Неяк сапсаваўся ў нас чэрвень для дачнікаў. А ўсё віной — антыцыкланальны характар надвор'я. Ён усталяваўся на тэрыторыі нашай краіны і працягвае ўтрымліваць у большасці раёнаў пераважна сухое надвор'е. На гэтым працоўным тыдні тэрыторыя Беларусі працягне знаходзіцца пад пераважным уплывам вобласці павышанага атмасфернага ціску, таму на большай частцы тэрыторыі па-ранейшаму будзе захоўвацца дэфіцыт ападкаў. Толькі ў паўднёвых і паўднёва-заходніх рэгіёнах краіны пройдуць кароткачасовыя дажджы. А 15 і 16 чэрвеня пад уплывам сістэмы атмасферных франтоў, якія ссоўваюцца з Карпат, па паўднёвым захадзе краіны дажджы стануць больш інтэнсіўнымі, у асобных раёнах прагрымяць навальніцы, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Па прагнозах сіноптыкаў, калі ў пачатку тыдня яшчэ будзе рэальна холадна па раніцах, то ў далейшым ночы ў краіне стануць цяплейшыя, а дзённы прагрэў з кожным днём будзе павялічвацца. У аўторак толькі па поўдні краіны месцамі пройдуць кароткачасовыя дажджы. Днём будзе 17—23 градусы цяпла. У сераду месцамі па краіне пройдуць кароткачасовыя дажджы, магчымыя навальніцы. Тэмпература паветра ўначы складзе 6—13 градусаў вышэй за нуль. Днём будзе 20—27 градусаў, але ў паўднёва-заходніх раёнах краіны ўсяго толькі ад плюс 17 градусаў да 19 цяпла.
Не будзе ападкаў і ў чацвер, толькі па паўднёвым захадзе краіны пройдуць дажджы, часам моцныя, месцамі навальніцы. Нават у цёмны час сутак стане цяплець. Тэмпература паветра ўначы складзе 9—15 градусаў вышэй за нуль. Днём будзе 23—28 цяпла, у паўднёва-заходніх раёнах — плюс 19—22 градусы.
У пятніцу пераважна без ападкаў, толькі па паўднёвым захадзе краіны пройдуць кароткачасовыя дажджы, месцамі навальніцы і моцныя дажджы. Тэмпература паветра ўначы складзе 9—16 градусаў вышэй за нуль. Днём будзе 23—29 градусаў цяпла, у паўднёва-заходніх раёнах — плюс 18—22 градусаў.
Паводле папярэдніх прагнозаў айчынных сіноптыкаў, у выхадныя дні ў краіне стане яшчэ на пару градусаў цяплей. Гэтымі днямі ў дзённыя гадзіны месцамі слупкі тэрмометраў нават пераадолеюць адзнаку ў 30 градусаў, а вось дажджоў па-ранейшаму будзе няшмат і размяркоўвацца па тэрыторыі краіны яны будуць нераўнамерна. Пры такіх спрыяльных умовах тэмпература вады ў рэках і вадаёмах працягне павышацца.
У суботу пераважна па захадзе краіны пройдуць дажджы, месцамі навальніцы і моцныя дажджы. Тэмпература паветра ўначы складзе 10—17 градусаў вышэй за нуль. Днём ад плюс 18 па захадзе да плюс 30 градусаў па ўсходзе краіны.
Сяргей КУРКАЧ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».