Гэты тыдзень будзе ў нас дастаткова «рознакаліберным»: спачатку будзе ісці снег, потым дождж з туманамі, а ў канцы тыдня пацяплее да плюс 14—15 градусаў. Праўда, не паўсюдна. А наогул красавік не спяшаецца радаваць жыхароў нашай краіны сонечным надвор'ем. Найбліжэйшая перспектыва ўстойлівага надвор'я не абяцае. У аўторак і сераду ў краіне па-ранейшаму будзе захоўвацца ўплыў атмасферных франтоў, якія працягнуць пастаўляць у Беларусь ападкі ў выглядзе снегу, мокрага снегу, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
У аўторак на большай частцы краіны ападкі ў выглядзе снегу, мокрага снегу, па ўсходзе з дажджом. На асобных участках дарог чакаецца галалёдзіца, раніцай месцамі слабы галалёд. Максімальная тэмпература паветра складзе плюс 1—7 градусаў. Па паўднёвым усходзе — да 11 цяпла.
У сераду на большай частцы тэрыторыі краіны прагназуюцца ападкі ў выглядзе мокрага снегу і дажджу. Уначы і раніцай месцамі слабыя туман і галалёд, на дарогах галалёдзіца. Тэмпература паветра ўначы будзе ў межах ад мінус 3 да плюс 3 градусаў, а па паўднёвым усходзе — да плюс 5 градусаў. Удзень тэмпература паветра будзе вагацца ад плюс 2 градусаў у заходніх да плюс 13 градусаў у паўднёва-ўсходніх раёнах краіны.
Таксама халаднавата і з ападкамі будзе ў ноч на чацвер. А ў гэты дзень 6 красавіка ў наш бок пачнуць паступаць няўстойлівыя цёплыя паветраныя масы з тэрыторыі Украіны. Тэмпературны фон пачне павышацца, а ападкі будуць выпадаць у выглядзе дажджу. Ноччу на большай частцы тэрыторыі, днём месцамі, у асноўным па поўдні краіны, пройдуць кароткачасовыя дажджы. Ноччу і раніцай у асобных раёнах чакаецца слабы туман, на дарогах галалёдзіца. Уначы тэмпература паветра складзе мінус 1 — плюс 6 градусаў, а ўдзень — плюс 7—13 градусаў. Па паўднёвым усходзе ноччу прагназуецца плюс 7—8 градусаў, а днём — плюс 14—15 градусаў.
Паводле папярэдняга прагнозу айчынных сіноптыкаў, у канцы тыдня фон атмасфернага ціску працягне расці, праясненняў стане больш, дажджы кароткачасовага характару будуць адзначацца зрэдку па краіне.
У пятніцу месцамі па Беларусі пройдуць кароткачасовыя дажджы. Ноччу і раніцай у асобных раёнах чакаецца слабы туман, на дарогах галалёдзіца. Тэмпература паветра ўначы будзе ў межах ад мінус 1 градуса па поўначы да плюс 8 градусаў па поўдні. Удзень слупок тэрмометра падымецца да плюс 7—14 градусаў.
У выхадныя холад пачне сапраўды адступаць. У суботу і нядзелю нават начных замаразкаў ужо не будзе. У суботу месцамі па краіне прагназуюцца кароткачасовыя дажджы. Ноччу і раніцай у асобных раёнах чакаецца слабы туман, на дарогах галалёдзіца. Тэмпература паветра ўначы складзе да плюс 7 градусаў, а днём — 7—14 цяпла.
Сяргей КУРКАЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.