопатамі не перашкаджае жанчыне дапамагаць тым, хто мае ў гэтым патрэбу. Яна ўзначальвае Першамайскую раённую арганізацыю г. Мінска ГА «Беларуская асацыяцыя шматдзетных бацькоў» і не ўяўляе сябе без любімай працы, якую гарманічна спалучае з выхаваннем шасці дзяцей.
Народнай артыстцы Беларусі, дацэнту кафедры спеваў БДАМ Наталлі Рудневай не аднойчы прапаноўвалі напісаць пра сябе кнігу. Успомніць сапраўды ёсць пра што. Ёй шанцавала на цікавыя сустрэчы і падзеі, у яе лёсе шмат нечаканых паваротаў. Як дзяўчына з Самары стала прымай на славутай беларускай сцэне? Як удавалася сумяшчаць кар’еру і мацярынства? Што радуе ў «жыцці пасля славы» і навошта, на яе думку, патрэбна мастацтва? Пра ўсё гэта чытайце на старонках «Алесі».
— Упэўнена: глядач даруе тэхнічныя хібы, калі артыст даносіць да яго стан героя, калі жыве на сцэне, пакутуе, кахае, а не проста спявае і цешыцца сваім голасам, — лічыць Наталля Руднева, на думку якой мастацтва — «прытулак» для выратавання душы, здаволення патрэбы ў прыгожым, добрым, высокім, чыстым.
З ліпеньскага нумара часопіса чытач даведаецца, чаму мастацкі кіраўнік і галоўны рэжысёр Нацыянальнага акадэмічнага драматычнага тэатра імя М. Горкага Сяргей Кавальчык, прадаўжальнік вядомай творчай дынастыі, шматдзетны бацька, лічыць сям’ю месцам сілы, якіх прынцыпаў ён прытрымліваўся ў выхаванні дзяцей і ці перашкаджае сумесная праца шлюбу. І, канешне, Сяргей Кавальчык дзеліцца сваімі думкамі аб прафесіі рэжысёра, аб ролі мастацтва.
— Тэатр — гэта размова з гледачом, — разважае галоўны рэжысёр Нацыянальнага акадэмічнага драматычнага тэатра імя М. Горкага. — Няхай на некалькі гадзін, але чалавек пераключаецца з паўсядзённасці, асабістых праблем і клопатаў на гісторыі выдуманых персанажаў, хвалюецца за іх, плача і смяецца над вымыслам. Мастацтва пашырае пункт гледжання, усяляе аптымізм, дае надзею на лепшы вынік падзей. Сам я таксама страюся захоўваць у сабе веру ў лепшае, зараджаць аптымізмам і энергіяй тых, хто навокал.
На старонках часопіса чытайце пра таямніцу поспеху мастачкі Алесі Скарабагатай. Яе карціны вылучае яркая творчая індывідуальнасць і непаўторны аўтарскі почырк. Яны рэгулярна ўдастойваюцца прызоў глядацкіх сімпатый на выстаўках і фестывалях маладых мастакоў Беларусі. Іх ахвотна набываюць айчынныя і замежныя калекцыянеры.
— Я не адразу знайшла свой стыль, — успамінае мастачка. — Прайшла праз захапленне творчасцю Эгана Шыле, Клода Манэ, Антоніса ван Дэйка. Мне падабаецца і рэалістычны жывапіс, і імпрэсіянізм, і абстрактнае мастацтва. І сёння працягваю эксперыментаваць, шукаць. Мяняцца — цалкам нармальна і нават неабходна. Таму сама не ведаю, якой буду заўтра.
У многіх краінах сумуюць па страце класічнай школы, і таму такія работы, як у Алесі Скарабагатай, выклікаюць шчырае захапленне. Сама яна ўпэўнена: для любога мастака класічная школа — фундамент, без якога няма шанцу адбыцца ў прафесіі. Як выкладчык Акадэміі мастацтваў Алеся імкнецца перадаць гэта веданне студэнтам.
У ліпені ў «Алесі» вы зможаце прачытаць парады псіхолага дарослым дзецям і іх бацькам пра тое, як дапамагаць адно аднаму, не дазваляючы маніпуляваць сабой. Даведаецеся, як правільна даглядаць скуру твару, — аб гэтым распавядзе касметолаг. А дызайнер, магістр мастацтвазнаўства, старшы выкладчык кафедры дызайну моды БДУ Марына Машэда раскажа аб правілах стварэння базавага гардэроба летняга сезона.
Алена ВАЛЕР’ЕВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
