Лічбы дня: У Беларусі ўжо 100 электробусаў і 10 тысяч электрамабіляў

Нягледзячы на нясонечнае надвор’е, у пятніцу на пляцоўцы каля Нацыянальнай бібліятэкі яблыку не было дзе ўпасці. Ды гэта і нядзіўна: сёлета менавіта тут асталявалася выстава перспектыўнага электратранспарту, у якой бяруць удзел два дзясяткі кампаній.

Адкрыў дзень электратранспарту міністр энергетыкі Беларусі Віктар Каранкевіч. Ён адзначыў, што колькасць аматараў экалагічных машын з кожным годам павялічваецца, а гэта яшчэ раз падкрэслівае цікавасць насельніцтва да развіцця электратранспарту. А для развіцця гэтага напрамку ў нашай краіне створаны камфортныя ўмовы, дзейнічаюць стымулюючыя меры. Штогод павялічваецца колькасць электразарадных станцый — іх агульная колькасць па краіне складае 680. «У адпаведнасці з Указам Прэзідэнта, дзяржаўным аператарам па стварэнні зараднай сеткі вызначана ВА „Беларуснафта“. Ва ўзаемадзеянні з энергазабеспячальнымі арганізацыямі Мінэнерга забяспечана сістэмная работа ў гэтым кірунку», — сказаў Віктар Каранкевіч.

Актыўнае развіццё «Маланкі» (айчынны аператар зарадных станцый) дае свой станоўчы вынік. Міністр энергетыкі адзначыў, што, паводле апошніх даных, колькасць электрамабіляў у Беларусі дасягнула 10 тысяч. Рост за мінулы год — больш чым у два разы.

Растуць і аб’ёмы спажывання электраэнергіі зараднымі станцыямі для электратранспарту: у 2021 годзе дадзены паказчык павялічыўся ў 1,4 раза ў параўнанні з 2020 годам да 10 млн кВт*г. Дадатная дынаміка захоўваецца і сёлета.

Звярнуў увагу Віктар Каранкевіч таксама на тое, што пашыраецца парк грамадскага электратранспарту — на гарадскіх маршрутах сёння курсіруе больш за 100 электробусаў. «Гэта экалагічны, надзейны від транспарту, які забяспечвае высокі ўзровень камфорту для пасажыраў», — падкрэсліў міністр.

Варта адзначыць, што папулярнасць электратранспарту расце і ў цэлым у свеце. Так, у 2021 годзе сусветныя продажы электрамабіляў удвоіліся, агульная колькасць іх склала 16 мільёнаў машын. На думку міністра, гэтаму спрыяюць агульнасусветная тэндэнцыя да дэкарбанізацыі, адмова буйных аўтавытворцаў ад вытворчасці аўтамабіляў з рухавікамі ўнутранага згарання. Па прагнозах Міжнароднага энергетычнага агенцтва, да 2030 года агульная колькасць электрамабіляў у свеце дасягне 200 мільёнаў.

Дзень электратранспарту праводзіцца ўжо трэці год для папулярызацыі электрамабіляў як экалагічнага і эканамічнага віду транспарту, які садзейнічае фарміраванню камфортнага гарадскога асяроддзя. Гэтым разам у выставе бярэ ўдзел больш за 20 кампаній. Тут створана ўнікальная пляцоўка, дзе можна ўбачыць усе віды электратранспарту — ад легкавых і грузавых электрамабіляў, электробусаў да электраматацыклаў і электравеласіпедаў. У склад выставы таксама ўвайшлі новыя ўзоры электрагрузавіка, электрамінівэна айчыннай вытворчасці. Жадаючыя маглі даведацца аб развіцці сеткі зарадных станцый для электрамабіляў і перспектывах яе пашырэння.

Выстава сабрала шырокае кола ўдзельнікаў — прадстаўнікоў прамысловага комплексу, навуковых арганізацый, кампаній — імпарцёраў электрамабіляў. У іх ліку — «БКМ Холдынг», МАЗ, «Амкадор», «Беларуснафта», Нацыянальная акадэмія навук Беларусі, Мотавелазавод, «БелДжы», кампаніі Green cars, Tesla cars, Electro car, MultiMotors, Sidus Auto і іншыя.

Арганізатарамі мерапрыемства з’яўляюцца Міністэрства энергетыкі сумесна з Кітайска-беларускім індустрыяльным паркам «Вялікі камень» пры садзейнічанні Мінгарвыканкама.

Дарэчы, цікава было і самым маленькім удзельнікам дарожнага руху. Ім давалася магчымасць пасядзець у кабіне легкавых і грузавых электрамабіляў, азнаёміцца з узорамі не толькі электробусаў, але і найноўшых электраматацыклаў і веласіпедаў.

Дарослым наведвальнікам былі прадстаўлены мадэлі мінівэна і электраквадрацыкла айчыннай вытворчасці. Выклікае цікавасць таксама мікраэлектрамабіль для бюджэтных перавозак і многае іншае.

Сяргей КУРКАЧ

Фота БелТА