Як мы глядзелі тэлевізар у маі. Дадзеныя медыявымяральніка

Рэйтынг тэлебачання напярэдадні лета прадоўжыў падзенне: яшчэ мінус 10 працэнтаў у параўнанні з красавіком. На столькі ж скараціўся час сярэднясутачнага прагляду ТБ. На 3,5 працэнта зменшыўся сярэднясутачны ахоп аўдыторыі.

Яшчэ на паўгадзіны бліжэй да ночы ссунуўся пік аб'ёму аўдыторыі: з 17.30 да 22.15 (у выхадныя і будні). Глядацкая актыўнасць у суботу і нядзелю ў параўнанні з працоўным тыднем была вышэйшая ў перыяд з 7 гадзін 45 хвілін да 18 гадзін 45 хвілін, а таксама ноччу — з 22 гадзін 15 хвілін. Традыцыя, згодна з якой жанчын сярод тэлегледачоў больш, чым мужчын, застаецца непарушнай. Што датычыцца ўзроставай структуры аўдыторыі тэлебачання, то ў маі зменшылася колькасць тых, каму больш за 55 гадоў, і павялічылася доля маладзейшых, у тым ліку дзяцей.

Топ-5 любімых жанраў сярод гледачоў застаўся ранейшы: кіно, забаўляльныя праграмы, навіны, пазнавальныя праграмы, музыка. Па-ранейшаму не задаволены попыт на кіно, навіны, сацыяльна-палітычныя і пазнавальныя праграмы. Да такога спісу ў апошні месяц вясны дадаліся дзіцячыя праграмы. Прапанова забаўляльных, спартыўных і музычных праграм перавысіла попыт, прычым спартыўных — удвая, музычных — у чатыры разы (у працэнтным вымярэнні).

Дынаміка сярэднясутачных рэйтынгаў каналаў і ахопу аўдыторыі ў параўнанні з красавіком дэманстравала альбо мінус, альбо нуль. Дынаміка сярэднясутачнай долі трошкі падрасла ў тэлеканалаў «Беларусь 1» і МІР. У маі ў сярэднім 55,39 працэнтаў нашага насельніцтва штодня ўключалі тэлевізар (у красавіку 57,43). Дынаміка сярэдняга часу прагляду крыху падрасла ў «Беларусь 1», Plus TV, Ru TV і Europa Plus TV.

На вяршыні топа-15 праграм сярод усіх тэлеканалаў пасля нязменных «Прывітанне Андрэй!» (у першую суботу мая) і «Весткі тыдня» (трэцяя нядзеля) аказаліся «Ускладанне кветак і вянкоў да манумента Перамогі» («РТР-Беларусь», увечары 9 мая) і фільм АНТ пра няўдалыя спробы тэрактаў у Беларусі напярэдадні Дня Перамогі «Забойная пасылка», які быў паказаны вечарам 10 мая. У топ увайшлі таксама рэпартажы з Парада да Дня Перамогі ў Маскве, якія трансліравалі ў рэальным часе «НТБ-Беларусь» і «РТР-Беларусь» і інфармацыйна-забаўляльная праграма «Ты не паверыш!», прысвечаная зменам расійскага шоу-бізнесу за час правядзення спецыяльнай ваеннай аперацыі (7 мая, «НТБ-Беларусь»).

Топавыя праграмы на каналах, акрамя названых: «Панарама» («Беларусь 1», 23 мая), «Гульня ў кіно» (МІР, 18 мая), «Знакі лёсу» («Беларусь 2», 15 мая), «Бітва за Маскву» («Беларусь 3», 31 мая), «Выкідала» (СТБ, 21 мая), «Хакей. Вялікі тур зборнай. 2023» («Беларусь 5», 15 мая), «Супер-20» (Ru TV, 8 мая) і HІT NON STOP (Europa Plus TV, 10 мая).

Вольга МЯДЗВЕДЗЕВА