Беларускія баскетбалісты перамаглі ў Матчы зорак

У традыцыйным аглядзе расказваем самыя цікавыя спартыўныя навіны.

Узнагароды тыдня. Беларускія баскетбалісткі сталі ўладальніцамі ўзнагарод Матча зорак Асацыяцыі студэнцкага баскетбола (ААБ), які адбыўся ў расійскім Краснаярску. Юлія Васілевіч з «Гарызонта» стала пераможцай конкурсу баскетбольнага майстэрства Solemate Skіlls Challenge. Упершыню ў гісторыі Матчаў зорак адбылася гульня жаночых каманд. Зборная «Усходу», за якую гуляла прадстаўніца БК «МІНСК» Кацярына Ерамеева, перамагла каманду «Захаду» з вынікам 109:99. За мужчынскую каманду «Усход» выступаў гулец нацыянальнай зборнай 3х3 і «МІНСКА» Кірыл Васкаўцоў. З вынікам 113:112 «Усход» адолеў «Захад». У гэтым сезоне Асацыяцыі студэнцкага баскетбола выступаюць тры беларускія маладзёжныя каманды: мужчынская і жаночая «МІНСК» і жаночая «Гарызонт-РЦАП».

Тэма тыдня. Выканаўчы камітэт Міжнароднага алімпійскага камітэта дапусціў вяртанне на міжнародныя старты расійскіх і беларускіх спартсменаў у нейтральным статусе. У сваёй заяве выканкам МАК адзначыў, што ніводнаму спартсмену нельга перашкаджаць у спаборніцтвах толькі з-за яго пашпарта. Таксама ў заяве сказана, што трэба дадаткова вывучыць магчымасць удзелу спартсменаў з расійскімі ці беларускімі пашпартамі ў спаборніцтвах у строгіх умовах. Канчатковае рашэнне пакуль не прынятае.

Магчымае вяртанне беларусаў і расіян на спартыўныя арэны ў нейтральным статусе падтрымаў Алімпійскі камітэт Канады. Але — пры асаблівых умовах. Пра гэта заявіў кіраўнік Алімпійскага камітэта Канады Дэвід Шумейкер: «Мы прызнаём, што рашэнне аб выключэнні спартсменаў толькі з-за іх нацыянальнасці супярэчыць асноўным прынцыпам алімпійскага руху».

Новы кіраўнік Алімпійскага і паралімпійскага камітэта ЗША (USOPC) Джын Сайкс адзначыў, што Міжнародны алімпійскі камітэт (МАК) павінен прадоўжыць вывучаць магчымасць допуску да Алімпіяды-2024 у Парыжы нейтральных спартсменаў. Яго словы прыводзіць інфармацыйнае агенцтва Assocіated Press. Джын Сайкс адзначыў, што USOPC выслухаў меркаванні многіх амерыканскіх спартсменаў і прызнае іх жаданне спаборнічаць з лепшымі атлетамі свету — але толькі пры ўмове гарантавання бяспечнай і сумленнай гульні. Ён назваў сітуацыю вельмі складанай. «Калі ўмовы нейтралітэту і бяспечнай, чыстай і сумленнай канкурэнцыі будуць выкананы, мы верым, што дух Алімпійскіх і Паралімпійскіх гульняў возьме верх. Гэта і ў далейшым будзе нашым асноўным кірункам», — падкрэсліў Джын Сайкс.

Перамога тыдня. Беларуская тэнісістка Дар'я Шаўга стала пераможцай турніру ІTF у егіпецкім Шарм-эль-Шэйху з прызавым фондам $15 тыс. У фінале 19-гадовая тэнісістка абыграла прадстаўніцу Ганконга Хо-Чынг Ву. Вынік сустрэчы 4:6, 6:3, 6:3.

Гераіні тыдня. На велатрэку «Лакасфінкс» у Санкт-Пецярбургу завяршыўся чэмпіянат і Кубак Расіі па веласіпедным спорце, дзе ўдзельнічалі і беларускія спартсмены. На турнірах былі разыграны ўзнагароды ва ўсіх алімпійскіх дысцыплінах. На рахунку беларускай зборнай — шэсць медалёў. Галоўным трыумфатарам турніру стала Ганна Церах, якая выйграла індывідуальную гонку праследавання і омніум, а таксама ў пары з Анастасіяй Кіпцікавай была лепшай ў мэдысане. «Золата» ў камандай гонцы заваявалі нашы Ганна Церах, Анастасія Кіпцікава, Аліна Абраменка, Ірына Чуянкова і Таісія Насковіч. Анастасія Кіпцікава стала бронзавым прызёрам у індывідуальнай гонцы, а Таісія Насковіч і Ірына Чуянкова заваявалі «бронзу» ў мэдысане.

Каманда тыдня. Хакеісты бабруйскага «Дынама-Шынніка» выігралі трэці матч запар у Маладзёжнай хакейнай лізе. У заключным матчы выязной серыі бабруйскія хакеісты сустрэліся з маскоўскімі «Крыламі Саветаў». Вынік матча — 4:2. Дзякуючы трохматчавай пераможнай серыі падапечныя Андрэя Міхалёва выйшлі на 2-е месца ў «сярэбраным» дывізіёне Захаду, у агульнай табліцы канферэнцыі наша каманда з 62 баламі займае шостае месца сярод 19 калектываў. Далей «Дынама-Шыннік» чакае дамашняя серыя з шасці гульняў, якая стартуе 14 лютага матчам супраць падмаскоўнага «Атланта».

Валерыя СЦЯЦКО